काठमाडौं - रोजगारीका लागि चालु आर्थिक वर्षको ११ महिनामा साढे १९ हजार नेपाली युवा दक्षिण कोरिया पुगेका छन् । रोजगार अनुमति प्रणाली (इपिएस) अन्तर्गत भाषा परीक्षा पास गरी १९ हजार ४१० जना युवा रोजगारीका लागि कोरिया पुगेको वैदेशिक रोजगार विभागको तथ्यांकले देखाएको छ ।
कोरियाका रोजगारदाताले पछिल्लो चार महिनामा मासिक दुई हजारभन्दा बढीको दरले रोस्टरमा रहेका कामदारको छनोट गरेका छन् । गत फागुनमा दुई हजार २०० नेपाली युवाको माग आएकोमा जेठमा झण्डै तीन हजार पुगेको छ ।
जबकि, चालु आवको सुरुआती महिना (साउन)मा ३२ जनाले मात्रै कोरिया जान पाएका थिए । कोरोना महामारीपछि तंग्रिएको कोरियाको श्रमबजारमा श्रमिकको अभाव देखिन थालेपछि रोजगारदाताले नेपाली श्रमिकको माग बढाएको बताइन्छ ।
विभागको तथ्यांकअनुसार इपिएसमार्फत साउन महिनामा ३२ जना कोरिया पुगे । भदौ महिनामा यो संख्या बढेर एक हजार ७१५ पुग्यो । असोजमा एक हजार ९१८, कात्तिक एक हजार ६०७, मंसिरमा एक हजार २७, पुसमा एक हजार २२९, माघमा एक हजार ७९७ जनाले कोरिया जान भिसा पाए ।
त्यस्तै फागुनमा दुई हजार २२७, चैतमा दुई हजार ३२३, वैशाखमा दुई हजार ५७४ र जेठमा दुई हजार ९६४ जना रोजगारीका लागि कोरिया पुगेका छन् ।चालु आर्थिक वर्षको ११ महिना अवधिमा साढे १९ हजार नेपाली रोजगारीको लागि कोरिया गएको वैदेशिक रोजगार विभागअन्र्तगत इपिएस शाखाका निर्देशक पुष्पराज कटुवालले जानकारी दिए ।
उनका अनुसार कोरिया जानेमा १४ हजार नयाँ र करिब छ हजार पुरानो अर्थात् इपिएस परीक्षा पास गरेको कमिटेड कामदारले कोरिया जाने अवसर पाएका छन् । कोरियाले यस वर्ष इपिएस प्रणाली लागू गरेका नेपालसहित विभिन्न १६ मुलुकबाट एक लाख १० विदेशी कामदार लैजाने कोटा निर्धारण गरेको छ । जसअन्तर्गत जुन मुलुकले छिटो कामदार उपलब्ध गराउन सक्छ उही मुलुकबाट धेरै कामदार लिने कोरियाको नीति रहेको निर्देशक कटुवालले बताए ।
सोही नीतिअनुरुप रोस्टरमा रहेका अधिकांश नेपालीहरु रोजागारीका लागि कोरिया पुग्न सफल भएको उनले बताए । ‘फास्ट सर्भिस, फस्र्ट प्रायोरिटी’को नीतिअनुरुप कोरियाले कामदार लैजाने भएपछि आगामी दिनमा नेपालबाट कोरिया जाने नेपालीहरुको संख्या उल्लेख्य बढ्ने कटुवालले बताए ।
‘सरकारले इपिएस परीक्षा प्रणालीमा ल्याएको सुधार र कामदार पठाउने प्रक्रिया पारदर्शी एवं छिटोछरितो गरेका कारण अन्य मुलुकको तुलनामा नेपालबाट धेरै कामदार कोरिया जान सफल भएका छन्,’ निर्देशक कटुवालले भने ।
कोरियाले ठूलो संख्यामा नेपालबाट कामदार लैजाने संकेत देखाएका कारण आगामी वर्ष कोरिया जानेको संख्या अझै बढ्ने र सोहीअनुरुप भाषा परीक्षा तय हुने इपिएस शाखाले जनाएको छ । यद्यपि, अहिले रोस्टरमा पाँच हजारको हाराहारीमा रहेका कामदारहरु कोरिया जाने प्रतीक्षामा छन् । यसरी रोस्टरमा रहेकाहरुमा नयाँभन्दा पनि कोरियाबाट फर्केर पुनः इपिएस परीक्षा पास गरेकाहरु भएको बताइएको छ ।
झण्डै चार हजार जति ‘कोरिया रिटर्नी’ (कोरियाबाट फर्किएका)हरु रोस्टरमा रहेको र उनीहरु रोजगारदाताको छनोटमा नपरेको निर्देशक कटुवालले बताए । रोस्टरमा परेर पनि छनोटमा नपरेका रिटर्नीहरुले छिटो कोरिया पठाउनुपर्ने माग राख्दै भर्खरै आन्दोलनसमेत गरेका छन् । रिटर्नीहरुको आन्दोलनकै कारण शाखाको नियमित कार्यतालिकामा फेरबदल भएको बताइएको छ ।
जसका कारण कोरियाले पछिल्लो समय नेपालबाट पानीजहाज बनाउने (सिप विल्डिङ)मा कामदारको माग गरे पनि परीक्षा सञ्चालन मिति पर सारिएको छ । हाल यस क्षेत्रका लागि रोस्टरमा रहेका ८९२ कामदारलाई लैजान सम्झौता भएको भन्दै उनीहरुलाई पठाउने प्रक्रिया अगाडि बढाइएको इपिएस शाखाले जनाएको छ ।
सिप विल्डिङमा कोरियाले तीन हजार नेपालीलाई रोजगारी दिने प्रतिबद्धता जनाउँदै यसका लागि यथाशक्य परीक्षा सञ्चालन गर्न नेपाललाई आग्रह गरेको छ ।
प्रकाशित मिति: बुधबार, असार १३, २०८० ०८:०५
-1745656903.jpeg)