काठमाडौं- राष्ट्रिय सभाका अध्यक्ष गणेशप्रसाद तिमिल्सिनाले नेपाली श्रमिकबाट लाभ लिन दक्षिण कोरियालाई आग्रह गरेका छन् । नेपालका लागि नवनियुक्त दक्षिण कोरियाली राजदूत पार्क तइयोङसँग सिंहदरबारमा सोमबार भएको भेटमा अध्यक्ष तिमिल्सिनाले उक्त कुरा बताएका हुन् ।
उनले हाल कोरियामा नेपाली श्रमिकले काम गरिरहेको अवस्था कायमै रहे पनि सामसुङलेजस्तै नेपालमा अन्य काराखाना खोल्दा श्रमसमेत सस्तो हुने भएकाले कोरियाली कम्पनीलाई पनि व्यापारमा थप लाभ हुनसक्ने बताए ।
अध्यक्ष तिमिल्सिना र राजदूत पार्कबीच भएको भेटवार्तामा दुई देशबीचको सम्बन्ध, संसदीय अनुभव आदानप्रदान, हवाई उडान, पर्यटन तथा आर्थिक विकासलगायत विषयमा पनि कुराकानी भएको बताइएको छ ।
भेटका क्रममा अध्यक्ष तिमिल्सिनाले दुई देशबीचको द्विपक्षीय सम्बन्ध तथा सहयोग अझ प्रगाढ र सुदृढ हुनेमा विश्वस्त रहेको बताए । उनले आगामी वर्ष नेपाल र कोरियाको कूटनीतिकसम्बन्ध स्थापना भएको ५०औं वार्षिकोत्सवलाई नेपालको पर्यटन र आर्थिक विकासका लागि महत्वपूर्ण हुने गरी मनाउनुपर्नेमा जोेड दिए । अध्यक्ष तिमिल्सिनाले नेपालको आर्थिक विकासमा दक्षिण कोरियाको सहयोग उल्लेखनीय रहेको बताए ।
अध्यक्ष तिमिल्सिनाले आफूले कोरियाको औपचारिक भ्रमणका क्रममा पनि यस विषयमा कुरा राखेको अवगत गराउँदै भविष्यमा नेपालको जलस्रोत, कृषि र पर्यटनका क्षेत्रमा पनि कोरियाली लगानी भित्रने अपेक्षा गरे । कोरियाली पर्यटकको नेपालप्रति आकर्षण रहेकाले आगामी दिनमा पर्यटकको संख्या दोब्बर वृद्धि गर्ने उद्देश्यसहित काम अघि बढाउन सुझाव दिँदै उनले नेपाल एयरलायन्सको कोरियामा सीधा उडान सुरु गर्न पनि आग्रह गरे ।
दुबै एयरलायन्सले उडान सञ्चालन गर्दा भाडादर सस्तो हुने र नेपाल आउने पर्यटकको संख्या वृद्धि हुने भएकाले नेपाली श्रमिक र कोरियाली पर्यटक दुवै लाभान्वित हुन सक्नेमा उनले जोड दिए ।राजदूत पार्कले कोरियाको रोजगार क्षेत्रमा नेपाली कामदारको उल्लेख्य उपस्थिति रहेकाले कोरियामा सिकेको सीप र आर्जन गरेको पुँजीलाई नेपालमा फर्केर उद्योग तथा व्यवसायमा लगाउने वातावरण बनाउन आग्रह गरे ।
नेपाली श्रमिक शिष्ट, मिहेनती र अनुशासित रहेको बताउँदै राजदूत पार्कले नेपालबाट जाने श्रमिकको संख्या आगामी दिनमा बढ्दै जाने विश्वास व्यक्त गरे । तर, नेपालीहरूले स्वदेश फर्केपछि घर र गाडीमा लगानी गर्ने क्रम बढेको भन्दै चिन्ता व्यक्त गरे ।
राजदूत पार्कले नेपाल र कोरियाको कूटनीतिक सम्बन्ध स्थापना भएको स्वर्ण जयन्तीको अवसरमा आफ्नो मुलुकले विशेष कार्यक्रम गर्ने योजना बनाएको जानकारी दिए । कोरियाको संसद्मा कोरिया–नेपाल मैत्री समूहसमेत गठन भएको जानकारी दिँदै उनले नेपालको संघीय संसद्ले पनि छिट्टै मैत्री समूह गठन गर्नेमा आफू विश्वस्त रहेको बताए ।
प्रकाशित मिति: मंगलबार, असार १२, २०८० ०८:२९
-1752335779.jpg)
