- असार मसान्तभित्र विभागको अनलाइन प्रणालीमार्फत आवेदन दिन सकिने
- आव ०७९/८० मा कम्तीमा १०० जना कामदार पठाएको विवरण अनिवार्य
काठमाडौं– वैदेशिक रोजगार विभागले वैदेशिक रोजगार व्यवसाय सञ्चालन गर्न इजाजतपत्र लिएका संस्था (म्यानपावर कम्पनी)हरुको नवीकरण अनलाइन प्रणालीमार्फत गर्न सकिने जानकारी दिएको छ ।विभागले सोमबार एक सूचना प्रकाशित गर्दै आगामी आर्थिक वर्ष २०८०/८१ का लागि इजाजतपत्र नवीकरण अनलाइन प्रणालीमार्फत हुने जनाएको हो ।
यसका लागि यही असार मसान्तभित्र अनलाइन प्रणालीमा आवेदन दिनुपर्ने विभागले उल्लेख गरेको छ । यस्ता संस्थाहरुको इजाजतपत्र वैदेशिक रोजगार ऐन, २०६४ को दफा १२ तथा वैदेशिक रोजगार नियमावली, २०६४ को नियम ८ बमोजिम प्रत्येक आर्थिक वर्षको असार मसान्तभित्र इजाजतपत्र नवीकरण गराउनुपर्ने प्रावधानको व्यवस्था गरेको व्यहोराबारे विभागले सूचनामा सचेत गराइएको छ ।
‘सोही बमोजिम २०८० असार मसान्तसम्म नवीकरण भएका इजाजतपत्रवाला संस्थाहरु नवीकरण गर्न २०८० असार मसान्तभित्र निम्न बमोजिमका कागजातहरु सम्बन्धित संस्थाको सञ्चालकबाट प्रमाणीकरण भई यस विभागको वैदेशिक रोजगार सूचना व्यवस्थापन प्रणाली (फेइम्स) मार्फत निवेदन गर्न सकिने र अनलाइन प्रणालीबाटै नवीकरण गरिने जानकारी गराइन्छ,’ विभागद्वारा जारी सूचनामा उल्लेख छ ।
विभागले नवीकरणका लागि आव ०७९/८० मा कम्तीमा १०० जना कामदार पठाएको प्रमाणसमेत पेस गर्नुपर्ने जनाएको छ । नवीकरण दस्तुर १० हजार रुपैयाँ तोकिएको छ । आव ०७८/७९ को कम्पनी अद्यावधिक पत्र, कर चुक्ता प्रमाणपत्र र आवधिक भएको सेयर लगतसमेत अनिवार्य पेस गर्नुपर्ने विभागको सूचनामा उल्लेख छ ।
नेपालमा वैदेशिक रोजगार व्यवसाय सञ्चालनका लागि इजाजतपत्र लिएका संस्था करिब ८०० को संख्यामा रहेको छ ।यसैगरी वैदेशिक रोजगारीमा जाने कामदारहरुलाई अभिमुखीकरण तालिम प्रदान गर्न विभागबाट अनुमतिपत्र प्राप्त संस्थाहरुको नवीकरण पनि अनलाइन प्रणालीबाटै हुने विभागले जनाएको छ ।
विभागले सोमबार जारी गरेको अर्को सूचनामा अभिमुखीकरण तालिम सञ्चालन गर्न अनुमतिपत्र वैदेशिक रोजगार ऐन, २०६४ को दफा २८ (६) तथा वैदेशिक रोजगार नियमावली, २०६४ को नियम २३ बमोजिम प्रत्येक आर्थिक वर्षको असार मसान्तभित्र नवीकरण गराउनुपर्ने प्रावधान रहेको उल्लेख गरेको छ ।
सोही बमोजिम यही असार मसान्तसम्म नवीकरण भएका अनुमतिपत्रवाला संस्थाहरु नवीकरण गर्न असार मसान्तभित्र आवश्यक कागजातसहित सम्बन्धित संस्थाको सञ्चालकबाट प्रमाणीकरण गराई विभागको वैदेशिक रोजगार सूचना व्यवस्थापन प्रणाली (फेइम्स) मार्फत आवेदन गर्न सकिने विभागले जानकारी दिएको छ ।
सो आवेदनहरुको अनलाइन प्रणालीबाटै नवीकरण गरिने सूचनामा उल्लेख छ ।वैदेशिक रोजगारीमा जानका लागि अनिवार्य अभिमुखीकरण तालिम लिनुपर्ने व्यवस्था रहेको छ । यद्यपि, यसलाई प्रभावकारी बनाउन नसकिएको सरोकारवालाको भनाइ छ ।
-1752335779.jpg)
