यसअघि जिल्ला प्रशासन कार्यालयले १० हजार रुपैयाँमा उपलब्ध गराउँदै आएको राहदानी आजदेखि पाँच हजार रुपैयाँमा उपलब्ध गराउने भएको विभागका निर्देशक तथा प्रवक्ता दुरपदा सापकोटाले बताए ।
काठमाडौं - राहदानी विभागले आज (असार ३ गते)बाट ६६ पृष्ठको राहदानी उपलब्ध गराउने भएको छ । विभागले आजबाट लागू हुनेगरी सेवाग्राहीलाई ६६ पृष्ठको राहदानी उपलब्ध गराउने भएको हो ।
सम्बन्धित जिल्लाबाट लिन चाहेमा पाँच हजार रुपैयाँमा उपलब्ध गराउने विभागले जनाएको छ ।यसअघि जिल्ला प्रशासन कार्यालयले १० हजार रुपैयाँमा उपलब्ध गराउँदै आएको राहदानी आजदेखि पाँच हजार रुपैयाँमा उपलब्ध गराउने भएको विभागका निर्देशक तथा प्रवक्ता दुरपदा सापकोटाले बताए ।
‘सम्बन्धित जिल्लाबाट राहदानी लिएको खण्डमा पाँच हजार रुपैयाँ लाग्ने र राहदानी विभागबाट लिन चाहेमा १२ हजार रुपैयाँ लाग्नेछ,’ उनले भने । यसैगरी हराएको र बिग्रिएको राहदानीको हकमा विभागबाट लिन चाहेमा १७ हजार रुपैयाँ तथा जिल्लाबाट लिन चाहेमा १० हजार रुपौयँ लाग्नेसमेत प्रवक्ता सापकोटाले जानकारी दिए ।
गत जेठ २४ गते बसेको मन्त्रिपरिषद् बैठकले ६६ पृष्ठको राहदानी ३४ पृष्ठको राहदानीबराबरको मूल्यमा सेवाग्राहीलाई उपलब्ध गराउने निर्णय गरेको थियो । यसअघि राहदानी विभागले जिल्ला प्रशासन कार्यालयबाट ‘फ्रिक्वेन्ट फ्लायर’ (समय–समयमा विदेश गइरहने) लाई ६६ पृष्ठको राहदानी १० हजार रुपैयाँमा सेवाग्राहीलाई उपलब्ध गराउँदै आएको थियो ।
राहदानी विभागले शुक्रबार ७७ वटै जिल्ला प्रशासन कार्यालय, राहदानी सेवा प्रदान गर्ने इलाका प्रशासन कार्यालय र विदेशस्थित सबै नेपाली नियोगलाई परिपत्र गरेर राहदानी दस्तुरसम्बन्धी जानकारी गराइएको जनाएको छ ।
शुक्रबार पत्राचार गरिएको उक्त परिपत्रमा मन्त्रिपरिषद्को निर्णयअनुसार ६६ पृष्ठको साधारण विद्युतीय राहदानीको दस्तुर ३४ पृष्ठको साधारण विद्युतीय राहदानीको दस्तुरसरह कायम गर्नेगरी संशोधन गरिएको र असार ३ गते आइतबारदेखि संशोधित दस्तुर लागू गर्न निर्देशन दिइएको विभागले शुक्रबार जानकारी दिएको थियो ।
-1745656903.jpeg)