काठमाडौं - साउदी अरेबियामा तापक्रम उच्च भएसँगै त्यहाँको सरकारले श्रमिकलाई दिउँसो खुला स्थानमा काम लगाउन प्रतिबन्ध लगाएको छ । त्यहाँको मानव संसाधन तथा सामाजिक विकास मन्त्रालय (एमएचआरएसडी)ले सबै निजी क्षेत्रका कम्पनी र प्रतिष्ठानहरूलाई सूचित गर्दै आफ्ना श्रमिकलाई दिउँसो चर्को घाममा काम लगाउन प्रतिबन्ध लगाएको जनाएको छ ।
मन्त्रालयले बिहीबार (जुन १५) देखि लागू गरेको उक्त प्रतिबन्ध आगामी सेप्टेम्बर १५ (तीन महिना)सम्म कायम रहनेछ जानकारी दिइएको छ । मन्त्रालयले दिएको निर्देशनअनुसार रोजगारदाताले दिउँसो १२ देखि ३ बजेसम्म तीन घण्टा श्रमिकलाई खुला ठाउँको काममा लगाउन पाउने छैनन् ।
मन्त्रालयले राष्ट्रिय व्यावसायिक सुरक्षा तथा स्वास्थ्य परिषद्को समन्वयमा खुला काममा प्रतिबन्ध लगाउने व्यवस्था गरेको उल्लेख छ । मानव संसाधनमन्त्री अहमद अल–राजीको निर्णयानुसार निजी क्षेत्रका कामदारहरूको सुरक्षा र स्वास्थ्यको संरक्षण गर्ने उद्देश्यका साथ प्रत्यक्ष घाममा गर्ने खुला काममा प्रतिबन्ध लगाइएको हो ।
उक्त निर्णयले निजी क्षेत्रका उद्यमहरूलाई आफ्ना कामदारलाई स्वस्थ र सुरक्षित कार्य वातावरण प्रदान गर्न र सूर्यको प्रकाश र गर्मीको तनावबाट हुने कुनै पनि जोखिम तथा हानिबाट जोगाउने मन्त्रालयको भनाइ छ । सरकारले विभिन्न पेसाजन्य जोखिमबाट सुरक्षित काम गर्ने वातावरण बनाउने प्रयास गरेकोले कार्यघण्टा मिलाउन र निर्णयानुसार कार्यान्वयन गर्न मन्त्रालयले रोजगारदाताहरूलाई आग्रह गरेको छ ।
मन्त्रालयले आफ्नो वेबसाइटमा सूर्यको प्रभाव र गर्मीको थकानबाट बच्न पेसागत सुरक्षा र स्वास्थ्यका लागि प्रक्रियागत गाइडसमेत प्रकाशित गरेको छ । यस निर्णयको कुनै उल्लंघन भएमा कानुनी कारबाही गर्ने जानाउँदै रोजगारदाताले कुनै कामदारलाई बाहिर प्रत्यक्ष घाममा काम गर्न लगायो वा जबरजस्ती गरेमा ग्राहक सेवा फोन नम्बर १९९११ मार्फत सूचित गर्न मन्त्रालयले आग्रह गरेको छ ।
खाडी मुलुक साउदीमा दिउँसोको समयमा ५० डिग्री सेन्टिग्रेडभन्दा बढी तापक्रम पुग्ने गरेको छ । यस्तो समयमा सूर्यको प्रत्यक्ष प्रकाशमा काम लगाउँदा श्रमिकमा विभिन्न स्वास्थ्य समस्या देखिने गरेको जानकारहरु बताउँछन् ।
मन्त्रालयको यस निर्णयसँगै साउदीस्थित नेपाली दूतावासले पनि अत्यधिक गर्मी तथा सूर्यको तापमा खुला ठाउँमा काम नगर्न र सुरक्षित रहन नेपाली श्रमिकहरुलाई आग्रह गरेको छ । नेपालको प्रमुख रोजगार गन्तव्यमध्येको एक साउदीमा अत्यधिक गर्मीका कारण थुप्रै नेपाली श्रमिकले ज्यान गुमाउने गरेको विभिन्न रिपोर्टहरुले देखाएको छ ।
प्रकाशित मिति: शुक्रबार, असार १, २०८० ०७:३१
-1745656903.jpeg)