काठमाडौं - सरकारले वैदेशिक रोजगारीका लागि जान चाहने महिलाको सीप तथा दक्षता अभिवृद्धि गर्ने उद्देश्यले एक महिने निःशुल्क आवासीय तालिम सञ्चालन गर्ने भएको छ । वैदेशिक रोजगार बोर्ड सचिवालयले पहिलो चरणमा रोजगारीका लागि विदेश जाने तयारीमा रहेका ५०० महिलालाई असार पहिलो साताबाट सिलाइकटाइसम्बन्धी गार्मेन्ट मेसिन अपरेटरको निःशुल्क आवासीय तालिम दिन लागेको हो ।
गार्मेन्टको मेसिन सञ्चालन गर्न तथा सिलाइकटाइसम्बन्धी सीप सिक्न चाहने देशैभरिका महिलालाई राजधानीमा निःशुल्क आवासीय तालिम प्रदान गर्न लागिएको बोर्डले जानकारी दिएको छ । निःशुल्क आवासीय तालिम सञ्चालनका लागि बोर्डले टेण्डर आह्वान गरी तालिमप्रदायक संस्थाको नामावली सार्वजनिक गरेको छ ।
बोर्डले तय गरेको मापदण्ड पूरा गरेका नौ वटा संस्था तालिम सञ्चालनका लागि छनोट भएका छन् । जसमा एक्सन फर डेभलपमेन्ट प्रालि, एलायन्स फर सोसियल मोबिलाइजेसन प्रालि, सिमेका ह्युमन रिसोर्स एकेडेमी, एफ–स्किल प्रालि, जेनियस मल्टी टेक्निकल इन्स्टिच्युट, नवरत्न टेक्निकल ट्रेनिङ इन्स्टिच्युट, ट्रेड लिंक टेक्निकल ट्रेनिङ इन्स्टिच्युट, युनाइटेड टेक्निकल ट्रेनिङ एजुकेसनल प्रालि र वल्र्डलिंक टेक्निकल ट्रेनिङ इन्स्टिच्युट रहेका छन् ।
छनोटमा परेका संस्थाले बोर्डले तोकेको बजेट सीमाभित्र रही असार पहिलो हप्ताबाट तालिम सञ्चालन गर्ने बोर्डका कार्यकारी निर्देशक डा. द्वारिका उप्रेतीले बताए । ‘निःशुल्क तालिम र निःशुल्क वैदेशिक रोजगारीको तयारीस्वरुप हामीले महिलाहरुलाई तालिमको अवसर दिन लागेका हौं,’ उनले भने, ‘अन्य विकल्प नभएसम्म वैदेशिक रोजगारी नै अहिलेको प्राथमिकता भएका कारण बोर्डको अनुदानमा सीप विकास तालिम सञ्चालन हुन लागेको हो ।’
एक महिने यो तालिम लिएका महिलाहरुले अन्य देशमा पनि रोजगारीको अवसर पाउने भन्दै उनले विशेषगरी सिलाइकटाइको कामका लागि जोर्डन जान चाहनेका लागि बढी उपयुक्त हुने बताए । त्यसैले जोर्डन जाने तयारीकासाथ पासपोर्ट लिएका वा पासपोर्ट लिने प्रक्रियामा रहेको रसिदसहित इच्छुक महिलाले निःशुल्क तालिममा सहभागिता जनाउनसक्ने उप्रेतीले जानकारी दिए ।
सीमित बजेट र उपकरणको उपलब्धतालाई हेरेर सबैलाई पायक पर्ने र केन्द्रबिन्दु भएकाले काठमाडौंमा नै पहिलो चरणको तालिम सञ्चालन गर्न लागिएको बोर्डका निर्देशक एवं सूचना अधिकारी राजन पौडेलले बताए । नेपालमा सिकेको जानेको सिलाइबुनाइ र कटिङले विदेशमा काम नगर्ने हुँदा सोहीअनुरुपको तालिम सञ्चालन गरी महिलाहरुलाई दक्ष बनाउने लक्ष्यका साथ निःशुल्क आवासीय तालिम सञ्चालन गर्न लागिएको पौडेलले बताए ।
पौडेलका अनुसार तालिममा सहभागी हुन चाहने महिलाको उमेर समूह १८ देखि ३५ वर्ष र न्यूनतम कक्षा आठ उत्तीर्ण गरेको हुनुपर्नेछ । तालिम लिन चाहने महिलालाई बोर्डको सचिवालय वा सूचनामा दिइएको तालिम प्रदायक संस्थाहरुमा सम्पर्क गर्न आग्रह गरिएको छ । त्यस्तै सुरक्षित आप्रवासन कार्यक्रम (सामी) अन्तर्गत पनि विभिन्न जिल्लामा निःशुल्क आवासीय सीप तालिम कार्यक्रम सञ्चालन हुँदै आइरहेको बोर्डले जनाएको छ ।
प्रकाशित मिति: मंगलबार, जेठ ३०, २०८० ०७:२८
-1752335779.jpg)
