काठमाडौं – साउदी अरेबियाले नेपाली कामदारको शैक्षिक प्रमाणपत्र अनिवार्य प्रमाणीकरण गर्नुपर्ने व्यवस्था लागू गर्न लागेकोप्रति नेपाल वैदेशिक रोजगार व्यवसायी संघले विरोध जनाएको छ ।
संघले यसलाई अव्यावहारिक र प्रचलित कानुनविपरीत रहेको बताएको छ । नेपालस्थित साउदी दूतावासले कुनै सूचना नदिई एकतर्फी रुपमा कामदारको शैक्षिक प्रमाणपत्र प्रमाणीकरण गर्ने व्यवस्था लागू गर्न खोजेको भन्दै संघले श्रम, रोजगार तथा सामाजिक सुरक्षा मन्त्रालयको ध्यानाकर्षण गराएको छ ।
संघका अध्यक्ष राजेन्द्र भण्डारी, महासचिव मेघनाथ भुर्तेलसहितको टोलीले बिहीबार श्रममन्त्री शरतसिंह भण्डारीलाई मन्त्रालयमा भेट गरी दूतावासको उक्त निर्णयलाई कूटनीतिक माध्यमबाट रोक्न लगाई पूर्ववत् अवस्थामा नै कामदार जाने व्यवस्था मिलाउन आग्रह गरेको छ । संघले नेपालबाट साउदीलगायत खाडीका देश र मलेसिया जाने कामदार प्रायः अदक्ष हुने भएकाले त्यस्ता मुलुकमा जान शैक्षिक प्रमाणपत्रको आवश्यक नहुने, अनिवार्य प्रमाणीकरण अव्यावहारिक र कानुनविपरीत लागू गर्न खोजिएको मन्त्री भण्डारीलाई जानकारी गराएको छ ।
रोजगारीका लागि विदेश जाने सामान्य कामदारको शैक्षिक योग्यताको प्रमाणपत्र नहुने र उनीहरु पुख्र्यौली पेसाको आधारमा विदेशमा काम गर्न जाने भएकाले दूतावासको निर्णयले त्यस्ता कामदार रोजगारीबाट वञ्चित हुनुपर्ने अवस्था आएको भन्दै उक्त निर्णय रोक्नुपर्ने संघले माग गरेको छ ।
दूतावासले अब नेपाली कामदार साउदी पठाउँदा भिसा प्रक्रियाका लागि शैक्षिक योग्यताको प्रमाणपत्र परराष्ट्र मन्त्रालयअन्तर्गत कन्सुलर सेवा विभागबाट प्रमाणित गरी पुनः दूतावासबाट प्रमाणीकरण गर्नुपर्ने व्यवस्था लागू गर्न लागेको अनौपचारिक जानकारी पाएको संघका महासचिव भुर्तेलले बताए ।
‘दूतावासले कुनै पनि निर्णय गर्दा कूटनीतिक च्यानलमार्फत सरोकारवालाहरुले जानकारी पाउनुपर्ने हो,’ उनले भने, ‘तर, विनासूचना व्यवसायीहरुलाई भिसा स्ट्याम्पिङ गर्न जाँदा आउँदो सोमबारदेखि कामदारको शैक्षिक प्रमाणपत्र प्रमाणीकरण गरेर ल्याउनू भनेपछि हामीले मन्त्रीज्यूको ध्यानाकर्षण गराएका हौं ।’
संघले मन्त्रालयलाई दूतावासको निर्णयबारे अवगत गराएलगत्तै मन्त्री भण्डारीले सम्बन्धित निकाय हेर्ने अधिकारीलाई आवश्यक समन्वय र परामर्शका लागि निर्देशन दिएको भुर्तेलले जानकारी दिए । उनले किन र केका आधारमा दूतावासले उक्त निर्णय गरेको हो, व्यवसायीले बुझ्न नसकेको बताए ।
