काठमाडौं - वैदेशिक रोजगार विभागले पछिल्लो समय रोजगारीका लागि ‘भिजिट भिसा’मार्फत विदेश जाने कामदार ठगिने क्रम बढ्दै गएको जनाएको छ । विभिन्न व्यक्ति तथा संस्थाहरुले आकर्षक तलब सुविधाको प्रलोभन देखाउँदै भिजिट भिसामा विभिन्न मुलुकमा कामदार पठाउँदा ठगिने क्रम बढ्दै गएको विभागले उल्लेख गरेको छ ।
विभागले एक विज्ञप्ति जारी गर्दै ठगी गर्नेले कन्सल्टेन्सी, व्यक्तिगत मोबाइल नम्बर, फेसबुक, युट्युबलगायतका सूचना प्रविधिको प्रयोग गरी नेपाली युवाहरुलाई फिलिपिन्स, इजरायल, माल्टालगायत देशमा आकर्षक तलब सुविधाको प्रलोभन देखाउने र ठूलो रकम असूल गरी भाग्ने गरेको उल्लेख छ ।
साथै, ठगीमा संलग्नहरुले नेपालीहरुलाई भिजिट भिसामा ती मुलुकमा पठाएर अलपत्र बनाउने गरेको घटनासमेत बढ्दै गएको बताइएको छ । जसका कारण अहिले विभागमा वैदेशिक रोजगारसम्बन्धी ठगीका मुद्दाहरु बढिरहेको विज्ञप्तिमा जनाइएको छ ।
रोजगारीका लागि प्रलोभनमा परी भिजिट भिसामा जाने अधिकांश प्रमाणविहीन हुँदा विभागले पीडितलाई समयमा न्याय प्रदान गर्न कठिनाइ भइरहेको जनाएको छ । सामाजिक सञ्जाललगायत विभिन्न माध्यमबाट हुने ठगीका घटना बढ्दै गएका कारण वैदेशिक रोजगारीमा जान चाहने युवाहरुलाई विस्तृतरुपमा बुझेरमात्रै निर्णय लिन विभागले आग्रहसमेत गरेको छ ।
यदि, वैदेशिक रोजगारीका लागि जाने नै भए विभागबाट इजाजत प्राप्त संस्था (म्यानपावर)मार्फत वैधानिक ढंगबाट जान पनि सुझाइएको छ । विभागले ठगीमा पर्नबाट बच्न र ठगी गर्ने व्यक्ति तथा संस्थाहरुबारे समयमा सूचना दिएर ठगी नियन्त्रणमा सहयोग गर्न पनि सबैलाई अनुरोध गरेको छ । ठगीमा संलग्नहरुलाई प्रचलित कानुनबमोजिम कडा कारबाही गर्ने विभागले चेतावनी दिएको छ ।
यस्तै युरोपका कतिपय मुलुकमा नेपाली कामदारको माग भए पनि मागपत्र प्रमाणीकरणका लागि समस्या भएकाले त्यस्ता मुलुकमा व्यक्तिगतरुपमा भिजिट भिसामा जाने संख्या बढ्दो रहेका कारण ठगीका घटना बढिरहेको विभागका महानिर्देशक मदन दाहालले श्रम मन्त्रालयले आयोजना गरेको एक कार्यक्रममा बताएका थिए ।
उनले विभिन्न माध्यमबाट अवैधरुपमा विज्ञापन गर्ने, प्रलोभनमा पार्ने, आफ्नो क्षेत्रभन्दा बाहिर गएर वैदेशिक रोजगारसम्बन्धी गतिविधि गर्ने संस्थाहरुलाई समेत कारबाहीको दायरामा ल्याउन आवश्यक गृहकार्य भइरहेको बताए । विभागमा भएको तथ्यांकअनुसार चालु आर्थिक वर्षको साउनदेखि वैशाखसम्म ९२५ वटा ठगी मुद्दाका उजुरी दर्ता भएका छन् । जसमा ७५ करोड ७७ लाख ४१ हजार २१४ रूपैयाँ ठगी भएको दाबीसहित उजुरी गरिएको छ ।
प्रकाशित मिति: मंगलबार, जेठ २३, २०८० १०:२३
-1745656903.jpeg)