- सरकार छाड्नेबारे सोमबारबाट छलफल थालेको माओवादी आज थप छलफलमा जुट्दै
- कांग्रेस ‘पर्ख’ र ‘हेर’को दाउमा मौन बस्दा मुख्यमन्त्री हिक्मत कार्की छैनन् सत्ता छाड्ने मुडमा
- एकीकृत समाजवादीकी निर्मला लिम्बूले एक हप्ताअघि नै सरकार छाडेर नयाँ गठबन्धनका लागि मार्गप्रशस्त
काठमाडौं - निर्वाचनलगत्तै संघदेखि प्रदेश सरकारमा कब्जा जमाएको नेकपा एमाले माओवादी केन्द्रले गठबन्धन परिवर्तन गरेसँगै कोशी प्रदेशमामात्र सीमित हुनपुग्यो । संघ र अन्य प्रदेशमा एमाले सरकार क्रमशः ढले पनि कोशीमा एमालेले आफ्नो नेतृत्वमा सरकार चलाइरहेको छ । तर, एमालेको एकमात्र कोशी प्रदेश सरकार पनि संकटको संघारमा पुगेको छ ।
प्रदेशको नामाकरणसँगै विवादको घेरामा परेको कोशी प्रदेशमा एमाले नेतृत्वको सरकार संकटमा परेको हो । गत फागुन १७ गते प्रदेशको नामाकरण कोशी भएको थियो । त्यसयता मुख्यमन्त्री हिक्मत कार्कीको सरकारविरुद्ध निरन्तर आन्दोलन जारी छ ।
यता केन्द्रीय सत्ता गठबन्धन पनि कार्की नेतृत्वको सरकार ढलाउन लागिपरेको छ । नेपाली कांग्रेस संसदीय दलका नेता उद्वव थापाका अनुसार केही दिनमै मुख्यमन्त्री कार्की नेतृत्वको सरकार ढल्नेछ । ‘माओवादीको छलफल प्रारम्भ भएको छ । तीन–चार दिन लाग्ला निष्कर्ष आउन,’ नेता थापाले प्रभावसँग भने ।
माओवादीले सरकार छाड्ने र त्यसपछि सरकार कसरी बनाउने भन्नेबारेमा छलफल गरी दृष्टिकोण निर्धारण गरिने उनले बताए । ‘गठबन्धनमा रहेका दलहरु फिर्ता भएपछि छलफल राखेर दृष्टिकोण बन्छ, लगत्तै हामी अघि बढ्छौ,’ नेता थापाले भने ।
कोशीमा एमाले नेतृत्वको सरकार ढलाउन गठबन्धनले निर्णायक मानिएकी जनता समाजवादीकी निर्मला लिम्बूले सरकार छाडिसकेकी छन् । स्वास्थ्यमन्त्री रहेकी लिम्बूले यही १७ जेठमा सरकार छाडेकी हुन् । कोशीमा जसपाको एकमात्र सांसद रहेको छ । कार्की नेतृत्वको प्रदेश सरकारमा माओवादीका दुर्गाप्रसाद चापागाईं भौतिक पूर्वाधार र जीवन आचार्य पर्यटनमन्त्री छन् ।
माओवादी अब सरकार छाड्ने मनासायसहित सोमबारबाट छलफलमा जुटेको छ । बजेटअघि नै सरकार छाड्ने तयारीमा रहेको माओवादी आफ्नै नेतृत्वमा सरकार बनाउने तयारीका साथ छलफलमा जुटेको बताइन्छ । सोमबार के निर्णय भयो भन्ने विषयमा माओवादी नेताहरुले बोल्न मानेका छैनन् ।
माओवादी संसदीय दलले सरकार छाड्ने निर्णय गरिसकेको तर केन्द्र र प्रदेश कमिटिसँग थप छलफल गरेरमात्र पक्का निचोड निस्कने बताइएको छ । माओवादी सांसद गणेश उप्रेतीका अनुसार आज (मंगलबार) प्रदेश कमिटीसँग छलफल गरिँदै छ ।
यस्तो छ अंकगणित
९३ सदस्यीय प्रदेशसभामा बहुमतका लागि ४७ मत आवश्यक पर्छ । अहिले एमालेको ४०, माओवादीको १३ र राप्रपाको छ गरी ५९ जना सांसदको समर्थनमा सरकार टिकेको छ । माओवादीले सरकार छाड्नसाथ एमाले नेतृत्वको सरकारलाई ४६ सांसदको मात्र समर्थन हुनेछ । जबकि, प्रदेशसभामा बहुमतका लागि ४७ सिट आवश्यक पर्छ ।
त्यसो त कांग्रेसको २९, माओवादी केन्द्र १२, एकीकृत समाजवादी पार्टीका चार र जनता समाजवादी पार्टी (जसपा)को एक गरी अर्को गठबन्धनसँग पनि ४६ सांसद नै छ । यसले गर्दा सभामुख निर्णयक बन्नुपर्ने देखिन्छ ।
सभामुख माओवादीका बाबुराम गौतम छन् । केन्द्रमा सहमति जुटेमा यो हप्ता नै सरकार ढाल्नेबारे निर्णय हुने थापा बताउँछन् । यद्यपि, माओवादीले सत्ता छाडेपछि पनि कार्की सरकार एक महिना लम्बिन सक्छ ।
संवैधानिक प्रावधानअनुसार सत्तामा सहभागी दलले सरकार छाडेपछि एक महिनाभित्र विश्वासको मतका लागि संसद्मा मत विभाजन गर्नुपर्ने हुन्छ । गत पुस २४ गते ६० सांसदको समर्थनमा कार्की प्रदेश १ (कोशी) को मुख्यमन्त्री नियुक्त भएका थिए । यसैगरी एमालेले गण्डकी र लुम्बिनीमा ढिला गरी सरकार छाडेको थियो ।
-1752335779.jpg)
