काठमाडौं - नेपाल आदिवासी जनजाति पत्रकार महासंघ (फोनिज) काठमाडौं शाखाको आयोजनामा निःशुल्क आँखा शिविर सम्पन्न भएको छ । शनिबार अनामनगरमा सञ्चालित शिविरमा ८० जनाभन्दा बढीले आँखा जाँच गराएको आयोजकले जानकारी दिएको छ ।
फोनिज काठमाडौंले अरनिको समाजसँगको सहकार्यमा शिविर सञ्चालन गरेको हो । ‘शिविरमा ३० जना लेखक÷पत्रकार र ५० भन्दा बढी सार्वसाधारणले सेवा लिएका छन्,’ फोनिज काठमाडौंका अध्यक्ष शैलेश डंगोलले बताए । आँखा परीक्षणसँगै चश्मा, आइड्रपलगायत स्वास्थ्यसामग्रीसमेत निःशुल्क वितरण गरिएको उनको भनाइ छ ।
पत्रकारहरु कम्युटर तथा अन्य प्रविधिसँग व्यस्त भइराख्नुपर्ने भएकाले आँखाको सुरक्षामा चुनौती बढ्दै गएको बेला फोनिज काठमाडौंले आफ्नो अतिरिक्त क्रियाकलापअन्तर्गत आँखा शिविर सञ्चालन गरिएको उनले बताए । शिविरको उद्घाटन बागमती प्रदेशसभा सदस्य एवं पूर्वसंस्कृति तथा पर्यटनमन्त्री दीपेन्द्र श्रेष्ठले गरेका थिए ।
उनले आदिवासी जनजाति पत्रकारहरुले आफ्नो कला, संस्कृति, अधिकार र पहिचानको पक्षमा सधैं कलम चलाउनुपर्ने बताए । समुदायको हित प्रवद्र्धनमा गहनरुपमा अध्ययन अनुसन्धान गरी आर्थिक समृद्धिको पाटोका लाग्नसमेत उनले सुझाव दिए ।कार्यक्रममा फोनिजका संघीय कोषाध्यक्ष लाला गुरुङ, फोनिज बागमती प्रदेश अध्यक्ष युवराज श्रेष्ठ, अरनिको समाजका अध्यक्ष बालकृष्ण श्रेष्ठलगायतले मन्तव्य राखेका थिए ।
