-सरकारमा जानुअघि रञ्जिताले आफू मन्त्री भएपछि रेशम जेलबाट छुट्ने बताएकी थिइन्
- उच्च अदालतले २०७७ पुस ३ गते सुनाएको जन्मकैद गत जेठ २ सर्वोच्चले सदर गरेको थियो
-सर्वोच्चको फैसलाको भोलिपल्टै उन्मुक्ति पार्टीले जेठ ६ देखि १० गतेसम्म नेपाल बन्दको घोषणा गरेको थियो । लगत्तै ५ गते सहमतिको वातावरण बनेपछि उन्मुक्तिले बन्द फिर्ता लिएको थियो
काठमाडौं- ‘टीकापुर हत्याकाण्ड’मा जन्मकैद सजाय भोगिरहेका रेशम चौधरीको सजायमाफीको माग गर्दै परेको निवेदन प्रस्ताव राष्ट्रपति कार्यालय शितलनिवासमा पुगेको छ । गृह मन्त्रालयमार्फत उक्त निवेदन बुधबार शितलनिवास पुगेको हो ।
कैलालीको टीकापुरमा सात प्रहरी र एक नाबालकको ज्यान जाने गरी भएको हत्याकाण्डका मुख्य अभियुक्तका रुपमा रेशमसहित ११ जनालाई जन्मकैदको फैसला भएको थियो । २०७२ भदौ ७ गते मधेस–थरुहट आन्दोलनका क्रममा टीकापुरमा प्रहरीका एसएसपी लक्ष्मण न्यौपानेसहित सात जना प्रहरी र एक जना बालक मारिएका थिए ।
यस घटनापछि सुरक्षाकर्मीको यातनाबाट एक जना थारु पनि मारिएका थिए ।सुरक्षाकर्मी मारिएपछि ८५ जनाभन्दा बढी थारुहरुको घर जलाइएको थियो भने दर्जनौं थारुहरु विस्थापित भएका थिए । सोही प्रकरणमा रेशमलाई उच्च अदालतले जन्मकैदको सजाय सुनाएको थियो ।
घटनाका मुख्य आरोपी चौधरीले सांसद भएको समयमा जिल्ला अदालत कैलालीमा आत्मसमर्पण गरेका थिए । त्यसयता उनी काठमाडौंस्थित डिल्लीबजार कारागारमा छन् । जेठ २ गते सर्वोच्च अदालतले उच्च अदालतको निर्णय सदर गरेको थियो । चौधरी २०७४ फागुन १४ गतेबाट जेलमा छन् ।
राष्ट्रपतिले अध्ययन गर्ने
उनै रेशमलाई जेठ १५ गते गणतन्त्र दिवसको अवसर पारेर आममाफी दिने गरी राष्ट्रपति कार्यालयमा फाइल पुगेको छ । सजाय माफीसम्बन्धी फाइल बुधबार आइपुगे पनि अध्ययन गर्न भने बाँकी रहेको राष्ट्रपतिका कानुनी सल्लाहकार बाबुराम कुवँरले बताए ।
‘प्रशासनले हेर्न पाएको छैन । शुक्रबारबाट अध्ययन गरेर प्रशासनबाट ब्रिफिङ हुन्छ,’ प्रभावसँग कुवँरले भने । राष्ट्रपतिको कार्यालयमा आइपुगेको फाइल सम्पूर्ण सजाय माफीसम्बन्धी भएको उनले बताए ।
बिहीबार भोटोजात्राका कारण बिदा परेकोले अध्ययन हुन नपाएको राष्ट्रपतिका प्रेस सल्लाहकार किरण पोखरेलले बताए । यसबारेको फाइल विस्तृत अध्ययनपछि मात्र राष्ट्रपति रामचन्द्र पौडेलले निर्णय लिने पोखरेलको भनाइ छ ।
श्रीमती मन्त्री बनेपछि छुट्ने तरखर !
नागरिक उन्मुक्ति पार्टीकी अध्यक्ष हुन् रञ्जिता श्रेष्ठ । उनी रेशमकी पत्नी हुन् । गठबन्धन सरकारमा चैत १७ गते रञ्जिता भूमि व्यवस्था, सहकारी तथा गरिबी निवारणमन्त्रीमा नियुक्त भएकी हुन् । मंसिरमा सम्पन्न संसदीय चुनावमा रेशमको पार्टीले प्रतिनिधिसभामा प्रत्यक्षतर्फ चार सिट जितेको थियो । रेशम पत्नी रञ्जिता कैलाली–१ बाट विजयी भएकी थिइन् । रेशमका बुवा लालवीर चौधरीले पनि बर्दिया–२ बाट जित हासिल गरेका थिए ।
सरकारमा जानुअघि रञ्जिताले आफू मन्त्री भएपछि रेशम जेलबाट छुट्ने बताएकी थिइन् । यद्यपि, जेठ २ गते भने सर्वोच्च अदालतले उच्च अदालत दिपायल गरेको फैसलाको सदर गरेको थियो । उच्च अदालतले २०७७ पुस ३ गते उनलाई जन्मकैद सुनाएको थियो । यसअघि जिल्ला अदालत कैलालीले उनी तीन वर्षभन्दा बढी पुर्पक्षमा राखेको थियो ।
सर्वोच्चको फैसलासँगै उन्मुक्ति पार्टीले देशव्यापी आन्दोलन गर्ने चेतावनीसमेत दिएको थियो । सर्वोच्चको फैसलाको भोलिपल्टै उन्मुक्ति पार्टीले जेठ ६ देखि १० गतेसम्म नेपाल बन्दको घोषणा गरेका थियो । लगत्तै ५ गते उन्मुक्तिले बन्द फिर्ता लिएको थियो ।
जेलमा हुँदै शपथ, जेलमै सकियो पदावधि
२०७२ साल भदौ ७ गते टीकापुरमा हत्याकाण्ड मच्चिएको थियो । टीकापुर हत्याकाण्डको मुख्य योजनाकारको आरोप लागेपछि रेशम फरार भएका थिए । उनी लामो समय भारतमा लुकेर बसे । फरार रहेकै अवस्थामा कैलाली–१ बाट प्रतिनिधिसभामा निर्वाचन लडे । उनी २० हजार ९३५ को फराकिलो अन्तरले निर्वाचित भए ।
त्यसपछि उनले जिल्ला अदालत कैलाली पुगेर आत्समर्पण गरे । कैलाली कारागारमै सांसद पदमा शपथ खुवाउनुपर्ने माग गर्दै अनसन बसेका उनी । अनसनकै क्रममा बिरामी परे । बिरामी परेपछि रेशमलाई काठमाडौं ल्याइयो । काठमाडौं ल्याएपछि उनलाई २०७४ पुस १६ गते सभामुख कृष्णबहादुर महराले प्रतिनिधिसभा सदस्यको शपथ खुवाए ।
शपथ खुवाएपछि उनलाई जेल नै पठाइयो । त्यसयता रेशम जेलमा छन् । रेशमको पार्टीले पछिल्लो निर्वाचनमा चार सिट जितेसँगै नेपाली कांग्रेसदेखि गठबन्धनका नेताहरु उनलाई फकाउन जेल पुगेका थिए । तर, त्यतिबेला गठबन्धन भत्किएर एमालेको सहयोगमा नयाँ सरकार गठन भएपछि रेशमलाई छुटाउने प्रकरण सेलाएको थियो ।
