दाहालको भनाइप्रति कांग्रेसको आपत्ति
काठमाडौं– सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहालको अभिव्यक्तिप्रति नेपाली कांग्रेसले आपत्ति जनाएको छ ।
बिहीबार युनयुद्ध दिवशको अवसरमा नेकपाको धुम्बाराहीस्थि पार्टी कार्यालय आयोजित कार्यक्रमको सम्बोधन गर्दै अध्यक्ष दाहालले ‘तत्कालीन जनयुद्धका बेला गिरिजाप्रसाद कोइराला नै ठूला ठूला आक्रमण गर्न’ हौसाएको भन्ने भावको अभिव्यक्ति दिएका थिए । पूर्वप्रधानमन्त्री समेत रहेका अध्यक्ष दाहालको उक्त भनाइप्रति कांग्रेसले आफ्नो गम्भीर ध्यानकर्षण भएको जनाएको छ ।
पार्टी मुख्यालयमा आयोजित श्रद्धाञ्जली सभामा बोल्दै अध्यक्ष दाहालले तत्कालीन नेपाली कांग्रेसका सभापति गिरिजाप्रसाद कोइरालाले आफूहरूलाई फौजी आक्रमण बढाइदिन आग्रह गरेको बताएका थिए । अध्यक्ष दाहालको उक्त भनाइप्रति कांग्रेसले आपत्ति जनाएको हो । बिहीबार साँझ कांग्रेस प्रवक्ता विश्वप्रकाश शर्माले विज्ञिप्त जारी गर्दै नेकपाका अध्यक्ष दाहालको उक्त अभिव्यक्तिको खण्डन गरेको हुन् ।
‘माओवादीको नेतृत्वमा भएको हिंसात्मक विद्रोहको शान्तिपूर्ण अवतरण गराउन निर्णायक पहल गर्नुहुने शान्तिका नायक स्व. गिरिजाप्रसाद कोइरालाको जिम्मेवार र परिपक्व भूमिकालाई अर्थहीन ढंगले विवादित बनाउने प्रयत्न अराजनीतिक त छ नै आपत्तिजनकसमेत छ,’ विज्ञप्तिमा भनिएको छ ।
अध्यक्ष दाहालको सो अभिव्यक्ति गैरजिम्मेवार भएको भन्दै कांग्रेसले दुःखद भनेको छ । ‘फौजी आक्रमण अलि बढाइदिनुप¥यो र सदरमुकाम हान्नुपर्याे भनेर गिरिजाप्रसाद कोइरालाले दाहाललाई यदि साँच्चै भन्नुभएको हुँदो हो त त्यो संवादको कुरा कोइराला जिवित छँदै नै दाहालले पक्कै सार्वजनिक गर्नुहुन्थ्यो,’ शर्माले विज्ञप्तिमा भािएको छ, ‘तर उहाँको निधन भएको यतिका बर्षपछि ऐतिहासिक तथ्यलाई तोडमरोड गर्ने ढंगले एक जिम्मेवार नेताबाट गैह्र जिम्मेवार अभिव्यक्ति आउनु दुःखद छ ।’
माओवादीको हिंसात्मक आक्रमणबाट मुलुकलाई मुक्त गर्न कोइरालाले सहमति, सहकार्य र एकताको राजनीति अघि सारेको काँग्रेस स्मरण गराएको छ । विज्ञप्तिमा भनिएको छ, ‘ऐतिहासिक तथ्य यो हो कि माओवादीको हिंसात्मक आक्रमणबाट मुलुकलाई मुक्त गर्न कोइरालाले सहमति, सहकार्य र एकताको राजनीति अघि सार्नु भएको थियो । हिंसाको राजनीतिलाई सुरक्षीत अवतरण गराउन सफल ढंगले संयोजन र नेतृत्व गर्नुभएको नेताले नै हिंसात्मक आक्रमणका लागि प्रेरित गर्नुभयो भन्नू आफैमा विरोधाभासपूर्ण छ ।’ साथै कांग्रेसले जिम्मेवार अभिव्यक्तिका दिन अध्यक्ष दाहाललालाई सजग समेत गराएको छ ।
अध्यक्ष दाहालले उक्त कार्यक्रममा सम्बोधन गर्दै केही वर्ष पहिलासम्म नेपालमा यति छिटो संविधान घोषणा भइहाल्ला, शत्रुतापूर्ण अवस्थामा रहेका मुख्य पार्टीहरू एकतामा आइहाल्लान् र दुई तिहाई ल्याइहाल्लान् भनेर कसैले सोच्न नसकेको टिप्पणी गरेका थिए । उनले तत्कालीन अवस्थामा माओवादीले सुरु गरेको जनयुद्ध सम्भव होला भन्ने कसैले पनि नसोचेको स्मरण गर्दै भने, ‘यसले संविधानसभा जन्माउला, गणतन्त्र नेपाल स्थापना गराउला भन्ने थिएन ।’
राज्य र विद्रोही पक्ष फेरि शान्ति समझौतामा आउलान्, उनीहरूको सहकार्यबाट मुुलुकमा राजतन्त्र अन्त्य होला भन्ने पनि कुनैबेला असम्भवजस्तै रहेको भन्दै अध्यक्ष दाहलाले सही विचार र सही नेतृत्वले सम्भव भएको बताए ।
तत्कालीन एमालेका नेता बामदेव गौतम, युवराज ज्ञवाली लगायतले आफूहरू जनयुद्धमै रहेको समयमा आधार इलाकामै आएर छलफल गरेको र एक प्रकारको समझदारी गरेको जिकिर गर्दै अध्यक्ष दाहालले त्यही समझदारीको दायरा फराकिलो हुँदै राजतन्त्र अन्त्य र गणतन्त्र स्थापनाको आधार तयार भएको बताए । यसैक्रममा उनले नेपाली कांग्रेसका तत्कालीन सभापति गिरिजाप्रसाद कोइराला र आफूबीच १२ बुँदे सहमतिको सेरोफेरोमा दैनिक सम्पर्क हुने गरेको र गिरिजाप्रसाद कोइरालाले आफूहरूलाई फौजी आक्रमण बढाइदिन आग्रह गर्ने गरेको खुलासा गरेका हुन् । सम्बोधनका क्रममा उनले भने, ‘गिरिजाप्रसाद नै ठूल्ठूला फौजी आक्रमण गरिदिनुपर्याे भन्नुहुन्थ्यो । यसले नै राजतन्त्र अन्त्य गर्ने वातावरण बन्यो ।’ कार्यक्रमा प्रधानमन्त्री तथा नेकपाका अध्यक्ष केपी ओली शर्मा भने गएनन् । यसअघि प्रधानमन्त्री ओली पनि सहभागी हुने प्रचार गरिएको थियो ।
