काठमाडौं– सरकारले चीनको वुहानबाट नेपाल फर्काउन लागेको नेपाली विद्यार्थीलाई राख्ने स्थानको व्यवस्थापन र तयारी पूरा भएको छ । स्वास्थ्य तथा जनसंख्या मन्त्रालय स्वास्थ्य विभागले बुधबार चाँगुनारायणमा आयोजना गरेको पत्रकार सम्मेलमा सो जानकारी दिइएको हो ।
तर, चीनको वुहानमा रहेका नेपालीलाई कहिले उद्दार गरिने भन्ने अझै टुंगो लागेको छैन । सरकारले चीनमा रहेका नेपाली नागरिकलाई यही ३ फागुनमा स्वदेश फर्काउने मंगलबार बसेको मन्त्रिपरिषद्को बैठकबाट निर्णय गरेको भएपनि अझै निश्चित भएको छैन ।
कोरोना भाइरसको संक्रमण विश्वभर महामारीको रूपमा फैलिन थालेपछि चीनमा रहेका आफ्ना नागरिकलाई स्वदेश ल्याउने सरकारले निर्णय गरेको भएपनि नेपाल एयरलायन्सका कर्मचारीले वुहान जान आनकानी गरेकाले निश्चित हुन नसकेको हो । सरकारले वुहानमा रहेका नेपाली विद्यार्थीलाई उद्दार गर्न वाइड बढी विमान पठाउने निर्णय गरेको छ । तर, स्रोतका अनुसार विमानका पाइलट र अन्य कर्मचारीले वुहान जान आनाकानी गरिरहेको जनाएको छ । यससँगै सरकारले भनेजस्तै ३ फागुनमै वुहानमा रहेका नेपालीको उद्दार हुन्छ भन्ने अनिश्चित बनेको छ । एक साता अघि नै वुहानका रहेका १ सय ८५ जनाले स्वदेश फर्कन आवेदन दिएका थिए । तर, उनीहरूले आवेदन दिएको साता दिन वितिसक्दा समेत सरकारले उद्दार गर्ने कार्यलाई प्राथमिकता नदिएको भन्दै उनीहरूले गुनासो गरेका छन् । यसैबेला सरकारले यता ती विद्यार्थीलाई स्वदेश ल्याइएपछि उनीहरूलाई भुक्तपुरस्थित खरिपाटीमा राख्नका लागि १ सय ९९ वटा ‘क्यारेन्टाइन’ रुमको व्यवस्थापन गरेको जनाएको छ । स्वास्थ्य मन्त्रालयले सम्बद्ध अन्य मन्त्रालय र जिम्मेवार निकायसँग समन्वय गरी कार्य गरिरहेको जनाएको छ ।
चीनको हुवेई प्रान्तमा अध्ययन तथा विभिन्न काममा रहेका नेपालीलाई स्वदेश फर्काउने सन्दर्भमा खरिपाटीस्थित नेपाल विद्युत् प्राधिकरणको तालीम केन्द्रमा निर्माण गरेको क्वारेन्टाइनमा संक्रमण फैलन नदिन उच्च सतर्कता अपनाइएको शुक्रराज ट्रपिकल तथा सरुवा रोग अस्पताल टेकुका निर्देशक डाक्टर वासुदेव पाण्डेले बताए ।
स्वास्थ्य मन्त्रालय, गृह, रक्षा, परराष्ट्र, शहरी विकास र संस्कृति, पर्यटन तथा नागरिक उड्डयन मन्त्रालयको साथै नेपाली सेना, नेपाल प्रहरी, सशस्त्र प्रहरीको समन्वयमा काम भइरहेको उहाँले बताए । चीनबाट ल्याइने नेपालीमा भाइरसको संक्रमण नहुने दाबी गर्दै उनले अन्तर्राष्ट्रय मान्यताअनुसार क्वारेन्टाइनमा राख्नुपर्ने भएकाले यस्तो व्यवस्था गरिएको बताएका छन् ।
चीनको हुवेई प्रान्तमा रहेका नेपालीलाई लिन जाने प्राविधिक टोली, प्लेनका पाइलट, को–पाइलट, एयर होस्टेजलगायतलाई भने नगरकोटको खानेपानी तालीम केन्द्रमा राखिने भएको उनले बताए । क्वारेन्टाइनमा उपयोग गरिने तालीम केन्द्रका भवन, कोठा, प्रयोग गरिएका सामानको उचित संक्रमण रोकथाम व्यवस्था गरिएको शुक्रराज ट्रपिकल तथा सरुवा रोग अस्पताल डा. फडिन्द्रप्रसाद बरालले बताए ।
क्वारेन्टाइनमा रहेका विद्यार्थीको नियमित स्वास्थ्य जाँच गरिने र कसैलाई रोग लागेको शंका हुनासाथ उपचारका लागि अस्पतालमा आइसोलेसनमा राख्ने व्यवस्था गरिएको बताइएको छ । डा. बरालले चीनमा स्वास्थ्यपरीक्षण गरेर संक्रमण नभएकालाई ल्याउने र एयरपोर्टमा पुनः स्वास्थ्य जाँच गरी त्यहाँबाट पाँचवटा बसमा हालेर खरिपाटीको क्वारेन्टाइनमा राखिने उनले जानकारी दिए ।
क्वारेनटाइनमा दुईवटा भवनमा पुरुष, एक वटा रातो भवनमा महिला र निर्देशकको क्वाटरमा एक जना डाक्टर र एकजना नर्सलाई राख्ने गरी व्यवस्था गरिएको उनले जानकारी दिए । प्रत्येक दिन क्वारेन्टाइनमा बस्नेको ज्वरो नाप गरिने र ज्वरो एवं रुघा लागेमा तत्कालै एम्बुलेन्समा हालेर टेकु अस्पताल लैजाने व्यवस्था गरिएको बताइएको छ ।
पत्रकार सम्मेलनमा नगरपालिकाका प्रमुख सोमप्रसाद मिश्रले सरकारसँग प्राधिकरणको खेर गएको एउटा भवन वा जग्गा नगरपालिकाको भवन निर्माणलाई दिन वा मानव अंग प्रत्यारोपण केन्द्रको डायलेसिस केन्द्र बनाउन दिन माग गर्दा नदिने तर जोखिम भएका व्यक्तिलाई राख्न भने यही ठाउँ रोज्नु गलत भएको बताए ।
