- २२ पुसका लागि डाकिएको केन्द्रीय समिति बैठक स्थगित गरी २८ पुसमा बोलाइयो
- उक्त बैठक फेरि स्थगित गरी १५ माघका लागि सारियो ।
-१२ माघमा अर्को सूचना जारी गर्दै बैठक अनिश्चितकालका लागि स्थगित
- महामन्त्री गगन थापाले वैशाख मसान्तमा केन्द्रीय समिति बैठक बस्ने भने पनि आजसम्म छैन बैठकको निम्तो
- विधानमै नभएको नीति अधिवेशनको मागपछि कांग्रेस दुई धारमा विभाजित
काठमाडौं– नेपाली कांग्रेसका नेताहरुले जोडतोडका साथ नीति अधिवेशनको माग गरिरहेका छन् । उपनिर्वाचनमा तनहुँ–१ गुमाएपछि कांग्रेसभित्र नीति महाधिवेशनको माग उठेको हो ।
शनिबारमात्रै कांग्रेस केन्द्रीय सदस्य डा. शेखर कोइरालाले इटहरी पुगेर नीति अधिवेशनबारे धारणा राखे । ‘कांग्रेसको नीति अधिवेशन हुँदै छ । केन्द्रदेखि गाउँसम्म श्रमिकको मुद्दा पु¥याउँछौ,’ नेपाल ट्रेड युनियन कंग्रेस कोशी प्रदेशको सातौं अधिवेशनलाई सम्बोधन गर्दै कोइरालाले भने ।त्यसो त नीति अधिवेशनबारे गत असारको केन्द्रीय समिति बैठकमा डा. कोइरालाले पार्टीमा सभापति शेरबहादुर देउवा हाबी भएको आरोप लगाएका थिए । सोही बैठकमा उनले नीति अधिवेशनको माग गरेका थिए । कांग्रेस नेता प्रकाशनमान सिंहले पनि दोलखा र रामेछाप पुग्दा नीति अधिवेशनको माग गरे ।
उनले तत्कालै नीति अधिवेशन गरेर बदलिएको परिस्थितिमा कसरी जान उपयुक्त हुन्छ भन्ने गहन समीक्षासहित अबको बाटो तय गरिनुपर्ने धारणा राखे ।
कांग्रेसका दुई महामन्त्री गगन थापा र विश्वप्रकाश शर्माले पनि नीति अधिवेशनको माग गरिने बताएका छन् । महामन्त्री थापाले यही वैशाख १८ गते नयाँबानेश्वरमा आयोजना गरिएको श्रमिक सभामा बोल्दै नीति अधिवेशनको माग गरिने बताएका थिए ।
‘वैशाख मसान्तमा गर्ने केन्द्रीय समिति बैठकबाट नीति अधिवेशनको मिति तय गर्छ । यो नीति महाधिवेशन नेपाली कांग्रेसको जीवनमा महŒवपूर्ण घटनाका रुपमा रहनेछ,’ महामन्त्री थापाले भनेका थिए । अर्का महामन्त्री शर्माले पनि वैशाख अन्तिममा बस्ने केन्द्रीय समितिले नीति अधिवेशनको मिति तय गरिने बताएका थिए ।
छैन केन्द्रीय समितिको टु्ंगो
गत भदौ ५ यता कांग्रेस केन्द्रीय कार्यसमितिको बैठक बस्न सकेको छैन । कांग्रेस नेता एवं समाजवादी चिन्तक डा. प्रदीप गिरीको निधनपछि उक्त दिन कांग्रेसले आकस्मिक केन्द्रीय कार्यसमिति बैठक डाकेको थियो । बैठक नेता गिरीको निधनप्रति श्रद्धाञ्जली दिन केन्द्रित थियो । त्यसपछि निर्वाचन लाग्यो । निर्वाचनका विषयमा कांग्रेसले केन्द्रीय कार्यसम्पादन समिति र पदाधिकारी बैठकबाट नै विविध विषयमा निर्णय ग¥यो ।
निर्वाचनपछि पुस २२ गतेका लागि डाकिएको केन्द्रीय समिति स्थगित गरी पुस २८ गतेका लागि बोलाइयो । उक्त दिनका लागि डाकिएको बैठक फेरि स्थगित गरी माघ १५ गतेका लागि सारियो । माघ १२ गते अर्को सूचना जारी गर्दै कांग्रेसले केन्द्रीय समितिको बैठक अनिश्चितकालका लागि स्थगित गर्यो । यही बैठक वैशाख अन्तिमतिर बस्ने महामन्त्री थापाको भनाइ थियो ।
तर, वैशाखको अन्तिम दिन आज । केन्द्रीय समिति बैठकको टुंगो अझै नलागेको केन्द्रीय सदस्य नैनसिंह महरले बताए । ‘केन्द्रीय समिति केही दिनमा बोलाउने भन्ने कुरा छ । त्यसमा नीति अधिवेशनको कुरा छलफल होला, तर कहिले होला भन्ने टुंगो छैन,’ उनले प्रभावसँग भने ।केन्द्रीय समितिको निम्तो शनिबार साँझसम्म नआएको कांग्रेसका अर्का केन्द्रीय सदस्य मधु आचार्यले बताए । ‘अहिलेसम्म कुनै निम्तो आएको छैन,’ उनले प्रभावसँग टेलिफोनमा कुरा गर्दै भने ।
उनका अनुसार पछिल्लो केन्द्रीय समितिको बैठकले अब बस्ने बैठकमा नीति अधिवेशनसम्बन्धी बुँदा प्रस्तुत गर्नका दुई जना महामन्त्रीलाई जिम्मा दिने निर्णय गरेको थियो । ‘प्रारुप के हुने ? कांग्रेसको विधानमा नीति अधिवेशनको व्यवस्था छैन । पार्टीको महाधिवेशनमा नीतिको कुरा गर्ने र नेता चयन गर्ने दुवै गर्नुपर्ने हो । संविधानले दिएको विशेषाधिकार प्रयोग गरेर केन्द्रीय महाधिवेशन भयो ।
महाधिवेशन सकेर छ महिना नाघ्दा पनि नीति अधिवेशन नगरेपछि यसबारे प्रश्न उठ्यो,’ आचार्यले भने, ‘विधानमा ठ्याक्कै कसरी गर्ने त अधिवेशन, प्रक्रिया के हुने भन्ने विषयमा नतोकिएकोले दुई महामन्त्रीलाई प्रारुप दिन लगाउने भन्ने कुरा थियो । त्यसपछि त मिटिङ नै बस्न सकेको छैन ।’१७ महिनाअघि भएको १४औं महाधिवेशनमा विविध कारण देखाउँदै कांग्रेसले नीति तय गर्न सकेन । त्यतिबेला महाधिवेशन नेतृत्व चयनमा केन्द्रित भयो । आउने नयाँ कार्यसमितिले नीति अधिवेशन गर्ने गरी नेताहरु सहमतिमा पुगेका थिए । देउवाको नेतृत्वमा नयाँ कार्यसमिति आयो । देउवाको पहिलो कार्यकालजस्तै कांग्रेस फेरि सुस्ताउन थालेको छ ।
देउवा सरकारमा छँदै गठबन्धनमा निर्वाचनमा गएको कांग्रेसले नतिजा ९२ क्षेत्रमा उम्मेदवार उठाउँदा ५७ मा मात्र जित निकाल्यो । यो जितलाई कांग्रेसले ठूलै सफलता मान्यो । किनकि, अघिल्लो निर्वाचनमा कांग्रेसले २३ सिट मुस्किलले जितेको थियो । निर्वाचनमा जितेपछि ढुक्कले सरकारको नेतृत्व ताकेको कांग्रेसले केन्द्रीय समिति भने ‘फ्रिज’मा राखेको छ ।
पछिल्लोपटक कांग्रेस केन्द्रीय सदस्यसमेत रहेका पूर्वगृहमन्त्री बालकृष्ण खाण पक्राउपछि कांग्रेस पदाधिकारी बैठकमै सीमित बनेको छ । कांग्रेस अहिले सरकारमा सहभागी भएका कारण पनि पार्टीको काममा सुस्त हुन थालेको बताइन्छ । कांग्रेसबाट सरकारमा नौ जना सहभागी छन् । पार्टीका उपसभाति पूर्णबहादुर खड्का र प्रवक्ता डा. प्रकाशशरण महतले महŒवपूर्ण मन्त्रालय सम्हालेयता पार्टीको गतिविधि ठप्प भएको बताइन्छ ।
-1745656903.jpeg)