काठमाडौं– प्रधानमन्त्री केपी शर्मा ओलीले सरकार तथा निजी क्षेत्रको साझा प्रयासले मात्र मुलुक समृद्धि हुने बताएका छन् । मंगलबार उद्योग वाणिज्य तथा आपूर्ति मन्त्रालयद्वारा राजधानीमा आयोजित कार्यक्रममा यस्तो बताएका हुन् ।
‘महत्वपूर्ण व्यावसायिक व्यक्ति’ सम्मान एवं सुशोभन कार्यक्रमलाई सम्बोधन गर्दै प्रधानमन्त्री ओलीले भने, ‘सरकार निजी क्षेत्रसँग सहकार्य गर्न तयार छ ।’ उनले निजी क्षेत्रको अप्ठ्यारा र असुविधा सम्बोधन गर्न सरकार तयार रहेको समेत बताए ।
निर्यात व्यापारमा देखिएका समस्या समाधान गर्न सरकारले पहलकदमी लिएको उदाहरण दिँदै उनले केही समयअघि सुपारी, अदुवा तथा पाम आयलको निर्यातमा समस्या भएको भन्दै अहिले समस्या समाधान भएको दावी गरे । उनले भने, ‘निर्यातका विभिन्न क्षेत्रमा सरकारले सहजीकरण गरिरहेको छ ।’ साथै, उत्पादन वृद्धि, रोजगारी सिर्जना तथा आयात प्रतिस्थापन र निर्यात अभिवृद्धिमा लाग्न निजी क्षेत्रलाई आग्रह गर्दै प्रधानमन्त्री ओलीले सरकारका तर्फबाट निजी क्षेत्रलाई पूर्णरूपमा साथ रहने विश्वास दिलाए । ‘ढुक्क हुनुहोस्, विश्वस्त भएर काम गर्नुहोस्’ उनले भने, ‘यदि कुनै अप्ठ्यारो आए मलाई भन्नुहोस् ।’
राजनीति परिवर्तनपछि मुलुक आर्थिक समृद्धिको चरणमा रहेको उल्लेख गर्दै प्रधानमन्त्री ओलीले अबका प्रयास सुशासन र आर्थिक विकासमा केन्द्रित हुने बताए । उनले भने, ‘अब हामी नयाँ मार्गमा उत्साहित भएका छौँ, सिंगो देश विकासको काममा नलागी सुशासन र विकास सम्भव छैन । विकास र समृद्धिका लागि निजी क्षेत्रको सामूहिक सहयोगको खाँचो छ, सुशासन र देश विकासमा हाम्रो सामूहिक प्रयास लगाउनुपर्छ ।’
विकास र समृद्धिको मामिलामा सरकार र निजी क्षेत्रको समान धारणा रहेको उल्लेख गर्दै प्रधानमन्त्रीले अब सुशासनमा पनि एक मत हुनुपर्ने बताए । उनले सुशासन विकास र समृद्धिको बाधक नभएको प्रष्ट्याउँदै पारदर्शिता, स्वच्छता र कानूनको परिपालना गर्न निजी क्षेत्रलाई आग्रह गरेका छन् ।
निजी क्षेत्रलाई लगानीमा सहजीकरण गर्न सरकारले विभिन्न प्रयास अगाडि बढाएको जानकारी दिँदै प्रधानमन्त्रीले लगानीको वातावरण बनाइएको बताए । एकल विन्दु सेवा स्थापना गरिएको बताउँदै उनले लगानीको वातावरण बनाइएको र बैंक, वित्तीय संस्था र उद्योगीका बीमा उचित र सन्तुलित सम्बन्ध होस् भन्ने सरकारले चाहेको बताए ।
सोही अवसरमा उद्योग, वाणिज्य तथा आपूर्ति राज्यमन्त्री मोतिलाल दुगडले मुलुकको आर्थिक समृद्धिमा निजी क्षेत्रको महत्वपूर्ण भूमिका रहेको उल्लेख गरे । उनले सिआइपी सम्मानबाट निजी क्षेत्रको मनोबल बढेको बताए ।
मुलुकका लगानीको वातावरण बनाउन सरकार सदैव क्रियाशील रहेको बताउँदै भने, ‘राज्य सधैँ व्यवासयीको साथमा छ, हामी व्यापार–व्यवसाय गर्न कुनै व्यवधान आउन दिदैनौँ ।’ कार्यक्रममा उद्योग, वाणिज्य तथा आपूर्ति मन्त्रालयका सचिव डा. बैकुण्ठ अर्यालले सम्मानबाट मुलुकको अर्थतन्त्रको विकासमा लाग्न व्यवसायीलाई प्रोत्साहन मिल्ने विश्वास व्यक्त गरे ।
