काठमाडौं– सरकारले नेपाल प्रहरीको महानिरीक्षक (आइजीपी)मा ठाकुरप्रसाद ज्ञवालीलाई नियुक्त गरेको छ । प्रधानमन्त्री निवास बालुवाटारमा मंगलबार बसेको मन्त्रिपरिषद् बैठकले ज्ञवालीलाई प्रहरी महानिरीक्षकमा नियुक्त गरेको हो ।
नियुक्तिसँगै ज्ञवाली नेपाल प्रहरीको २७औँ महानिरीक्षक बनेका छन् । प्रहरी नायब महानिरीक्षक (डिआइजी)का रूपमा रहेका ज्ञवाली प्रदेश नं १ का प्रहरी प्रमुख थिए । उनको कार्यकाल पाँच महिनाको मात्र हुनेछ ।
हालका प्रहरी महानिरीक्षक सर्वेन्द्र खनालले मंगलबारदेखि ३० वर्षे सेवा अवधिका कारण अनिवार्य अवकास लिएका छन् । त्यससँगै सरकारले ज्ञवालीलाई प्रहरी महानिरिक्षकमा बढुवा गरेको हो । तीनै जना प्रहरी अतिरिक्त महानिरीक्षकले समेत मंगलबार नै अनिवार्य अवकाश लिएका छन् । ज्ञवाली विसं २०७५ असोजमा प्रहरी नायब महानिरीक्षकमा बढुवा भएका थिए । खनाल मंगलबार नै प्रहरी प्रधान कार्यालयबाट बिदाइ भएका छन् ।
नवनियुक्त आइजी ज्ञवालीको स्वागत गर्न आज बुधबार प्रहरी प्रधान कार्यालयले कार्यक्रम राखेको छ । प्रहरी नियमावली २०७२ मा प्रहरी अतिरिक्त महानिरीक्षक (एआइजी) नभएको खण्डमा डिआइजीलाई प्रहरी महानिरीक्षकमा बढुवा गर्न सकिने प्रावधान छ ।
नियमावलीमा प्रहरी नायब महानिरीक्षकमध्येबाट ज्येष्ठता, कार्यकुशलता, कार्यक्षमता, उत्तरदायित्व बहन गर्नसक्ने क्षमता, नेतृत्व प्रदान गर्नसक्ने कुशलता तथा आफूभन्दा मुनिको प्रहरीलाई प्रोत्साहन र परिचालन गर्नसक्ने सामथ्र्यका आधारमा नेपाल सरकारले उपयुक्त देखेको उम्मेदवारलाई प्रहरी महानिरीक्षक पदमा बढुवा गर्न सकिने उल्लेख छ ।
मंगलबार रातिदेखि लागू हुने गरी प्रहरी महानिरीक्षक खनालसहित प्रहरी अतिरिक्त महानिरीक्षक (एआइजी) पुष्कर कार्की, ठुले राई र धिरु बस्न्यातको अनिवार्य अवकाश भएको छ । उनीहरूसँगै १८ प्रहरी नायब महानिरीक्षक (डिआइजी)सहित मंगलबार २२ जनाको अवकाश भएको प्रहरीका प्रवक्ता प्रहरी नायब महानिरीक्षक शैलेश थापा क्षेत्रीले जानकारी दिए ।
अवकाश पाएका डिआइजीमा राजेन्द्रमान श्रेष्ठ, मनोज न्यौपाने, सुरेशविक्रम शाह, केदार रिजाल, शेरबहादुर बस्न्यात, पीताम्बर अधिकारी, दीपककुमार थापा, दिनेश अमात्य, नारायणसिंह खड्का, कमल जिटी, महेन्द्रकुमार पोखरेल, दानसिंह बोहरा, रामप्रसाद श्रेष्ठ, सुरज केसी, विनोद शर्मा घिमिरे, विकास श्रेष्ठ, पूर्णचन्द्र जोशी र हरिभक्त प्रजापति छन् । नवनियुक्त ज्ञवाली २०४७ साल २५ असारमा प्रहरी निरीक्षकबाट सेवा प्रवेश गरेका थिए ।
