काठमाडौं– पूर्वसचिव अर्जुन कार्कीकी पत्नी मुना कार्कीको सोमबार हत्या भएको छ । उक्त घटनालाई रहस्यमय भनिए पनि कामदारकै संलग्नता रहेको प्रहरीको प्रारम्भिक अनुसन्धानबाट देखिएको छ ।
ललितपुर सानेपास्थित आफ्नै निवासमा मुनाको हत्या भएको थियो । सो हत्यामा उनकै कामदार विजय चौधरीले प्लाष्टिकको पिर्काले हिर्काएर हत्या गरेपछि चौधरीले आत्महत्या गरेको प्रहरीको भनाइ छ ।
कार्कीका घरभित्र राखिएको सीसीटीभीलेसमेत उक्त दृश्य कैद गरेपछि प्रहरी उक्त निस्कर्षमा पुगेको हो । ‘बिहान ९ बजेतिर विजयले मुनालाई पिर्काले हिर्काई भुइँमा लडाएको देखिन्छ,’ अनुसन्धानमा संलग्न एक प्रहरी अधिकृतले भने, ‘भुइँमा मुना लडेपछि कपाल समातेर टाउको बजारेको देखिन्छ । विजयले नै हत्या गरेको योभन्दा अरु प्रमाण हुन सक्दैन ।’ तर, विजय र मुनाबीच के कुराको खटपट थियो भन्नेमा प्रहरीले केही खुलाएको छैन ।
मुनाको हत्या नै भएको प्रहरीको प्रारम्भिक निष्कर्ष छ । प्रहरी प्रधान कार्यालयका एक प्रहरी अधिकृतका अनुसार उनको हत्या भएको आशंकामा घरको सिसीटिभी फुटेजलगायत अन्य प्रमाणको अनुसन्धान भइरहेको जनाएको छ । आफ्नै घरको भान्सा कोठामा बिहान अचेत अवस्थामा भेटिएकी कार्कीको उपचारका क्रममा स्टार अस्पतालमा मृत्यु भएको थियो । उनको टाउकामा लागेको गम्भीर चोटका कारण निधन भएको बताइको छ । चिकित्सकका अनुसार घाँटी र हातमा समेत नीलडाम भेटिएको छ । घटनाका समयमा पूर्वसचिव कार्की ‘मर्निङवाक’मा निस्किएका थिए ।
प्रारम्भिक अनुसन्धानमा उनको हत्यामा स्वयं चौधरीको संलग्नता देखिएको प्रहरीले जनएको छ । घटना घटाएर उनले आत्महत्या गरेको अनुमान छ । तर प्रहरीले घटनाको औपचारिक जानकारी गराएको छैन ।
नेपाल प्रहरीका प्रवक्ता प्रहरी नायब महानिरीक्षक शैलेश थापा क्षेत्रीले घटनाको अनुसन्धान भइरहेकाले त्यसको प्रतिवेदनका आधारमा मात्रै यकिन कारण भन्न सकिने जनाए । महानगरीय प्रहरी परिसर ललितपुरका प्रहरी उपरीक्षक दुर्गा कार्कीले दुवै शव परीक्षणका लागि पाटन अस्पतालमा पठाइएको र सिसी क्यामेराको फुटेजलगायत अन्य प्रमाण संकलन गरेर फोरेन्सिक ल्याबमा परीक्षण भइरहेको जानकारी दिए ।
मृतकका पति कार्कीले आफन्त र प्रहरीसँग बताएअनुसार उनी पशुपतिनाथ मन्दिर गएर फर्किएपछि यो घटना भएको थाहा पाएका थिए । दुई छोरी र एक छोराकी आमा मुनाको हत्या के कारणले गरियो भन्नेबारे प्रहरीले अनुसन्धान अगाडि बढाएको छ । अर्जुनले बताएअनुसार मुना अचेत अवस्थामा लडिरहेकी थिइन् । उनले तत्काल प्रहरीमा खबर गरेपछि घटनास्थलमा प्रहरी पुगेर मुनालाई उपचारार्थ सानेपास्थित स्टार हस्पिटल पुर्याइएको थियो । तर, मुनाको मृत्यु भएको थियो ।
प्रहरी घटनास्थलमा पुग्दा मुना भान्सा कोठामा रगताम्य भएर लडिरहेकी थिइन् भने कामदार विजय नाइलनको डोरीले पासो लगाएको अवस्थामा डाइनिङ टेबलमा लडिरहेका थिए । प्रहरी पुग्दाको अवस्था र अर्जुनले प्रहरीमा दिएको जानकारी दुरुस्त मिले पनि मुनाको हत्या र विजयको आत्महत्याको प्रसंग खुल्न सकेको छैन ।
