काठमाडौं– वैदेशिक रोजगार विभागले वैदेशिक रोजगारको क्षेत्रमा हुने ठगी तथा अनियमितता नियन्त्रणका लागि तीनवटा अनुगमन समिति गठन गरेको छ । वैदेशिक रोजगारीको सिलसिलामा हुने ठगीका घटनाहरु बढिरहेको भन्दै विभागले यसको नियन्त्रणका लागि निर्देशकहरुको संयोजकत्वमा तीन छुट्टा–छुट्टै समिति गठन गरेको हो ।
विभागले बुधबार एक विज्ञप्ति जारी गर्दै अनुगमन कार्यलाई व्यवस्थित र नियमित बनाउन टोलीलाई आकस्मिकरुपमा परिचालन गरी ठगी र अनियमितलाई न्यूनीकरण गर्दै शून्यमा पु¥याउने लक्ष्यका साथ समिति गठन गरिएको जानकारी दिएको छ । विभागले वैदेशिक रोजगार ऐन, २०६४ को उद्देश्यअनुरुप इजाजतपत्रवाला संस्थाको नियमनकारी निकायको रुपमा कार्य गरी वैदेशिक रोजगार व्यवसायलाई सुरक्षित, व्यवस्थित र मर्यादित बनाई वैदेशिक रोजगारीमा जाने कामदार र व्यवसायीको हितको संरक्षण गर्नुपर्ने दायित्वसमेत रहेको उल्लेख गरेको छ ।
अनुगमन समितिले विशेषतः म्यानपावर कम्पनी, अभिमुखीकरण तालिम प्रदायकलगायतका वैदेशिक रोजगारको गतिविधिमा प्रत्यक्ष जोडिएका संस्थाहरुको आकस्मिक तथा नियमित अनुगमन गर्नेछ । अनुगमनमा खटिएको टोलीलाई आवश्यक कागजात, विवरण र जानकारीहरु उपलब्ध गराई अनुगमन कार्यलाई प्रभावकारी बनाउन सम्बन्धित सरोकारवालाहरुलाई विभागले आग्रहसमेत गरेको छ । विभागले गरेको यस निर्णयबाट ठगी तथा अनियमितता नियन्त्रणको कार्यलाई अझ बढी नतिजामुखी बनाउन मद्दत पुग्ने विश्वास लिएको छ ।
वैदेशिक रोजगार व्यवसायलाई सुरक्षित, व्यवस्थित र मर्यादित बनाउन विभागबाट भैरहेको अनुगमन कार्यलाई थप प्रभावकारी कार्यान्वयनका लागि अनुगमन समिति बढाइएको विभागले जनाएको छ । पछिल्लो समय वैदेशिक रोजगारीमा हुने ठगी तथा अनियमितताको विषय सञ्चारमाध्यममा आउनुका साथै विभागमासमेत गुनासो, उजुरी, मुद्दाको जाहेरीको संख्या दिन प्रतिदिन बढ्दै गएको विभागका निर्देशक एवं सूचना अधिकारी कृष्णप्रसाद भुसालले बताए । ‘वैदेशिक रोजगारीलाई सुरक्षित, व्यवस्थित र मर्यादित बनाउन विभागले नियमित अनुगमनलाई थप प्रभावकारी बनाउन जरुरी भएकोले समिति बनाइएको हो,’ उनले भने ।
