काठमाडौं - पुष्पकमल दाहाल नेतृत्वको मन्त्रीमण्डल आज विस्तार हुने भएको छ । सत्ता गठबन्धनमा मन्त्रालय भागबण्डामा सहमति जुटेपछि प्रधानमन्त्री दाहालले आज मन्त्रिपरिषद् विस्तार गर्ने भएका हुन् । ६ चैतमा विश्वासको मत लिँदै गर्दा दुई/तीन दिनमा मन्त्रिपरिषद् विस्तार हुने बताएका उनले एक सातापछि मात्रै विस्तार गर्न लागेका हुन् ।
कसको भागमा कति मन्त्रालय
कांग्रेस: ८
माओवादी :५
जसपा र नेकपा एस : २/२
जनमत : मन्त्री १, राज्यमन्त्री १
लोसपा, नाउपा, आजपा र नेसपा : १/१ मन्त्री
दश दलीय गठबन्धनको मुख्य दल नेपाली कांग्रेसले आठ मन्त्रालय लिने टुंगो लागेको छ । यसअघि प्रधानमन्त्री दाहाल नेतृत्वको सरकारमा नेकपा एमालेले त्यति नै संख्यामा मन्त्रालय लिएको थियो । बुधबार साँझ प्रधानमन्त्रीको सरकारी निवास बालुवाटारमा बसेको बैठकमा कांग्रेसले आठ मन्त्रालय लिनेगरी गठबन्धन दलका नेताहरूबीच समझदारी भएको जनता समाजवादी पार्टी (जसपा) नेपालका सहअध्यक्ष राजेन्द्र श्रेष्ठले बताए ।
उनका अनुसार प्रधानमन्त्री दाहालको दल नेकपा माओवादी केन्द्रले पाँच, जसपा र नेकपा एकीकृत समाजवादी (एस)ले दुई÷दुईवटा मन्त्रालय लिने टुंगो लागेको छ । जनमत पार्टीले एक मन्त्री र एक राज्यमन्त्री पाउने भएको छ ।
समाजवादी पार्टी (लोसपा), नागरिक उन्मुक्ति पार्टीसँगै डा. बाबुराम भट्टराई नेतृत्वको नेपाल समाजवादी पार्टी र प्रभु साह नेतृत्वको आम जनता पार्टी पनि एक/एक मन्त्रालय लिएर सरकारमा जाने भएका छन् । राष्ट्रिय स्वतन्त्र पार्टी (रास्वपा) भने तत्काल सरकारबाहिर रहने भएको छ ।
गठबन्धन दलहरूबीच मन्त्रिपरिषद्मा भागबण्डाबारे तीन दिनदेखि बालुवाटारमा छलफल भएको थियो । बुधबार साँझ भने भागबण्डा टुंगो लागेको प्रधानमन्त्रीका राजनीतिक सल्लाहकार हरिबोल गजुरेलले बताए । ‘प्रधानमन्त्रीले मन्त्रिपरिषद् विस्तार पहिले नै चाहनुभएको थियो । अलि ढिला भयो तर मन्त्रालयको भागबण्डा टुंगियो,’ उनले प्रभावसँग भने ।
गठबन्धनको एउटा दल एकीकृत समाजवादीले पार्टी उपाध्यक्ष डा. बेदुराम भुसाल र उपमहासचिव प्रकाश ज्वालालाई मन्त्री बनाउने निर्णय गरेको छ । भुसाल राष्ट्रियसभा र ज्वाला प्रतिनिधिसभा सदस्य हुन् । ज्वालाले भौतिक पूर्वाधार तथा यातायात मन्त्रालय पाउने निश्चित भएको बताइएको छ । भुसालले पनि शिक्षा, श्रम वा ऊर्जामध्ये एक मन्त्रालय लिने चर्चा भइरहेको छ ।
गठबन्धनको ठूलो दल कांग्रेसले उपसभापति पूर्णबहादुर खड्काको नेतृत्वमा सकारमा पठाउने तयारी गरेको छ । पार्टीका अर्का उपसभापति धनराज गुरुङ, प्रवक्ता डा. प्रकाशशरण महत, सीता गुरुङ, दीपक खड्कालगायत मन्त्री हुने करिब टुंगो लागेको सहमहामन्त्री भीष्मराज आङ्देम्बेले बताए । उनका अनुसार केही मन्त्री हुनेहरूको नामबारे छलफल भइरहेको छ ।
‘उपसभापतिद्वय, प्रवक्ताजीसँगै सीता गुरुङ र दीपक खड्का मन्त्री हुने निश्चितजस्तै हुनुभएको छ,’ उनले भने, ‘मन्त्री हुन चाहनेहरू थुप्रै छन्, सम्भावित नामबारे छलफल चलिरहेको छ ।’माओवादीबाट हाल चार जना मन्त्री र एक जना राज्यमन्त्री छन् ।
बुधबार साँझको बैठकले माओवादीले पाँच मन्त्रालय पाउने निर्णय गरेका कारण अब माओवादीबाट राज्यमन्त्री नभई मन्त्री नै हुने भएको छ । मन्त्री प्रधानमन्त्री दाहालले नै छान्ने भएका छन् ।
जसपाबाट भने अशोककुमार राई, राजकिशोर यादव, प्रदीप यादवलगायतलाई सम्भावित मन्त्रीको रूपमा हेरिएको छ । स्रोतका अनुसार राई सरकारमा गए उपप्रधानसहित कुनै मन्त्री हुनेछन् ।
जनमतबाट हाल अब्दुल खान मन्त्री छन् । उक्त पार्टीले राज्यमन्त्रीमा कसलाई पठाउने भन्ने टुंगो लागेको छैन । लोसपाबाट अध्यक्ष महन्थ ठाकुर, शरदसिंह भण्डारी, सर्वेन्द्रनाथ शुक्ला र रामप्रकाश चौधरीमध्ये एक जना सरकारमा जाने छन् ।
नागरिक उन्मुक्तिबाट भने अध्यक्ष रञ्जिता श्रेष्ठ चौधरी नै सरकारमा जाने भएकी छन् । तर, उनले जेलमा रहेका आफ्ना श्रीमान् रेशमलाल चौधरीको रिहापछि मात्रै सरकारमा जाने भन्दै आएकी छन् ।
डा. बाबुराम भट्टराई नेतृत्वको दलबाट महेन्द्रराय यादव र आम जनता पार्टीबाट प्रभु साह मन्त्री बन्ने निश्चित भएका छन् । तर, दलहरूले पाउने मन्त्रालयहरूबारे भने टुंगो लाग्न बाँकी छ । आजै बिहान प्रधानमन्त्री दाहालले दलहरू छलफल गरेर मन्त्रालयबारे प्रस्ताव ल्याउने तयारी गरेका छन् । प्रस्तावमाथि छलफल गरेपछि मन्त्रालय टुंगो लाग्ने प्रधानमन्त्रीका राजनीतिक सल्लाहकार गजुरेलले बताए ।
कांग्रेसले अर्थ, गृह, परराष्ट्रलगायतका मन्त्रालयमा दाबी प्रस्तुत गर्दै आएको छ । तर, प्रधानमन्त्री दाहालले नै गृह राख्ने अडान लिँदै आएका छन् । जसपा, नेकपा एस, जनमत, लोसपा, नाउपासहितका दलहरूले पनि बढी बजेट भएका र शक्तिशाली मन्त्रालय लिन चाहेका छन् । यद्यपि, कुन–कुन मन्त्रालय लिन्छन् भन्ने टुंगो आजै लाग्नेछ ।
