काठमाडौं - नेपाल वैदेशिक रोजगार व्यवसायी संघको अध्यक्षमा राजेन्द्र भण्डारी निर्वाचित भएका छन् । संघको शुक्रबार सम्पन्न २९औं साधारणसभाले भण्डारीको नेतृत्वमा नयाँ कार्यसमिति चयन गरेको हो ।नयाँ नेतृत्व चयनका लागि भएको निर्वाचनमा तीन जना प्रतिस्पर्धीलाई हराउँदै प्रगतिशील व्यावसायिक समूहका भण्डारी निर्वाचित भएका हुन् ।
अरोरा ह्युमन रिसोर्सका सञ्चालक एवं प्रगतिशील वैदेशिक रोजगार व्यवसायी मञ्चका अध्यक्षसमेत रहेका भण्डारीले १९९ मत प्राप्त गरी विजयी हुँदा उनका प्रतिस्पर्धी नेपाल लोकतान्त्रिक वैदेशिक रोजगार व्यवसायी एसोसियसनका आधिकारिक अध्यक्षका उम्मेदवार कुमुद खनालले १५७ मत पाए ।
त्यस्तै एसोसियसनबाट विद्रोह गरी अध्यक्षमा उम्मेदवारी दिएका भुवनसिं गुरुङले १३१ मत पाए भने वैदेशिक रोजगार व्यवसायी गणतान्त्रिक मञ्च र एकीकृत वैदेशिक रोजगार व्यवसायी संगठन साझा उम्मेदवार डा. ईश्वर जिसीले ११८ मत पाए ।
यस्तै संघको प्रथम उपाध्यक्षमा डिकबहादुर खत्री (कुमार) निर्वाचित भएका छन् । उनले २५३ मत पाएका छन् । उनका प्रतिस्पर्धी तोकतान्त्रिक एसोसियसनका किशोर केसीले १९६, धनलाल जैसीले १४२ र सुरजकुमार घुण्डेले १५ मत पाएका छन् । त्यसैगरी द्वितीय उपाध्यक्षमा सञ्जु गुरूङ २६३ मत ल्याई निर्वाचित भएकी छन् । उनका प्रतिद्वन्द्वी भुवनसिंह गुरूङ प्यानलका महमद जवाहरदिन मियाँले १२२, लोकतान्त्रिक प्यानलका अख्तर हुसेनले १०२ र जिसी प्यानलका बाबुराम खड्काले ९६ मत पाएका छन् ।
यसैगरी तृतीय उपाध्यक्ष रोशन कटुवाल १९२ मतले विजयी भएका छन् । उनका प्रतिस्पर्धी लोकतान्त्रिकका सञ्जय पनेरुले १५७, भुवनसिं प्यानलबाट मोहनकुमार ढुंगेलले १२३ र जिसी प्यानलबाट अनिल बोगटीले १२६ मत प्राप्त गरे । उम्मेदवारी फिर्ता लिएका अम्बरबहादुर न्यौपानेले १३ मत पाएका छन् ।निर्वाचित तीनै जना उपाध्यक्ष प्रगतिशील समूहका उम्मेदवार हुन् ।
यस्तै कोषाध्यक्षमा पनि प्रगतिशीलकै उम्मेदवार सरिता घले निर्वाचित भएकी छन् । उनले २२८ मत पाउँदा तोकतान्त्रिक एसोसियसनबाट प्रतिस्पर्धी हिमा गुरूङले १४६, भुवनसिं प्यानलबाट हिरादेवी बुढाथोकीले १०२, केदारनाथ अधिकारी (दीपेन्द्र)ले १३७ र सरस्वती सुवेदीले दुई मत प्राप्त गरे ।महासचिव र सचिवमा लोकतान्त्रिक एसोसियसन प्यानलबाट मेघनाथ भुर्तेल र कर्णराज कटुवाल विजयी भए । महासचिवमा भुर्तेलले २६३ मत ल्याई निर्वाचित हुँदा उनका निकतम प्रतिस्पर्धी प्रगतिशीलका मिलन कट्टेलले १८३ र डा. जिसी प्यानलका मधुकर रिजालले १५६ मत पाए । सचिवमा कटुवाल २४१ मत ल्याई निर्वाचित हुँदा उनका निकतम प्रतिस्पर्धी प्रगतिशील समूहका राजेन्द्र अधिकारीले १४१, टक्करबहादुर पाख्रिनले ९४, गोमा गिरी क्षेत्री (अञ्जु)ले ४९ मत प्राप्त गरे ।
यसैगरी कार्यसमिति सदस्यमा राजेन्द्र बस्नेत २९१, विक्रम श्रेष्ठ २४६, देवमाया थापा २४५, बैकुण्ठप्रसाद पौडेल २३२, कैलाश पाठक २३०, देउमान नेम्वाङ २२४, आनन्द कोइराला २१८, नारायण भुसाल २१७, तोरणबहादुर कार्की २१२ र चन्द्रबहादुर लिम्बू २१० मत ल्याएर निर्वाचित भएका छन् ।
संघको १७ सदस्यीय कार्यसमितिमा नेकपा एमालेको शुभेच्छुक संस्था प्रगतिशील मञ्चले खडा गरेको प्रगतिशील व्यावसायिक प्यानलबाट उम्मेदवारी दिएका अध्यक्ष भण्डारीसहित तीन उपाध्यक्ष, कोषाध्यक्ष र चार सदस्य गरी नौ जना विजयी भएका छन् भने लोकतान्त्रिक एसोसियसनबाट महासचिव, सचिव र पाँच जना सदस्य निर्वाचित भए । डा. जिसीको प्यानलबाट भने एक जना सदस्य मात्रै निर्वाचित भए । भुवनसिंको प्यानल शून्य भएको छ ।
