नेपाल वैदेशिक रोजगार व्यवसायी संघको यो निर्वाचनमा हामी संयुक्त प्यानलसहित आएका छौं । वैदेशिक रोजगार व्यवसायी गणतान्त्रिक मञ्च र एकीकृत वैदेशिक रोजगार व्यवसायी संगठनको संयुक्त व्यावसायिक प्यानलको नेतृत्व डा. ईश्वर जिसीले गर्नुभएको छ । यसमा म महासचिवको उम्मेदवार बनेर अगाडि बढेको छु । हाम्रो टिममा यस क्षेत्रमा लामो समयदेखि क्रियाशील इमान्दार व्यवसायी साथीहरु विभिन्न पदमा उम्मेदवार भएर अगाडि बढ्नुभएको छ ।
हाम्रो प्यानलको स्पष्ट एजेण्डा छ । हामीले १६ बुँदामा हाम्रा योजना, प्रतिबद्धताहरु अघि सारेका छौं । यी योजना प्रतिबद्धता मात्रै होइन, यो निर्वाचनमार्फत संघको नेतृत्वमा हाम्रो टिम पुग्यौं भने हामीले अघि सारेका योजना, प्रतिबद्धताहरुलाई पूर्णरुपमा कार्यान्वयन गर्नेछौं । मुख्यतः हामी वैदेशिक रोजगार व्यवसायी संघलाई सबै व्यवसायीहरुको साझा संस्थाको रुपमा स्थापित गराउनेछौं । सबै व्यवसायीहरुको हितमा संघलाई क्रियाशील गराउने हाम्रो योजना छ । व्यवसायीका समस्याहरुलाई सम्बोधन गराउन राज्यलाई दबाब दिने कार्यमा संघलाई प्रभावकारी बनाउनेछौं ।
मैले विगतमा प्रगतिशील वैदेशिक रोजगार व्यवसायी मञ्चको उपाध्यक्ष भएर काम गरेको छ । हाल एकीकृत वैदेशिक रोजगार व्यवसायी संगठनको महासचिवको जिम्मेवारीमासमेत काम गरेको अनुभव छ । यी अनुभवलाई लिएर संघलाई नेतृत्व दिन म व्यक्तिगत रुपमा प्रतिबद्ध छु ।
हामी प्यानलका आधारमा वैदेशिक रोजगार क्षेत्रमा सुधारका लागि एजेण्डासहित आएका छौं । कानुनी रुपमा यो क्षेत्रमा धेरै सुधार गर्न आवश्यक छ । म आफैं पनि कानुनी पृष्ठभूमिबाट आएकाले कानुनी सुधारका लागि काम गर्नेछु । महासचिवको रुपमा संघलाई व्यवस्थित र संघका कार्यक्रमहरुलाई प्रभावकारी बनाएर लैजान प्रतिबद्ध भएर काम गर्नेछु । वैदेशिक रोजगार क्षेत्रमा रहेका विकृतिहरुको अन्त्य गर्दै यो क्षेत्रलाई मर्यादित बनाउन संघलाई क्रियाशील बनाउनेछौं ।
अहिले वैदेशिक रोजगार क्षेत्रलाई हेर्ने दृष्टिकोण सकारात्मक छैन । जबकि, मुलुकको अर्थतन्त्र यही क्षेत्रले धानेको छ । रेमिट्यान्स मुलुकको अर्थतन्त्रको प्रमुख स्रोत रहेको वर्तमान अवस्था छ । यस्तो महŒवपूर्ण क्षेत्रलाई हेर्ने आम दृष्टिकोण सकारात्मक हुनुपर्छ । त्यस्तो वातावरण बनाउन हाम्रो टिमले काम गर्नेछ । त्यो कुरा हामीले १६ बुँदे प्रतिबद्धतामै स्पष्ट पारेका छौं । ती प्रतिबद्धताका बुँदाहरुलाई अक्षरशः पालना गराउनेछौं ।
आम व्यवसायीहरुले हाम्रो एजेण्डालाई समर्थन जनाउनुभएको छ । पक्कै पनि निर्वाचनमासमेत त्यस्तै समर्थन जनाएर हाम्रो टिमलाई विजयी गराउनुहुनेछ भन्ने अपेक्षा र अनुरोध गर्न चाहन्छौं । वैदैशिक रोजगार व्यवसायी संघमा आमूल परिवर्तन ल्याउन तथा वैदेशिक रोजगार क्षेत्रलाई सम्मानित क्षेत्रका रुपमा स्थापित गराउन हाम्रो टिमबाहेककाले सम्भव छैन । त्यसैले डा. ईश्वर जिसी नेतृत्वको हाम्रो टिमलाई विजयी गराउनुहुन आम व्यवसायीहरुसमक्ष अपिल गर्दछु ।
