रोजगारीको अवसर सिर्जना गर्न नसकेको हाम्रो मुलुकको लागि वैदेशिक रोजगार निर्विकल्प बनेको कुरामा दुई मत छैन । वैदेशिक रोजगारीमा गएका श्रमिकहरुले पठाउने रेमिट्यान्सबाटै मुलुकको अर्थतन्त्र धानेको छ । यसमा वैदेशिक रोजगार व्यवसायीहरुको भूमिकालाई कसैले पनि अवमूल्यन गर्न मिल्दैन । विभिन्न देशमा रोजगारीको अवसर खोजी गरी नेपाली श्रमिकहरुलाई पठाएर मुलुकमा रेमिट्यान्स भित्र्याउन वैदेशिक रोजगार व्यवसायीहरु निरन्तर क्रियाशील रहँदै आउनुभएको छ ।
तर, वैदेशिक रोजगार व्यवसायीहरुको यो भूमिकालाई राज्यले पहिचान गर्न सकेको छैन । बरु उल्टै वैदेशिक रोजगार व्यवसायीहरुलाई विभिन्न ऐन कानुनमार्फत बाँध्ने काम भइरहेको छ । वैदेशिक रोजगार व्यवसायीहरुले विभिन्न कानुनी झण्झटहरु बेहोर्नुपर्ने बाध्यता रहेको छ ।यही वैदेशिक रोजगार क्षेत्रमा क्रियाशील व्यवसायीहरुको हक हितका लागि काम गर्ने साझा संस्थाको रुपमा नेपाल वैदेशिक रोजगार व्यवसायी संघ स्थापना भएको हो । सोही उद्देश्यमा केन्द्रित भएर संघले काम गर्न नसकेको व्यवसायीहरुको गुनासो छ । यही संघको आगामी कार्यकालको नेतृत्व लिनका लागि मैले अध्यक्ष पदमा आफ्नो उम्मेदवारी दिएको छु । मेरो नेतृत्वमा वैदेशिक रोजगार व्यवसायी गणतान्त्रिक मञ्च र एकीकृत वैदेशिक रोजगार व्यवसायी संगठनको संयुक्त व्यावसायिक प्यानल बनाएर हामी निर्वाचनमा होमिएका छौं ।
हाम्रो प्यानलको मुख्य एजेण्डा वैदेशिक रोजगार व्यवसायलाई सम्मानित पेसा बनाउने हो । अहिले जसरी यो क्षेत्रलाई हेर्ने गरिएको छ, त्यसलाई बदल्ने हाम्रो लक्ष्य छ । कतिपय अवस्थामा हामी व्यवसायीहरुकै कारण पनि भएका छन्, यसलाई नियन्त्रण गर्न जरुरी छ । अर्कोतर्फ आम व्यवसायीहरूको छाता संस्था जसरी चल्नुपर्ने थियो, त्यसरी चल्न सकेको छैन । विगत केही वर्षयताका संघको गतिविधिबाट आम व्यवसायीमा संघप्रति नै भरोसा टुट्ने तहको आक्रोश र कतिपय ठाउँमा निराशा पनि प्रकट भएको छ । संघलाई पुरानो शैलीबाट चलाइरहेमा कुनै काम गर्न सकिँदैन । त्यसैले संघमा आमूल परिवर्तनका लागि हाम्रो टिम प्रतिबद्धताका साथ आएका छौं ।
व्यवसायीका समस्याहरुलाई सम्बोधन गर्ने तथायस क्षेत्रलाई मर्यादित बनाउन संघलाई प्रभावकारी भूमिकामा स्थापित गर्ने हाम्रो योजना छ । यो हामी कुरामा मात्रै होइन, व्यवहारमै कार्यान्वयन गर्नेछौं । यसका लागि आम व्यवसायीहरुले यस निर्वाचनमा हाम्रो टिमलाई साथ दिनुहुनेमा विश्वस्त छौं । किनकि, हामी व्यवसायीमैत्री एजेण्डा लिएर अगाडि बढेका छौं । व्यवसायीको हक हितमा निरन्तर लड्नेछौं ।
हाम्रो मूल एजेण्डा सेवा शुल्क परिमार्जन हो । नेपालबाट वैदेशिक रोजगारमा पठाउने वैदेशिक रोजगार व्यवसायीलाई सरकारले दक्षिण एसियाली मुलुकहरूले जस्तै रोजगारदाताले सेवा शुल्क नदिएको अवस्थामा कामदारले पाउने एक महिनाको तलब बराबरको रकम सेवा शुल्कका रूपमा लिन पाउने र रोजगारदाताले हवाई टिकट नदिने अवस्थामा टिकट आफैंले काटेर जाने वैधानिक व्यवस्था गर्नुपर्छ । मुख्यरूपमा वैदेशिक रोजगारलाई सेवा उद्योगको रुपमा परिभाषित र सूचीकृत गर्नुपर्छ । यो बैंक र होटलजस्तै एउटा सेवामूलक उद्योग हो भनेर सबैलाई बुझाउनुपर्ने आजको आवश्यकता बनेको छ । त्यसैका लागि संघमा हाम्रो नेतृत्व आवश्यक रहेको म पुनः दाहाेर्याउन चाहन्छु ।
व्यवसायीको हितका साथसाथै हामी कामदारको हितमा काम गर्न पूर्ण प्रतिबद्धता छौं । वैदेशिक रोजगारलाई सुरक्षित र व्यवस्थित बनाउन हामी संघलाई प्रभावकारी रुपमा क्रियाशील गराउने योजना छ । साथै, अहिलेसम्म संघको भवन छैन । हाम्रो टिम निर्वाचित भएको खण्डमा हामी तीन महिनाभित्रै भवन निर्माणको काम अगाडि बढाउनेछौं । यो हाम्रो प्रतिबद्धता मात्रै होइन कार्यान्वयन गर्ने स्पष्ट योजना छ । यसका लागि संघको नेतृत्वमा हामी पुग्नुपर्छ र स्वस्थ प्रतिस्पर्धामार्फत हामी त्यो सफलतामा पुग्छौं भन्नेमा विश्वस्त छौं । यो निर्वाचनमा आम व्यवसायीज्यूहरुसमक्ष मेरो नेतृत्वको प्यानललाई विजयी गराउनका लागि सविनय आग्रह गर्न चाहन्छु ।
