काठमाडौं– वैदेशिक रोजगार व्यवसायीहरुको छाता संगठन नेपाल वैदेशिक रोजगार व्यवसायी संघको निर्वाचनसहितको साधारणसभा आज हुँदै छ । निर्वाचनमा संघको आगामी नेतृत्वका लागि चारवटा प्यानलबीच भिडन्त हुँदै छ । यसअघि पटक–पटक स्थगित हुँदै आएको संघको सधारणसभा तथा निर्वाचनमा व्यवसायीहरुले आफू अनुकूल प्यानल निर्माण गरी चुनावी महाभिडन्तमा होमिएका हुन् ।
विभिन्न राजनीतिक दलका शुभेच्छुक संस्थाहरुले संघको आगामी कार्यकालका लागि सहमतिमा नेतृत्व चयनका लागि गरेको प्रयास विफल भएपछि चारवटा प्यानल निर्माण भएका हुन्. । नेकपा एमालेको शुभेच्छुक संस्था प्रगतिशील वैदेशिक रोजगार मञ्चले राजेन्द्र भण्डारी अध्यक्ष रहेको प्रगतिशील व्यवसायी प्यानल खडा गरेको छ । ‘समुन्नत राष्ट्र निर्माणको आधार ः सुरक्षित, व्यवस्थित र मर्यादित’ वैदेशिक रोजगार भन्ने नारा तय गरेको प्रगतिशील समूहलाई राप्रपा निकट व्यवसायिकसंस्थाले पनि समर्थन गरेको छ ।
त्यस्तै नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार एसोसियसनले पनि कुमुद खनाल नेतृत्वमा लोकतान्त्रिक व्यावसायिक प्यानल बनाएको छ । ‘व्यवसायी र कामदारको हित र सम्मानः लोकतान्त्रिक व्यवसायी समूहको निरन्तर अभियान’ भन्ने नारा तय गरेको कुमुद खनाल प्यानललाई विभिन्न भेगीय तथा तराई मधेश लोकतान्त्रिक व्यवसायी संघले सघाएको छ । लोकतान्त्रिक एसोसियसनको आन्तरिक किचलोका कारण भुवनसिं गुरुङको नेतृत्वमा बनेको अर्को प्यानल पनि चुनावी मैदानमा उत्रिएको छ ।
अर्थतन्त्रको मूल आधार, सम्मानित वैदेशिक रोजगार’ नारा तय गरेको गुरुङ प्यानललाई विभिन्न जातीय, भेगीय र समाजवादी व्यवसायी फोरमले समर्थन गरेको छ भने सम्पूर्ण गुरुङ व्यवसायीहरुको छाता संगठन वैदेशिक रोजगार व्यवसायी तमु धिं समाजले पनि सावर्जनिक रुपमा नै गुरुङ प्यानललाई समर्थन गरेको विज्ञप्ति जारी गरेको छ । यद्यपि, लोकतान्त्रिक एसोसियसनभित्र आपसी सहमति हुन नसक्दा पार्टीले कुमुद खनालको प्यानललाई आधिकारिक घोषणा गरेको छ ।
यस्तै नेकपा माओवादी केन्द्रको शुभेच्छुक संस्था नेपाल वैदेशिक रोजगार व्यवसायी गणतान्त्रिक मञ्च पनि डा. ईश्वर जिसीको नेतृत्वमा व्यावसायिक प्यानल खडा गरी चुनावी मैदानमा होमिएको छ । ‘देश विकासको आधारः सम्मानित वैदेशिक रोजगार’ भन्ने नारा बोकेको इश्वर जिसीको व्यवसायिकप्यानललाई नेकपा एकीकृत समाजवादीको शुभेच्छुक संस्था एकीकृत व्यवसायी संगठनको बलियो समर्थन रहेको छ । जिसी प्यानलले व्यवसायीहरुको आवाजलाई बुलन्द गर्ने भन्दै प्रधानमन्त्री पुष्पकमल दाहाललाई भेटी आफ्ना एजेण्डासमेत प्रस्तुत गरेको छ ।
संघको आगामी नेतृत्वका लागि चुनावी मैदानमा होमिएका चारवटै प्यानलले तीव्र प्रचारप्रसार गरे पनि तुलनात्मक रुपमा जिसी प्यानल प्रचारमा आक्रामक देखिएको छ । यस्तै भण्डारी प्यानलले आक्रामक प्रचारप्रसार नगरे पनि पार्टीका शीर्ष नेताहरुलाई सहभागी गराई थुप्रै व्यावसायिक भेला गर्दै बलियो एकताको सन्देश दिएको छ । यसैगरी खनाल प्यानलले पनि विभिन्न व्यवसायिक भेला आयोजना तथा प्रचारप्रसारलाई टिम घोषणा भएदेखि नै सञ्चालन गर्दै आएको छ । त्यस्तै कान्छो प्यानलको रुपमा रहेको भुवनसिं गुरुङको संयुक्त लोकतान्त्रिक व्यावसायिक समूहले जातीय, भेगीय भेलालाई जोड दिए पनि प्रचारप्रसारमा त्यति प्रभाव पारेको देखिँदैन ।
चारवटै प्यानलले अघि सारेको एजेण्डाहरु व्यवसाय सञ्चालनका सन्दर्भमा हितकर भए पनि संघको नेतृत्वमा कसलाई ल्याउने भन्नेमा व्यवसायीहरुमाझ द्विविधा देखिएको छ । यतिखेर सबै प्यानलले आफूलाई बलियो प्रतिस्पर्धीका रुपमा प्रस्तुत गर्दै चुनावी संग्राममा उत्रिएपछि कसको पल्लाभारी हुने भन्ने अनुमान गर्न कठिन रहेको व्यवसायीहरुको भनाइ छ । यद्यपि, व्यवसायीहरुको संस्थागत आबद्धताको हिसावले प्रगतिशील मञ्चबाट राजेन्द्र भण्डारी प्यानल अन्य प्यानलभन्दा बलियो रहेको देखिन्छ ।
मञ्चमा झण्डै २३० बढी व्यवसायीहरु रहेको बताइन्छ । सदस्य संख्या ३५० को हाराहारीमा रहेको लोकतान्त्रिक एसोसियसन मञ्चभन्दा कमजोर अवस्थामा रहेको छ । भुवनसिं गुरुङले कुमुद खनालको नेतृत्वमा संघको निर्वाचनमा जान असन्तुष्टि जनाउँदै छुट्टै प्यानल बनाएपछि लोकतान्त्रिक एसोसियसन कमजोर देखिएको छ । एउटै संस्थाबाट दुई प्यानल बनेपछि मत बाँडिने र प्रगतिशील मञ्चलाई फाइदा पुग्ने व्यवसायीहरुले विश्लेषण गरेका छन् । यस्तै गणतान्त्रिक मञ्चले आफूलाई बलियो माने पनि संस्थागत सदस्यहरु न्यून रहेको बताइन्छ ।
गणतान्त्रिक मञ्च र एकीकृत संगठनको संयुक्तरुपमा ८० को हाराहारीमा मतदाता व्यवसायी रहेको बुझिएको छ । लोकतान्त्रिक र प्रगतिशील पक्षका व्यवसायीलाई प्रभावित पार्न सके मात्रै जिसी प्यानलले आफ्नो पक्षमा परिणाम ल्याउन सक्ने चर्चा छ ।चारवटै प्यानलले आफ्नै बलमा परिणाम ल्याउन मुस्किल देखिएको एक पुराना व्यवसायी बताउँछन् । उनका अनुसार संस्थामा फुट नआएको भए लोकतान्त्रिककले बाजी मार्न सक्थ्यो । अब यो संभावना प्रगतिशीलतिर देखिएको छ ।
अब संघमा सबै प्यानलका केही पदाधिकारी र सदस्यहरुको मिश्रणसहित नयाँ कार्यसमिति बन्ने देखिएको छ । उनी भन्छन्, ‘चारवटै प्यानलबाट व्यवसायीको हितमा लाग्ने र समय दिनसक्ने व्यक्तिको छनोट गरी संघको कार्यसमिति बनाउने व्यवसायीहरुले आन्तरिक तयारी गरेका छन् । यस्तो अवस्थामा सिंगो प्यानलले नै परिणाम हात पार्न सक्छ भन्ने मलाई लाग्दैन ।’
संघको नयाँ कार्यसमितिका खनाल समूहबाट अध्यक्षमा कुमुद खनाल, प्रथम, द्वितीय र तृतीय उपाध्यक्षमा किशोर कुमार केसी, अख्तर हुसेन र सञ्जय पनेरु महासचिवमा मेघनाथ भुर्तेल, सचिवमा कर्णराज कटुवाल र कोषाध्यक्षमा हिमा गुरुङ आधिकारिक उम्मेदवार रहेका छन् । त्यस्तै सदस्यहरुमा चन्द्रबहादुर लिम्बू, कैलाश पाठक, तोरणकुमार कार्की, नारायण भुसाल, राजकाजी भोलान, विक्रम श्रेष्ठ, कामेश्वर साह, मो. इजरायललाई आधिकारिक उम्मेदवारको रुपमा समेटि प्यानल बनाइएको छ ।
त्यस्तै भण्डारी समूहबाट अध्यक्षमा भण्डारी, प्रथम, द्वितीय र तृतीय उपाध्यक्षमा क्रमशः डिकबहादुर खत्री, सञ्जु गुरुङ र रोशन कटुवाल महासचिवमा मिलन कट्टेल, सचिवमा राजेन्द्र अधिकारी, कोषाध्यक्षमा सरिता घले रहेका छन् । कार्यसमिति सदस्यहरुका लागि देउमान नेम्वाङ, वैकुण्ठ पौडेल, शिवहरी मैनाली (शितल), आनन्द कोइराला, खेमनाथ गौतम, मोहनप्रसाद आचार्य, राजेन्द्र बस्नेत, जनकलाल बास्तोला, श्यामचन्द्र खतिवडालाई समावेस गरी प्यानल निर्माण गरिएको छ ।
त्यसैगरी जिसी समूहबाट अध्यक्षमा डा.ईश्वर जिसी, प्रथम उपाध्यक्ष धनलाल जैसी, द्वितीय उपाध्यक्ष बाबुराम खड्का र तृतीय उपाध्यक्ष अनिल बोगटी, महासचिवमा मधुकर रिजाल, सचिवमा टक्करबहादुर पाख्रिन र कोषाध्यक्षमा केदारनाथ अधिकारी रहेका छन् । सदस्यहरुमा गणेश कुँवर, कामेश्वर साह राहुल, फिरोज खान, सन्दीप पुडासैनी, एक नारायण काफ्ले, प्रेमबहादुर गिरी, देवी माया थापा, शिवबहादुर कुँवर र सरोज कुशवाहको प्यानल बनेको छ । यस्तै गुरुङ समूहबाट अध्यक्षमा भुवनसिं गुरुङ, द्वितीय उपाध्यक्ष मो. जावरद्दिन मियाँ (मुन्ना), तृतीय उपाध्यक्ष मोहनकुमार ढुंगेल, सचिवमा प्रेम लावती, कोषाध्यक्षमा हिरादेवी बुढाथोकी र सदस्यहरूमा भगिरथ भण्डारी, चन्द्रकमल श्रेष्ठ रहेको सात सदस्यीय प्यानल बनेको छ ।
यसअघि पुस ८ गते तोकिएको संघको चुनावमा व्यवसायीहरुले सदस्यहरुको नवीकरण तथा आन्तरिक तयारी नपुगेको भन्दै रोकेका थिए । यतिखेर साधारणसभा तथा निर्वाचनका लागि राजनीतिक दल निकट सबै व्यवसायी संघसंगठन तयारी अवस्थामा रहेको र निर्वाचनमा सहभागिता जनाउन ७०० को हाराहारीमा प्रतिनिधि दर्ता भएको संघले जनाएको छ ।
