काठमाडौं– प्रतिनिधिसभाका नवनिर्वाचित सभामुख अग्निप्रसाद सापकोटाले लोकतन्त्रको मूल्य, मान्यता र आदर्शलाई कायम गर्दै जनताको सार्वभौम सर्वोच्च संस्थाको ओझ र गरिमालाई कायम राख्ने प्रतिवद्धता जनाएका छन् ।
प्रतिनिधिसभाको रिक्त सभामुखमा सापकोटा आइतबार सर्वसम्मत निर्वाचित भएका हुन् । निर्वाचित भएपछि उनले आफू सधैँ दत्तचित्त र इमान्दार भएर लाग्ने प्रतिबद्धता व्यक्त गरे । उनले भने, ‘म तटस्थ, निष्पक्ष र सन्तुलित भूमिका निर्वाहका लागि प्रतिवद्ध छु ।’
बैठकमा सभामुखको हैसियतले आइतबार ज्येष्ठ सदस्य महन्थ ठाकुरले सभामुख पदका लागि एकमात्र उम्मेदवारीको सूचना प्राप्त भएकाले प्रतिनिधिसभा नियमावली–२०७५ बमोजिम सापकोटा सर्वसम्मतरूपमा निर्वाचित भएको घोषणा गरेका थिए ।
बैठकमा सभामुखको उम्मेदवारको सूचनासम्बन्धी प्रस्ताव प्रस्तुत गर्दै नेकपा संसदीय दलका उपनेता सुवासचन्द्र नेम्वाङले पारदर्शिता र जवादेहिताका आधारमा सदनका काम कारबाहीमा जुन भूमिका निर्वाह गर्नुपर्ने हो, त्यसमा सिंगो संसद्लाई विश्वासमा लिएर काम गर्ने विश्वासका साथ सापकोटालाई प्रस्ताव गरिएको बताए । बैठकमा उनको विकल्पमा अरु उम्मेदवारी नपर्नुले आफूहरूको चयन उपयुक्त रहेको नेम्बाङको भनाइ छ ।
यस्तै, प्रमुख प्रतिपक्षी दल नेपाली कांग्रेसका नेता डा. मीनेन्द्रप्रसाद रिजालले सापकोटालाई सत्तारूढ दलको यथेष्ट मत रहेको र आफ्नो उम्मेदवार तोकिसकेको स्थितिमा सभामुख तटस्थ रहनुपर्ने व्यक्ति भएकाले आफ्नो पार्टीले उम्मेदवारी नदिने संसदीय दलको बैठकले निर्णय गरेको बताए ।
उनले भने, ‘संविधानले दुई पदमा फरकफरक पार्टीका उम्मेदवार हुनुपर्ने उल्लेख गरेकाले त्यसमा सत्तापक्षले नै विचार गर्ला तर हामी उपसभामुखका लागि हातमा कमण्डलु लिएर हिँडेका छैनौँ । सभामुखका उम्मेदवारका बारेमा आज उत्पन्न आशंका मेट्न भोलिका दिनमा आश्वस्त हुने गरी काम गर्न सक्नुहोस् । हामी सहयोग गर्न तयार छौँ ।’ तत्कालीन सभामुख कृष्णबहादुर महराले महिलामाथिको यौन दुव्र्यवहारको विवादपछि गत १५ असोजमा पदबाट राजीनामा दिएका थिए ।
“अग्नि सर”को सभामुख यात्रा सुरु
नेकपाका नेता सापकोटा लामो समयदेखि संसदीय प्रक्रियामा सहभागी छन् । उनी राजनीतिमा आउनुअघि कुशल शिक्षक थिए । ‘कञ्चन’ उपनामले चिनिएका सापकोटालाई आममानिसले ‘हेडसर’का रूपमा चिन्छन् । राजनीतिमा लाग्नुअघि उनी लामो समय शिक्षक हुँदै प्रधानाध्यापकसमेत भएका थिए । उनलाई सिन्धुपाल्चोक, काभ्रेपलाञ्चोक, दोलखा, सिन्धुली र रामेछापका धेरैजसोले ‘माड्साप’ वा ‘अग्नि सर’का रूपमा चिन्ने गरेका छन् ।
उनलाई नेताभन्दा पनि धेरैले ‘अग्नि सर’का रूपमा चिन्ने गर्छन् । तर, सापकोटाको आइतबारबाट परिचय फेरिएको छ । माओवादीले सुरु गरेको जनयुद्धमा सहभागी हुँदा होस् वा शान्ति प्रक्रियामा, सिन्धुपाल्चोक, काभ्रेपलाञ्चोकलगायतका जिल्लावासीले उनलाई सादगी नेताका साथै ‘अग्नि सर’का रूपमै चिन्छन् ।
अब उनी हेडसर, नेकपाका नेता मात्र नभएर प्रतिनिधिसभाको सभामुख ह्न । संविधानसभाबाट जारी भएको संविधानपछि गठन भएको प्रतिनिधिसभाको दोस्रो सभामुखका रूपमा सापकोटाले आफ्नो यात्रा तय गरेका छन् ।
बि.सं २०१४ फागुन २४ गते सिन्धुपाल्चोकको कुविण्डेमा तिलमाया सापकोटा र धनपति सापकोटाको सुपुत्रका रूपमा जन्मिएका सापकोटाले त्रिभुवन विश्वविद्यालयबाट स्नातकसम्मको अध्ययन गरेका छन् । नवनिर्वाचित सभामुख सापकोटा २०३५ सालमा नेकपा (चौथो महाधिवेशन)बाट पार्टी राजनीतिमा लागेका हुन् ।
सानैदेखि विद्रोही स्वभावका सापकोटा कुविण्डेका सापकोटा परिवारकै पहिलो प्रधानाध्यापक हुने पहिलो व्यक्तिका रूपमा समेत उनी परिचित छन् । स्पष्ट वक्ता र राजनीतिमा कहिल्यै विचलित नहुने स्वभावका सापकोटालाई प्रतिनिधिसभाको ‘हेडसर’ अर्थात सभामुख बन्ने सौभाग्य मिलेको छ ।
