काठमाडौं– राष्ट्रियसभा निर्वाचनको मतदान सातै प्रदेशमा सुरु भएको छ । राष्ट्रियसभाको रिक्त १८ सिटका लागि सातै प्रदेशमा मतदान सुरु भएको हो ।
निर्वाचन आयोगका अनुसार, अहिले बिहान १० बजेदेखि सातै प्रदेशमा तोकिएका मतदानस्थलनमा मतदान सुरु भएको छ । मतदान अपराह्न ४ बजेसम्म जारी रहनेछ ।
आयोगका अनुसार, प्रत्येक प्रदेशको १ स्थानमा मतदानस्थल तोकिएको छ । प्रदेश १ का लागि विराटनगर महानगरपालिकाको वीरेन्द्र सभागृह, २ का लागि जनकपुर उपमहानगरपालिकाको महेन्द्र नारायण स्मृति भवन र वागमती प्रदेशका लागि ललितपुर महानगरपालिका–४ स्थित वडा समिति भवन मतदानस्थल तोकिएको छ ।
त्यसैगरी, गण्डकी प्रदेशका मतदाताका लागि पोखरा महानगरपालिकामा अवस्थित निर्वाचन कार्यालय, प्रदेश ५ का मतदाताका लागि घोराहीस्थित कर्मचारी मिलन केन्द्रको भवन, कर्णाली प्रदेशका मतदाताका लागि जिल्ला निर्वाचन कार्यालय सुर्खेत र सुदूरपश्चिम प्रदेशका मतदाताका लागि दीपायलस्थित पद्य पब्लिक मुक्तिनारायण उच्च माविबाट मतदान गर्ने व्यवस्था मिलाइएको आयोगले जनाएको छ ।
नेपालको संविधान बमोजिम राष्ट्रिय सभा ५९ सदस्यीय हुन्छ । राष्ट्रियसभामा दुईवर्षे पदावधि समाप्त भएकाहरुको स्थानमा निर्वाचन हुन लागेको हो । राष्ट्रियसभाका एक तिहाइ अर्थात् १९ सांसद्को पदावधि यही २० फागुनमा समाप्त हुँदै छ । तीमध्ये राष्ट्रपतिबाट मनोनित एक जनाको पनि समयावधि सकिन लागेकाले आज १८ सिटका लागि चुनाव हुँदै छ ।
प्रदेशसभा सदस्य, नगरपालिका प्रमुख र उपप्रमुख तथा गाउँपालिकाका अध्यक्ष र उपाध्यक्ष राष्ट्रियसभा निर्वाचनका मतदाता हुन् । आयोगका अनुसार, कुल मतभार ५३ हजार ५ सय ८ रहेको छ । चुनावी मैदानमा ६ दलका ४५ उम्मेदवार छन् ।
निर्वाचनका लागि सातैवटा प्रदेशका कुल ५५० जना प्रदेशसभा सदस्य, ६ वटा महानगरका मेयर र उपमेयर गरी १२ जना, ११ उपमहानगरपालिका मेयर र उपमेयर गरी २२ जना, २७६ नगरपालिका मेयर र उपमेयर गरी ५५२ जना र ४६० गाउँपालिकाका अध्यक्ष र उपध्याक्ष गरी ९२० जनाले मतदान गर्नेछन् । स्थानीय तहका प्रमुख र उप्रमुख, अध्यक्ष र उपाध्यक्ष गरी १५०६ जना मतदाता रहने छन् । यस निर्वाचनमा जम्मा मतदाताको संख्या २०५६ रहने छ । आयोगका प्रवक्ता राजकुमार श्रेष्ठले भिडियोमार्फत उक्त कुराको जानकारी दिएका हुन् । आयोगका अनुसार निर्वाचन सम्पन्न भएको केही घन्टामै मतपरिणाम सार्वजनिक हुनेछ ।
