काठमाडौं– सत्तारुढ दल नेपाल कम्युनिष्ट पार्टी (नेकपा)ले सभामुखको सकस टुंग्याएको छ । नेकपाका अध्यक्षद्वय केपी शर्मा ओली र पुष्पकमल दाहाललबीच आइतबार बिहान भएको छलफलपछि नेता अग्नि सापकोटालाई सभामुख उम्मेदवार बनाइएको छ ।
अध्यक्ष ओली र दाहालको सहमतिपछि आइतबार साँझ नेकपाको सचिवालय बैठकले सभामुखमा नेता सापकोटालाई उम्मेदवार बनाउने निर्णय गरेको हो । नेकपा महासचिव विष्णु पौडेलका अनुसार प्रधानमन्त्री निवास बालुवाटारमा बसेको नेकपा सचिवालय बैठकले सापकोटालाई सभामुख उम्मेदवार बनाउने निर्णय गरेको हो ।
प्रधानमन्त्री ओली र नेकपा अध्यक्ष दाहालबीच आइतबार बिहान भएको करिब तीन घण्टा लामो छलफलपछि सभामुख चयनको विषय अनुमोदन गर्न नेकपा सचिवालय बैठक बसेको थियो । तत्कालीन माओवादीको भागमा सभामुख भएकोले तत्कालीन माओवादीबाटै सभामुख चयन गर्ने सहमति दुई अध्यक्षबीच भएको थियो । त्यसलाई औपचारिकता दिन बसेको सचिवालय बैठकले सापकोटाको नाम अनुमोदन गरेको हो ।
यसअघि उपसभामुख शिवमाया तुम्बाहाम्फेले आफू नै सभामुख हुनु पर्ने अढान कस्दै आएकी थिइन् । जसका कारण करिब तीन साता सभाुमख कसलाई बनाउने भन्नेमै नेकपाको समय बितेको थियो । नेकपामा सभाुमखको उम्मेदवारबारे निर्णय गर्न नसक्दा ४ पुसदेखि प्रतिनिधि सभाको बैठक समेत सर्दै आएको थियो ।
यस्तै, नेकपाका अध्यक्षद्वयले सभामुखबारे आ–आफ्नै अढान राख्दै आएकाले पनि सभामुख चयनको गाँठो खोल्न सकस भएको थियो । प्रधानमन्त्री समेत रहेका अध्यक्ष ओलीले सुवास नेम्बाङलाई सभामुखका अगाडि सार्दै आएका थिए । तर, अन्ततः अर्का अध्यक्ष दाहालले अगाडि सारेका सापकोटालाई नै सभामुख बनाउने उनीहरूबीच सहमति भएको छ ।
सभामुखको सन्दर्भका ओलीले लचक्ता देखाउपछि सहमति भएको नेकपाका एक नेताले बताए । उनले भने, ‘राजनीतिक गतिरोध अन्त्य गर्न प्रधानमन्त्री तथा अध्यक्ष ओलीले आफ्नो अढान छाडेका हुन् ।’ यससँगै लामो समयदेखि रिक्त रहेको सभाुमख पद पूर्ति हुने भएको छ । सभामुखका नेता सापकोटा निश्चित भएको छ ।
को हुन् नेता सापकोटा ?
सिन्धुपाल्चोकको चौतारा–६ कुविण्डे टोलमा धनपति र तिलमायाको कोखबाट सापकोटाको २०१४ साल २४ फागुनमा जन्मेका हुन् अग्नि सापकोटा । साविकको सिन्धुपाल्चोक क्षेत्र नम्बर–२ बाट पहिलो र दोस्रो संविधानसभाको निर्वाचनमा भारी मतान्तरले विजयी सापकोटा ०७४ को निर्वाचनमा क्षेत्र नम्बर–१ बाट पनि विजयी भएका थिए ।
२०३५ सालबाट राजनीतिमा सक्रिय सापकोटाले दुई वर्ष जेल जीवन बिताएका थिए । २०४८ सालमा संयुक्त जनमोर्चाका तर्फबाट प्रतिनिधिसभा निर्वाचनमा सापकोटा पराजित भएका थिए । २०५१ सालमा पार्टी केन्द्रीय सदस्य बनेका सापकोटा माओवादी र सरकारबीच भएको दोस्रो वार्ता टोलीका सदस्यसमेत रहेका थिए । समाजशास्त्रमा स्नातकोत्तर गरेका सापकोटा ०४४ सालमा नेपाल राष्ट्रिय शिक्षक संगठनको केन्द्रीय उपाध्यक्ष भएका थिए भने सागाचोकस्थित जनजागृति माध्यमिक विद्यालयमा १५ वर्ष प्राध्यापनको समेत उनीसँग अनुभव छ ।
२०५२ सालबाट भूमिगत भएका उनी माओवादी शान्तिप्रक्रियामा नआउँदासम्म भूमिगत थिए । नेता सापकोटा २ पटक मन्त्री भइसकेका छन् । उनीसँग सूचना तथा सञ्चार र वन मन्त्रालयको जिम्मेवारी सम्हालेको अन्भव छ । उनी नेकपा स्थायी समिति सदस्य हुन् ।
अंक गणितमा सापकोटाको राजनीति
जन्म स्थान – २०१४ फागुन २४, सिन्धुपाल्चोक, कुभिण्डे
आमा – तिलमाया सापकोटा र बुबा धनपति सापकोटा
ठेगाना – चौतारा साँगाचोकगढी नपा–४, सिन्धुपाल्चोक
शैक्षिक योग्यता – स्नातक, त्रिभुवन विश्वविद्यालय
पारिवारिक स्थिति – श्रीमती, तीन छोरा
पेसा र अनुभव – १५ वर्ष अध्यापन
राजनीति यात्रा – २०३५ साल नेकपा (चौथो महाधिवेशनबाट) स्थायी समिति सदस्य, नेपाल कम्युनिस्ट पार्टी (नेकपा)
जिम्मेवारी –
२०६४ चैत २८ गते सम्पन्न पहिलो संविधानसभाको निर्वाचनमा सिन्धुपाल्चोक–२ बाट निर्वाचित ।
२०६८ बैशाख २२ गते सूचना तथा संचारमन्त्री ।
०७० सिन्धुपाल्चोक–२ बाट दोस्रोपटक संविधानसभा सदस्य ।
०७३ मा नेपाल सरकारको वन तथा भू–संरक्षण मन्त्री ।
२०७४ मा प्रतिनिधिसभा सदस्य विजयी ।
२०२९ सालमा विद्यार्थी संगठनमा आवद्व ।
०३५ मा पार्टी सदस्यता (नेकपा चौथो महाधिवेशन) ।
०३७ मा शिक्षक संर्घष समितिको सदस्य (नेराशिसं) जिल्ला उपाध्यक्ष, अध्यक्ष हुँदै केन्द्रीय महासचिव र उपाध्यक्ष ।
०४८ मा राजीनामा, पूर्णकालीन राजनीतिमा सक्रिय,
०४९ मा संयुक्त जनमोर्चाको केन्द्रीय सदस्य ।
०५१ मा नेकपा (एकता केन्द्र) को केन्द्रीय सदस्य ।
०५१ असोजमा नेकपा (माओवादी) केन्द्रीय सदस्य, २०५२ माघदेखि भूमिगत ।
०५२ फागुनबाट सुरु जनयुद्वको नेतृत्वमा, पूर्वी उपक्षेत्रीय ब्युरो इन्चार्ज,
०५७ मा दोस्रो राष्ट्रिय सम्मेलनबाट पोलिटब्युरो सदस्य
०५८ मा पार्टीबाट गठन गरिएको ३ सदस्यीय वार्ता टोलीमा रही सरकारसँग वार्तामा सहभागी ।
०६९ साल माघमा भएको एकीकृत नेकपा (माओवादी)को हेटौँडा महाधिवेशनबाट पोलिटब्युरो सदस्य ।
०६९ साउनमा एकीकृत नेकपा (माओवादी)को स्थायी समिति सदस्य तथा पार्टीको केन्द्रीय प्रवक्ता ।
र, २०७५ मा नेपाल कम्युनिस्ट पार्टी (नेकपा)को स्थायी समिति सदस्य ।
