काठमाडौं - निर्वाचन आयोगले चुनावको तयारी पूरा भएको जनाएको छ । आयोगका अनुसार मतदानका लागि मतपत्र र चुनावसम्बन्धी सामग्री मतदान केन्द्रहरूमा पुगिसकेको छ । करिब दुई लाख ४६ हजार ९६० कर्मचारी र तीन लाखको संख्यामा सुरक्षाकर्मी परिचालन भइसकेका छन् ।
आयोगले सुरक्षा व्यवस्था कडा पारिएको भन्दै मतदातालाई कसैको डर, धाकधम्की, प्रलोभनमा नपरी आफूलाई मन परेको राजनीतिक दल तथा उम्मेदवारको चुनाव चिह्नमा मतदान गरी आफ्नो मताधिकार प्रयोग गर्न आग्रह गरेको छ ।
प्रमुख निर्वाचन आयुक्त दिनेशकुमार थपलियाले चुनावको अन्तिम नतिजा नआउँदासम्म निहीत राजनीतिक स्वार्थले चुनावको निष्ठालाई आघात पु¥याउने गरी देशभित्र र बाहिरबाट सामाजिक सञ्जालमार्फत फैलिनसक्ने मिथ्या सूचना, दुष्प्रचार र द्वेषपूर्ण अभिव्यक्तिका कारण चुनाव व्यवस्थापन तथा सञ्चालन प्रभावित हुनसक्नेतर्फ आयोग सचेत रहेको बताए ।
उनले धाक, धम्की, डर वा त्रास देखाइ वा अन्य कुनै किसिमले अनुचित प्रभावमा पारी कुनै चुनाव क्षेत्र वा मतदान केन्द्रमा चुनावबारेको निष्पक्षता र स्वतन्त्रतामा असर पु¥याउने काम गरेमा सूचना दिन कानुनअनुसार कारबाही गर्न कर्मचारीहरूलाई निर्देशन पनि दिए ।
आयोगले निर्वाचनलाई स्वच्छ, स्वतन्त्र, निष्पक्ष, भयरहित, पारदर्शी एवं विश्वसनीय बनाउन आयोगले आवश्यक सुरक्षा प्रबन्ध मिलाइसकेको जनाएको छ । चुनावमा प्रत्येक मतदान केन्द्र आवश्यक सुरक्षाकर्मीसहित तीन घेराको सुरक्षा व्यवस्थाका अतिरिक्त ३० मिनेटभित्र पुग्न सक्नेगरी पर्याप्त सुरक्षाकर्मीको रिजर्भ फोर्सको व्यवस्था गरिएको छ ।
निर्वाचन सुरक्षा जोखिमका आधारमा आवश्यकताअनुसार सुरक्षा गस्ती परिचालन तथा क्षेत्रगत संवेदनशीलतालाई मध्यनजर गरी पर्याप्त मात्रामा अधिकार सम्पन्न घुम्ती टोली परिचालन गर्ने व्यवस्था मिलाइएको आयोगले जनाएको छ ।यद्यपि, बिहीबारसम्म मतदान केन्द्र भने निर्माण भइसकेको छैन । आयोगका अनुसार आगामी दुई दिनभित्र मतदानमा खटिएका कर्मचारी र सुरक्षाकर्मीबाट मतदान केन्द्रको निर्माण कार्य सम्पन्न हुनेछ ।
लैंगिक समावेशी, अपांगतामैत्री तथा सुत्केरी, गर्भवती, ज्येष्ठ नागरिक, बिरामी र अशक्त मतदाताका लागि पनि सहज हुनेगरी मतदान केन्द्र बनाउन आयोगले निर्देशन दिएको छ ।मतदान केन्द्र २२ हजार २२७ वटा निर्माण हुने छन् । अस्थायी प्रकृतिको मतदान केन्द्र १४१ वटा हुने छन् । मतदानस्थल १० हजार ८९२ वटा हुने आयोगका प्रवक्ता शालिग्राम शर्मा पौडेलले जानकारी दिए । यी मतदान केन्द्रहरूबाट एक करोड ७९ लाख ८८ हजार ५७० जना मतदाताले मतदान गर्ने छन् ।
प्रतिनिधिसभातर्फ पहिलो हुने निर्वाचित हुने निर्वाचन प्रणालीका लागि दुई हजार ४१२ जना उम्मेदवार चुनावी मैदानमा छन् ।प्रतिनिधिसभाको समानुपातिक निर्वाचन प्रणालीतर्फ दुई हजार १९९ उम्मेदवारको नाम अन्तिम बन्दसूचीमा कायम गरिएको छ ।प्रदेशसभातर्फ पहिलो हुने निर्वाचित हुने निर्वाचन प्रणालीका लागि तीन हजार २२४ जना उम्मेदवार चुनावी प्रतिस्पर्धामा छन् ।
प्रदेशसभाको समानुपातिक निर्वाचन प्रणालीतर्फ तीन हजार ७०८ जना उम्मेदवारको नाम अन्तिम बन्दसूचीमा कायम छ । चुनावको पर्यवेक्षण १२ जना अन्तर्राष्ट्रियसहित सात हजार २१९ जनाले पर्यवेक्षण गर्ने भएका छन् ।मतदानको दिन भारत, भुटान, बंगलादेश र माल्दिभ्सका प्रमुख निर्वाचन आयुक्त नेपाल आउने भएका छन् । श्रीलंका र दक्षिण कोरियाबाट निर्वाचन आयुक्त आउने र जापानबाट भने विदेश राज्यमन्त्री आउने तय भएको प्रवक्ता पौडेलले बताए ।
