कास्की– सरकारले नेपाल भ्रमण वर्ष मनाइरहेको छ । भ्रमण वर्षको अवसरमा विदेशी पर्यटक नेपाल आउने क्रम बढेको छ । यसैबेला शुक्रबार अन्नपूर्ण बेसक्याम्प घुम्न गएको चार कोरियालीसहित ७ जना बेपत्ता भएका छन् । यस घटनाले अन्तर्राष्ट्रिय मिडियामा समेत चर्चा पाएको छ, जसले नेपाल भ्रमण वर्षको नकरात्मक सन्देश जाने चिन्ता बढाएको छ ।
बेसक्याम्पबाट हराएकाहरूको खोजी जारी रहेको बताइएको छ । बिहीबारदेखि भएको वर्षासँगै बाक्लो हिम पहिरोका कारण थुनिएका पदयात्री र पथप्रदर्शक भने २ सयको हाराहारीमा उद्दार गरिएको जिल्ला प्रशासन कार्यालय कास्कीले जनाएको छ ।
शुक्रबार देउराली भन्ने स्थानमा हिम पहिरो खसेपछि उनीहरू बेपत्ता भएको जनाइएको छ । सम्पर्कमा आउन नसकेकामध्ये ४ कोरियन र ३ जना नेपाली रहेको बताइएको छ । तर, उनीहरूको आधिकारिक पहिचान हुन सकेको छैन ।
उनीहरूको आधिकारिक पहिचान हुन नसकेको जिल्ला प्रहरी कार्यालय कास्कीका प्रमुख दानबहादुर कार्कीले बताए । उनले भने, ‘पहिरोका कारण बेपत्ता हुनु भएको हो । मोबाइलमा चार्ज सकिएको पनि हुन सक्छ ।’ उद्दार गरिएकामध्ये ७० जनालाई पोखरामा झारिसकेको उनले जानकारी दिए । अन्य एक सयलाई छोम्रोङमा राखिएको बताइएको छ । कोरियाली दूताबासले हराएका आफ्ना नागरिकहरूलाई खोज्न शनिबार बिहानैदेखि हेलिकोप्टरको परिचालन गरिरहेको छ । जिल्ला प्रशासन कार्यालय कास्कीका प्रमुख जिल्ला अधिकारी रमेशकुमार केसीले हराएका ७ को उद्दारका लागि प्रहरी टोली निरन्तर खटिइरहेको बताए ।
हिमपातको कारण मनाङबाट मुस्ताङ उक्लिन लागेको ४ चिनियाँ पनि हराइरहेको गण्डकी प्रदेश प्रहरीले जनाएको छ । ६ वर्षअघि बेसक्याम्पमा हिमआँधी आएर २ सयको हाराहारीमा मृत्यु भएको टानका अध्यक्ष हरि भुजेलले बताएका छन् । हिमपातले शिविरबाट निस्कन नसकेका पदयात्री र पदप्रदर्शकलाई हेलिकोप्टरबाट सुरक्षित स्थानमा ल्याइसकिएको प्रशासनको भनाइ छ ।
उद्दारका लागि टानले हेलिकोप्टर तयार पारेर राखेको जनाएको छ । हेलिकोप्टरले पदयात्री र पथप्रदर्शकलाई बोकेर दिनभरजसो पोखराको आकाशमा उडेको थियो ।
बिहीबारदेखि भएको मौसममा परिवर्तनसँगै हिमाली तथा उच्च पहाडी क्षेत्रमा बाक्लो हिमपात भएको छ, जसका कारण जनजीवन कष्टकर बनेको छ । मौसम पूर्वानुमान महाशाखाका अनुसार आइतबारबाट मौसममा सुधार हुने भएको छ ।
