काठमाडौं– प्रधानमन्त्री केपी शर्मा ओलीले सरकारका राम्रा कामहरूको समाचार नबनेको भन्दै गुनासो गरेका छन् । सरकारले काठमाडौंलाई सडक मानवमुक्त बनाए पनि प्रशंशामा लेख्ने बोल्ने सञ्चारमाध्यम नभएको उनको गुनासो छ ।
नेपाल चेम्बर अफ कमर्सका व्यवसायीहरूसँग मंगलबार भएको भेटमा प्रधानमन्त्री ओलीले भने, ‘राम्रो कामको प्रशंसा गर्ने मन मुटु भएका सम्पादक छैनन् । कसैले छ्यास्सछुस्स कसैले लेखिहाल्यो भने पनि राम्रा कुरा गर्न थालिस् भनेर गाली खान्छ ।’
प्रधानमन्त्री ओलीले पहिले–पहिले बालबालिकाहरू कुकुरसँग लडाइँ गरेर खानेकुरा टिपिरहेको देख्ने स्मरण गर्दै भने, ‘यो सरकार आएपछि काठमाडौंका सडकमा बालबालिका छैनन् । उनीहरूलाई राख्ने, बस्ने, पढाउने प्रबन्ध मिलाइएको छ ।’
उनले केही समय अघिसम्म मान्छेहरू सडकमा लडिरहेको भन्दै भने, ‘झिँगा भन्किराख्या हुन्थ्यो, कुकुरसँग सुतिराख्या हुन्थ्यो तर आज त्यस्ता व्यक्तिहरू सडकमा छैनन् ।’ प्रधानमन्त्री ओली भने, ‘उनीहरूलाई सडकबाट उठाएर राख्ने प्रबन्ध मिलाएका छौँ । ठग बेघरलाई घर पठाइदिने र साँच्चिकै बेघर भएकाहरूको व्यवस्थापन आएका छौँ । हेर्दा यो साना कुरा लाग्छ तर सामाजिक रूपमा अर्थ छ । तर, हामीले गरेका त्यस्ता कामहरूको प्रशंसामा लेख्ने पत्रपत्रिका छैन । प्रशारण गर्ने टेलिभिजन छैन । प्रशंसा गर्ने मन मुटु भएका सम्पादक छैनन् । यदि कसैले छ्यास्सछुस्स लेखिहाल्यो भने पनि गाली खान्छ । राम्रा कुरा गर्न थालिस्, सकारात्मक कुरा गर्न थालिस्, बिग्रिन्छस् भन्छन् ।’
प्रधानमन्त्री ओलीले लगानीमैत्री वातावरण बनाउन ऐन कानुन संशोधन गर्नुपर्ने भए पनि सरकार तयार रहेको बताएका छन् । पहिलो आफूले रेल र पानीजहाजको कुरा गर्दा कतिपयले ठट्टामा उडाएको तर अहिले धमाधम काम भइरहेको उनले सुनाए । दृढ एकता र सहिष्णुताको पुँजीलाई देश निर्माणमा सदुपयोग गर्न उनको जोड थियो ।
साथै, प्रधानमन्त्री ओलीले थारु समुदायको प्रमुख चाड माघी तथा नेपालका सबैजसो भूभागमा मनाइने माघेसंक्रान्तिका अवसरमा स्वदेश तथा विदेशमा रहेका नेपाली दिदीबहिनी तथा दाजुभाइमा सुस्वास्थ्य, सुख, शान्ति, समृद्धि र उत्तरोत्तर प्रगतिको कामना गरेका छन् ।
नेपाल बहुजातीय, बहुभाषिक, बहुधार्मिक र बहुसांस्कृतिक विविधताका बीच सुदृढ एकताको विशेषतायुक्त देश भएको र यहाँ प्रचलित बहुमूल्य सम्पत्तिका रूपमा रहेका पर्वलाई सरकारले संरक्षण गर्दै आएको बताउँदै प्रधानमन्त्री ओलीले सुदृढ एकता र सहिष्णुताको यस पुँजीलाई देश निर्माणमा सदुपयोग गर्नुपर्नेमा जोड दिएका छन् ।
सूर्य दक्षिणी गोलाद्र्धबाट उत्तरी गोलाद्र्धमा प्रवेश गर्ने समयमा हरेक वर्षको १ माघमा देशका विभिन्न भागमा विभिन्न तरिकाले यो पर्व मनाइने गरिन्छ । माघी पर्वका अवसरमा उनले दिएको सन्देशमा भनिएको छ, ‘हाम्रो देशका हरेक जातिले मनाउने मौलिक पर्वहरू यहाँको प्राचीन संस्कृतिसँग मात्र होइन, प्राकृतिक विज्ञानसँग पनि सम्बन्धित छन् । यी पर्वहरूले हामीलाई परस्पर सहिष्णुता, सद्भाव र सुदृढ एकतामा आबद्ध गरेका छन् । माघे संक्रान्तिमा मासको दाल र चामल मिसाइएको खिचडी, घिउ–चाकु–तिलको लड्डु, सागपात, तरुल खाने चलन छ । जाडो याममा शरीरलाई तातो राख्ने पोषिला परिकार खाने तथा नदी किनार तथा त्रिवेणीहरूमा स्नान गर्ने यस पर्वको विशेषता शरीर विज्ञानका हिसाबले पनि उपयोगी छ ।
माघीलाई थारू जातिको मौलिक संस्कृतिले भरिएको सबैभन्दा ठूलो पर्वको रूपमा लिइन्छ । पुस मसान्तमा घरघरमा माछामासु र ढिकरी (पिठोको एक परिकार)खाई रातभर मघौटा नाच नाच्ने चलन छ ।
