काठमाडौं- नेपाली कांग्रेसको निर्वाचन लक्षित अभियार्न जनताको साथमा कांग्रेस’ आजदेखि सुरु भएको छ ।नेपाली कांग्रेसले आगामी प्रतिनिधिसभा र प्रदेशसभा निर्वाचनको तयारी लागि शुक्रबारदेखि देशभर एकसाथ ‘जनताको साथमा कांग्रेस’ अभियान सुरु गरेको हाे।
यस अभियानको पहिलो चरण आज (भदौ १० गते)देखि विपी जन्मजयन्ती अर्थात भदौ २४ गतेसम्म सञ्चालन हुने पार्टी कार्यालयले जनाएको छ । अभियानका लागि ७७ वटै जिल्लामा केन्द्रीय प्रतिनिधि खटाइएको छ ।
अभियानको दोस्रो चरण समानुपातिक उम्मेदवारी दर्ता भएपछि र तेस्रो तथा निर्णायक चरण प्रत्यक्षतर्फ उम्मेदवारी दर्तापछि सुरु गरिने सो पार्टीले जनाएको छ ।
मतदानमा सहभागी भई आफ्नो लोकतान्त्रिक अधिकार प्रयोग गर्न मतदातालाई अपिल गर्ने, मतदातासँग अन्तर्क्रिया गर्ने राष्ट्रिय राजनीतिको अवस्था, गठबन्धनको औचित्य र आफ्ना एजेन्डाबारे प्रचार प्रसार गर्ने अभियानको लक्ष्य रहेको कांग्रेसले जनाएको छ ।
अभियानको मुख्यरूपमा चार उद्देश्य रहेका छन् ।कांग्रेसले लिएको नीति, कांग्रेस नेतृत्वमा विगतमा हासिल राजनीतिक र आर्थिक उपलब्धि एवं समसामयिक विषयमा कांग्रेसले लिएका अडानबारे जनतालाई सुसूचित गर्ने र निर्वाचनमा कांग्रेसलाई विजयी गराउने पक्षमा माहौल बनाउने तथा निर्वाचनमा तालमेल गरेर जानुपरेको विषय र वस्तुस्थिति पार्टी पङ्क्ति र जनतासमक्ष राख्ने अभियानको उद्देश्य हो ।
आगामी मंसिर ४ मा हुने प्रतिनिधिसभा तथा प्रदेशसभा निर्वाचनमा मतदानमा सहभागी भई आफ्नो लोकतान्त्रिक अधिकार प्रयोग गर्न मतदातालाई अपिल गर्ने अभियानको उद्देश्य छ । यसैगरी जनताको घर आँगनमा पुग्ने, कांग्रेसलाई जनता के सुनाउन चाहन्छन् सुन्ने, जनताको भावना बुझ्ने र जनताको भावनाअनुरूपको रुपान्तरण र विकास परियोजनाबारे जनतासँग विविध ढंगले अन्तक्रिया गर्ने उद्देश्य रहेको प्रवक्ता महतले बताए ।
गाउँ-नगरपालिका कार्यसमितिको संयोजनमा अभियानकै बीचमा हरेक स्थानीय तहमा एउटा पालिकास्तरीय सार्वजनिक कार्यक्रम हुनेछ । तर मूलतःसम्पूर्ण अभियान टोल समितिलाई अग्रसर बनाएर टोलकै नेतृत्वमा सम्पन्न गरिने पार्टी कार्यालयले जनाएको छ ।
यसैगरी विधानबमोजिम गठन गर्नुपर्ने टोल कार्यसमितिले पूर्णता नपाएको भए अभियानका क्रममा टोल समितिलाई पूर्णता दिनुपर्नेछ । कतिपय टोलका संयोजक पद यो वा त्यो कारणले रिक्त रहेको वा कुनै पदाधिकारी वा सदस्य पद रिक्त भएको भए यो अभियानको यो अवधि पूर्णता दिनुपर्ने पार्टीद्वारा जारी विज्ञप्तिमा उल्लेख छ ।
यसैगरी भ्रातृ र शुभेच्छुक संस्थाले आफ्नो संगठनको प्रकृतिअनुसारको संरचना, खासगरी स्थानीय तहको वडासम्मको संरचनालाई अभियानको अवधिमा पूर्णता दिइने प्रवक्ता डा.महतले जानकारी दिए ।अभियानमा संघीय र प्रदेश राजधानीमा रहेका जिल्ला सम्पर्क समितिको बैठक गर्ने, समितिको संरचनालाई पूर्णता दिने, समितिअन्तर्गत विभिन्न जिम्मेवारी बाँडफाँट गरिनेछ ।
पार्टीको जिल्ला समितिसँग समन्वय गरेर प्रतिनिधिसभा क्षेत्र, प्रदेशसभा क्षेत्र एवं पालिका तहसम्मको सम्पर्क समिति अभियान क्रममा विस्तार गर्ने तथा राजधानी आई अध्ययन, व्यवसाय आदिमा सरिक आफ्नो जिल्लाका नागरिकबीच सम्पर्कमा पुग्ने र विवरण संकलनसमेत गरिनेछ ।
अभियानमा विदेशस्थित नेपाली जनसम्पर्क समितिले आफ्नो कर्म क्षेत्रमा रहेका सदस्य, समर्थक र शुभचिन्तकलाई मातृभूमिमा हुन लागेको चुनावमा आआफ्नो क्षेत्रमा विविध ढंगले सम्पर्क, सुझाव र सहयोगका लागि सक्रिय बनाउने तथा सामाजिक सञ्जालमार्फत अभियानलाई बल पुर्याउने जनाइएकाे छ।
