काठमाडौं– सत्तारुढ दल नेपाल कम्युनिस्ट पार्टी (नेकपा)मा दुई अध्यक्षको अडानले गर्दा लामो समयदेखि सभामुख चयन हुन सकेको छ्रैन । यसैलाई मध्यनजर गर्दै शनिबार नेकपाले उपसभामुख डा.शिवमाया तुम्बाहाम्फेलाई पदबाट राजीनामा गराउने निर्णय गरेको छ ।
प्रधानमन्त्रीको निवास बालुवाटारमा शनिबार बसेको सचिवालय बैठकले उपसभामुख डा.तुम्बाहाम्फेलाई राजीनामा गर्न लगाउने निर्णय गरेको हो । नेकपाबाट उपसभामुख बनेकी डा.तुम्बाहाम्फेलाई राजीनामा गराएर सभामुख निर्वाचन प्रक्रिया अगाडि बढाउने गरी निर्णय भएको प्रवक्ता नारायणकाजी श्रेष्ठले जानकारी दिएका छन् ।
नेकपाका अध्यक्षद्वय केपी ओली र पुष्पकमल दाहालले सभामुखका लागि चट्टानी अडान लिँदा सहमति हुन नसकेको हो । साथै, सभामुख र उपसभामुख चयनका बाटो खुलाउन उपसभामुख डा.तुम्बाहाम्फेलाई पार्टीले पटक–पटक अनुरोघ गर्दै आएको छ ।
‘आजको सचिवालय बैठकले प्रतिनिधिसभामा रिक्त सभामुख पदको सन्दर्भमा निर्णय गरेको छ,’ बैठकपछि प्रवक्ता श्रेष्ठले भने, ‘रिक्त पदमा हाम्रो पार्टी नेकपाको तर्फबाट उम्मेदवारी दिनेछ, त्यसका लागि हाम्रो पार्टीका तर्फबाट उपसभामुख पदमा निर्वाचित माननीय शिवमाया तुम्बाहाम्फेले राजीनामा दिने निर्णय गरेको छ ।’
उपसभामुखले राजीनामा दिएपछि मात्र सभामुख को बन्ने भन्ने टुंगो लाग्ने श्रेष्ठको भनाइ छ । सभामुखको टुंगो नलाग्दा ४ पुस यता प्रतिनिधिसभाको बैठक बस्न सकेको छैन । ११ र १६ पुसमा सूचना टाँसेर बैठक स्थगित भएको थियो । अर्को बैठक आइतबा बस्दै छ ।
सभामुखको दौडमा नेकपाभित्र पूर्वएमालेको तर्फबाट सुवास नेम्वाङ र पूर्वमाओवादी केन्द्रको तर्फबाट अग्नी सापकोटा र पम्फा भुसालको नाम चर्चामा छ । सभामुख र उपसभामुख एउटै पार्टीको नहुने संवैधानिक प्रावधानले गर्दा उपसभामुखलाई राजीनामा गराएर नेकपाले सभामुखको निर्वाचनमा जाने तयारी गरेको हो ।
तर, अझै पनि उपसभामुख डा.तुम्बाहाम्फे राजीनामा दिने मुडमा देखिएकी छैनन् । तुम्बाहाम्फेले शनिबार भएको पार्टी निर्णय आफूलाई थाहा नभएको बताएकी छन् । प्रधानमन्त्रीको सरकारी निवास बालुवाटारमा बसेको नेकपा सचिवालय बैठकले राजीनामा दिन निर्देशन दिएलगत्तै उपसभामुख तुम्बाहाङफेले निर्णयबारे आफूलाई थाहा नभएको भन्दै राजीनामा नदिने बताएकी छन् ।
नेकपाबाट उपसभामुख बनेकी तुम्बाहाम्फेलाई राजीनामा गराएर सभामुख निर्वाचन प्रक्रिया अगाडि बढाउने गरी नेकपा सचिवालयले गरेको निर्णय नमान्ने उनको अडान छ । उनले भने, ‘मलाई पार्टीको निर्णय थाहा छैन, त्यसैले अहिले राजीनामा दिन्नँ ।’
