बग्दाद– इराकस्थित अमेरिकी सैन्य आधार शिविरमा इरानले बुधबार क्षेप्यास्त्र आक्रमण गरेको छ । अमेरिकी र इरानी दुवैतर्फका अधिकारीहरूले आक्रमणको पुष्टि गरेका छन् । इरानले उक्त आक्रमणमा ५० भन्दा बढी अमेरिकी सेना मारिएको दावी गरेको छ । तर, अमेरिकाले भने केही बताएको छैन ।
अमेरिकी रक्षा मन्त्रालयले इराकमा रहेको आफ्नो सैन्य आधार शिविर तथा गठबन्धन सुरक्षा फौजमाथी इरानी पक्षले एक दर्जनभन्दा बढी क्षेप्यास्त्र प्रहार गरेको जनाएको छ । ‘इरानी पक्षले इराकस्थित कम्तीमा पनि दुई ओटा अमेरिकी सैन्य आधार शिविर र गठबन्धनका कर्मचारी रहेको ठाउँलाई लक्षित गरी आक्रमण गरेको प्रष्ट छ’ पेन्टागनले भनेको छ ।
पेन्टागनका अनुसार पश्चिमी बग्दादस्थित अरबिल र अल असदमा रहेका अमेरिकी सैन्य आधार शिविरहरूमा क्षेप्यास्त्र प्रहार गरिएको हो । घटनामा परी मानवीय क्षति भएको वा नभएको बारेमा अहिलेसम्म जानकारी नआएको अमेरिकी अधिकारीहरूले जनाएका छन् । अमेरिकी रक्षा मन्त्रालयले घटनास्थलमा उच्च सतर्कता अपनाइएको जनाएको छ । अमेरिका र इरानले एक अर्काका विरुद्धमा कडा चेतावनी दिइरहेका बेला यो आक्रमणको घटना भएको हो ।
गत शुक्रबार अमेरिकी राष्ट्रपति डोनाल्ड ट्रम्पको आदेशमा बग्दादमा भएको इरानी सैन्य कमाण्डर कासिम सुलेमानीको हत्याको बदला लिन ती क्षेप्यास्त्रहरू प्रहार गरिएको इरानको सरकारी टेलिभिजनले जनाएको छ । इराकको राजधानी बग्दादस्थित विमानस्थल नजिकै इरानी सैन्य कमाण्डर सुलेमानी मारिएपछि इरान र अमेरिकाबीच तनाव उत्कर्षमा पुगेको हो ।
इरानले उक्त हत्याको बदला लिने बताउँदै आएको छ भने अमेरिकाले पनि इरानले ठूलो मुल्य चुकाउनु पर्ने चेतावनी दिएको छ ।
यसैबीच अमेरिकाले खाडी क्षेत्रको आकाशमा संकटकाल जारी गरेको छ । अमेरिकाको हवाई उड्ययन विभाग फेडरल एभियन फेडरेसन ‘एफएए’ले इराक, इरान र पर्सियाली खाडिमाथिको आकाशमा हवाई उडान रोक लगाएको छ ।
इरानले इराकस्थित अमेरिकी फौजको हवाई बेश क्याम्पमा मिसाइल आक्रमण गरेको केही समयपछि एफएएको उक्त आकस्मिक निर्देशन आएको हो । एफएएले अमेरिकी हवाई सेवा प्रदायकलाई गलत मुल्यांकन र गलत पहिचानका आधारमा सम्भावित आक्रमणका हुन सक्ने भएकाले उडानमा रोक लगाएको जनाएको छ ।
नेपाली सेना सुरक्षित
यस्तै, इरान र अमेरिकाबीच तनाव बढेपछि विश्वको ध्यान इरानतिर मोडिएको छ । अमेरिकाले गत हप्ता वरिष्ठ इरानी सैन्य नेता कासिम सुलेमानीलाई बग्दादमा मारिदिएपछि दुई देशबीच तनाव चुलिएको छ ।
यसैबीच, नेपाली सेनाले इराकमा शान्ति स्थापनाका लागि खटिएका नेपाली शान्ति सैनिकलाई सतर्क रहन निर्देशन दिएको छ । अमेरिकी सेनाको बेसक्याम्पमा मिसाइल आक्रमण हुन थालेपछि नेपाली सेनाले इराकमा रहेका नेपाली शान्ति सैनिकलाई सतर्कता अपनाउन निर्देशन दिएको हो ।
शान्ति स्थापनाका लागि इराकमा तैनाथ नेपाली सेनाको गार्ड युनिटलगायत लेबनान र सिरियामा तैनाथ नेपाली सेनाका युनिटमा पनि विशेष सतर्कता अपाउन निर्देशन दिएको सेनाको जनसम्पर्क तथा सूचना निर्देशनालयले जनाएको छ । नेपाली सेनाले बुधबार विज्ञप्ति जारी गर्दै अहिलेसम्म नेपाली शान्ति सैनिक सकुशल रहेकोसमेत जानकारी दिएको छ ।
