काठमाडौं - निवर्तमान अर्थमन्त्री जनार्दन शर्माले अनधिकृत ब्यक्तिलाई बजेट निमार्णमा संलग्न गराएर करको दायरा हेरफेर गरेको बिषयमा छानबिन गर्न गठित छानबिन समितिले आज सोमबार अर्थ मन्त्रालयको ‘हार्ड डिस्क’ अध्ययन गर्ने भएको छ ।
जेठ महिनाको सीसीटीभी फुटेज डिलिट भयो भनेर अर्थ मन्त्रालयले समितिलाई सीसीटिभी फुटेज दिन आनाकानी गरेपछि हार्ड डिस्क मगाएर समितिले अध्ययन गर्न लागेको हो ।
समिति सदस्य लक्ष्मणलाल कर्णले जेठ महिनाको सीसीटीभी फुटेजको हार्ड डिस्क मगाएको जानकारी दिए । उनले भने, ‘त्यो प्राप्त भयो भने प्रावधिक राखेर अध्ययन गर्नेछौं ।’
उनका अनुसार हिजो राति ८ बजेसम्म पनि समितिले सो प्रकरणका बारेमा सरोकारवाला व्यक्तिसँग बयान, छानविन र अध्ययन गरेको थियो ।
जेठ महिनाको सीसीटीभी फुटेज माग्दा असारको दिएपछि सो प्रकरण थप रहस्य बन्दै गएको छ । समितिले जेठ महिनाको सीसीटीभी फुटेजका लागि पुन ताकेता गरिरहे पनि अर्थ मन्त्रालय भने अझै दिएको छैन ।
समितिका सचिव सुरेन्द्र अर्यालले प्रावधिक अध्ययन सकिएपछि सो प्रकरणमा राजिनामा दिएका निवर्तमान अर्थमन्त्री जनार्दन शर्मालाई बोलाएर बयान लिने तयारी भइरहेको बताए ।
उनले भने, ‘प्रावधिक अध्ययन सकिएपछि जनार्दन शर्मासँग बयान लिने बारेमा समितिमा छलफल भएको छ ।’
