काठमाडौं– नेपाली कांग्रेसमा आन्तरिक विवाद चुलिँदै गइरहेका बेला असन्तुष्ट पक्ष बरिष्ठ नेता रामचन्द्र पौडेलनिकट जिल्ला सभापतिहरू राजधानीमा छलफलमा जुटेका छन् ।
सभापतिहरूको दोस्रो दिनको भेलामा उनीहरूले पार्टीभित्र विकसित भएको परिस्थितिलाई समाधान गरेर अगाडि बढ्न सुझाव दिएका छन् । वरिष्ठ नेता पौडेल समूहले बोलाएको
‘जिल्ला सभापति परामर्श बैठक’मा उनीहरूले केन्द्रीय नेतृत्वलाई सहमतिका साथ एक ठाउँमा बसेर चौधौँ महाधिवेशनको तयारीमा जुट्न सुझाव दिए । साथै जिल्ला सभापतिहरूले लोकतन्त्रमाथि खतरा उत्पन्न भएको अवस्थामा समग्र पार्टी एक ढिक्का भएर अघि बढ्नुपर्ने र पार्टीका नेतामा वैमनस्य नहुुनुपर्नेमा जोड दिएको दैलेखका सभापति कृष्णकुमार बिसीले जानकारी दिए ।
संस्थापन पक्षले केन्द्रीय समिति बैठकबाट बहुमतका आधारमा निर्णय गरेको भन्दै असन्तुष्ट बनेको नेता पौडेल समूहले सुझाव लिन जिल्ला सभापतिको भेला बोलाएको हो । शनिबार बैठकमा केन्द्रीय नेताहरू कृष्णप्रसाद सिटौला, अर्जुननरसिंह केसी, डा.रामशरण महत र डा शेखर कोइरालाले पार्टीको वर्तमान परिस्थितिका बारेमा आफ्ना धारणा राखेका थिए ।
केन्द्रीय समिति बैठकबाट महासमिति भेलाले गरेको निर्णय लत्याउने काम गएको, निलम्बन गरिएका विधानका दफा फुकुवा गर्नुपर्ने र बहुमतका आधारमा गरिएका निर्णय सच्याउनुपर्ने बारेमा चारै नेताले जोड दिएको नुवाकोटका सभापति जगदीशनरसिंह केसीले बताए ।
केन्द्रीय समिति बैठकले यही ११ पुसमा पार्टीको चौधौँ महाधिवेशन ०७७ साल ७ फागुनदेखि १० गतेसम्म गर्ने र केन्द्रीय समितिको समयावधि एकवर्ष थप गर्नेलगायत महत्वपूर्ण निर्णय बहुमतका आधारमा गरेको थियो । सो बैठकले महाधिवेशनको प्रयोजनार्थ विधानका केही दफा निलम्बन गर्ने, विधानमा उल्लेख २८ केन्द्रीय विभागको संख्या ४७ पु¥याउने, तरुण दलको म्याद छ महिना थप गर्नेलगायतका निर्णय पनि गरेको थियो ।
‘जिल्ला सभापति परामर्श बैठक’मा सोमबार वरिष्ठ नेता पौडेल र महामन्त्री डा शशांक कोइरालाले पार्टीको पछिल्लो अवस्था र केन्द्रीय नेतृत्वसँग भएका छलफलका बारेमा जानकारी गराएका थिए । । त्यस्तै, पूर्वमहामन्त्री प्रकाशमान सिंहले सहमतिका लागि गरिएका प्रयास बारेमा जानकारी गराएक थिए ।
बैठकमा नेता पौडेल समूहका ४१ जिल्ला सभापति र दुई जिल्ला सभापतिका प्रतिनिधि सहभागी छन् । आज बुधबारसम्म चल्ने बैठकमा सोमबार र मंगलबार गरी २८ जिल्ला सभापतिले आफ्ना धारणा राखेको रोल्पाका सभापति अमर पुनले जानकारी दिए । भेलामा नेता पौडेल समूहका केन्द्रीय सदस्य र पदाधिकारी पनि उपस्थित रहेको छ ।
बैठकमा सबै नेतालाई एक थलोमा राखेर महाधिवेशनको कार्यतालिका निर्माण गर्दै अघि बढोस् भन्ने सुझाव आएको र त्यही सुझाव पार्टी सभापतिसहित सबै नेतालाई बैठक समापनपछि दिने जिल्ला सभापतिहरूले बताएका छन् ।
यस्तै, जिल्ला सभापतिको बैठक चलिरहँदा पार्टी केन्द्रीय कार्यालयमा पुगेका सहमहामन्त्री डा प्रकाशशरण महतले पार्टी सभापति शेरबहादुर देउवाले सहमति जुटाउन पटकपटक केन्द्रीय समिति बैठक सार्नुभएको जानकारी गराएका थिए ।
महाधिवेशनमा केन्द्रित भएर अघि बढ्नुपर्ने बताउँदै उनले भने, ‘महाधिवेशनको मिति तोकिएको छ । त्यसको कार्यतालिकामा के परिमार्जन गर्नुपर्छ, त्यसमा ‘सभापति’ जहिले पनि खुला हुनुहुन्छ । महाधिवेशनको कार्यतालिका माग भएको अवस्थामा धेरै समय अन्योलमा बस्नु हुँदैन भनेर मिति घोषणा गरिएको हो ।’
नागरिकका अधिकार कुण्ठित गर्ने बाटोमा वर्तमान सरकार हिँडेको आरोप लगाउँदै नेता महतले यस्तो बेला पार्टीमा सानो कुरालाई ठूलो बनाएर प्रस्तुत हुँदा कसैलाई फाइदा नहुने धारणा व्यक्त गरे । उनले भने, ‘हाम्रो ऊर्जालाई तितरवितर गर्नुको सट्टा एकीकृत भएर महाधिवेशनको प्रक्रियामा अघि बढ्ने र लोकतन्त्रको रक्षाका लाग पार्टी केन्द्रीत हुनुपर्छ । एकवर्ष समयावधि थप गर्ने र फागुनमा महाधिवेशन गर्ने बारेमा कुनै विमति नै छैन ।’
यसैबीच पार्टीभित्र देखिएको विवाद अन्त गर्न सभापति शेरबहादुर देउवा सहमत भएका छन् । ११ पुसको पार्टी निर्णय सच्याउन तयार भएका हुन् । बहुमतबाट गरिएको निर्णय नमान्ने भन्दै जिल्ला सभापति भेला बोलाएको असन्तुष्ट समूहलाई सहमतिमा ल्याउन सभापति देउवा अग्रसर भएको बताइएको छ ।
बरिष्ठ नेता पौडेल समूहले १४औँ महाधिवेशनको कार्यतालिका सार्वजनिक, क्रियाशील सदस्यतासम्बन्धी विधानको धारा निलम्बन गर्ने र विभाग संख्या बढाउने निर्णय सच्याउनुपर्ने अडान राखेपछि सभापति देउवा सकारात्मक देखिएका हुन् । ‘महाधिवेशनको मिति यथावत राखेर बा“की कार्यतालिकामा सहमतिका लागि सभापति तयार हुनुहुन्छ,’ कांग्रेस केन्द्रीय सदस्य एनपी साउदले भने, ‘उहाँहरूले राखेका असहमतिका सबै विषयमा छलफल गर्न र समाधान निकाल्न सभापतिज्यू सकारात्मक हुनुहुन्छ ।’
