काठमाडौं- प्रमुख प्रतिपक्ष नेकपा एमालेले स्थानीय निर्वाचनमा पार्टीभित्र देखिएको आरोप–प्रत्यारोप र आपसी आशंकाको धङधङीबाट मुक्त भएर आसन्न प्रतिनिधिसभा र प्रदेशसभाको निर्वाचन तयारीमा केन्द्रित हुन अन्तरपार्टी निर्देशन (अपानि) जारी गरेको छ ।
‘असमझदारीलाई छलफलद्वारा, असहयोगलाई आलोचनाद्वारा र अन्तर्घातलाई कारबाहीका माध्यमबाट सम्बोधन गर्ने,’ एमाले अध्यक्ष केपी शर्मा ओलीले मातहतका कमिटीलाई दिइएको निर्देशनमा भनिएको छ, ‘आपसी अन्तरविरोधका कारण कारबाहीको दायरा अनावश्यकरूपमा फराकिलो नहोस् भन्ने कुरामा विशेष सजगता अपनाउने । प्रमाणित र पुष्टि भएका अन्तर्घातका सीमित घटनामा विधि पु¥याएर विनामोलाहिजा नगर्ने ।’
एमालेको सो अपानि–४ मा सत्ता गठबन्धन, पार्टीभित्रका समस्या र अन्तर्घातकाबीच स्थानीय निर्वाचनमा लोकप्रिय मतमा एमाले अगाडि रहे पनि निर्वाचित पदमा दोस्रो हुन पुगेको स्वीकार गरिएको छ । एमालेको केन्द्रीय सचिवालयको नवौं बैठक (२०७९ जेठ ३०) र दशौं बैठक (यही असार १९) गतेका निर्णय पार्टीका तल्ला कमिटीलाई जानकारी गराउन जारी निर्देशनमा निर्वाचनको मूल सन्देश र शिक्षालाई स्थापित गर्ने तथा प्रतिरक्षात्मक मनोविज्ञानलाई अन्त्य गर्ने भनिएको छ ।
त्यसका लागि यही असार मसान्तभित्र सबै पालिकाको निर्वाचन समीक्षा सम्पन्न गरी त्यसको प्रतिवेदन केन्द्रमा पठाइसक्ने, निर्वाचनको तयारी, परिचालन र मत रक्षामा कहाँ–कहाँ कमी रह्यो भन्ने निर्वाचन समीक्षाबाट निकालिएका निष्कर्षको सूची बनाएर विगतको कमी कमजोरीलाई नदोहो¥याउने सुनिश्चित गर्ने र स्थानीय निर्वाचनको परिणामलाई आधार बनाएर प्रतिनिधिसभा निर्वाचन क्षेत्र र प्रदेशसभा निर्वाचन क्षेत्रको अलग–अलग विश्लेषणसहित शक्ति सन्तुलनको अद्यावधिक समीक्षा गर्ने निर्देशनमा उल्लेख छ ।
यस्तै, पार्टीको आन्तरिक एकतालाई सुदृढ गर्न स्थानीय निर्वाचनका क्रममा र त्यसभन्दा पहिले पनि रहेका असमझदारी रहेको भए खुलस्त छलफल, आलोचना–आत्मालोचना र अन्य विधिमार्फत समाधान गर्ने र पार्टी एकतालाई बलियो बनाउने, पार्टीभित्र उत्पन्न समस्यामध्ये कुनचाहिँ असमझदारी हो, कुन असहयोग हो र कुनचाहिँ अन्तर्घात हो भन्ने कुराको वस्तुनिष्ठ, निष्पक्ष र सन्तुलित पहिचान गर्ने एमालेको निर्णय रहेको छ ।
एमालेले स्थानीय तहको निर्वाचनमा भएको अन्तर्घातबारे छानबिन गर्न उपाध्यक्ष विष्णु पौडेलको संयोजकत्वमा कार्यदल गठन गरेको थियो भने आमनिर्वाचनलाई ध्यानमा राखेर सातै प्रदेशमा प्रशिक्षण सञ्चालन गर्न जिम्मेवारी दिएको छ ।गत वैशाख ३० गते सम्पन्न स्थानीय तहको निर्वाचनमा नेपाली कांग्रेसले ३२९, एमालेले २०६, नेकपा माओवादी केन्द्रले १२१, जनता समाजवादी पार्टी जसपाले ३०, नेकपा एकीकृत समाजवादीले २०, लोकतान्त्रिक समाजवादी पार्टीले १६ र अन्य पार्टी तथा स्वतन्त्र उम्मेदवारले ३१ पालिकामा प्रमुख÷अध्यक्ष जितेका छन् ।
देशभर कूल निर्वाचित जनप्रतिनिधि संख्यामध्ये कांगे्रसले ४०, एमालेले ३४ र माओवादी केन्द्रले १४ प्रतिशत पदमा जित हासिल गरेका छन् । अघिल्लो निर्वाचनमा पहिलो स्थानमा रहेको एमालेले पालिकाका प्रमुख÷अध्यक्षले प्राप्त गरेको समग्र मतको विश्लेषण गर्दा यस निर्वाचनमा पनि एमाले पहिलो स्थानमा कायमै रहेको सो पार्टीको बुझाइ रहेको छ । एमालेले अघिल्लो निर्वाचनमा सदर कूल मतको एकतिहाइ मत (३३ प्रशित) हासिल गरेको थियो भने यस निर्वाचनमा लोकप्रिय मतमा एक प्रतिशत (३४ प्रतिशत) वृद्धि गरेको छ ।
एमालेबाट चोइटिएर बनेको नयाँ दल नेकपा (एकीकृत समाजवादी)ले चार प्रतिशत मात्र मत प्राप्त गरेको छ । एमालेले जनसरोकारका विषयमा सबै स्थानीय पार्टी कमिटी र जनसंगठनले विरोध कार्यक्रम सञ्चालन र जनदबाब सिर्जना गर्ने नीति पनि तय गरेको छ । एमालेले केन्द्रीय सल्लाहकार परिषद्लाई पूर्णता दिँदै विभिन्न केन्द्रीय विभागका सचिव पनि तोकेको छ ।
