काठमाडौं– केही समयअघि काठमाडौंबाट पक्राउ परेका १२२ जना चिनियाँ नागरिकको राहदानी रद्द हुने भएको छ । उनीहरूलाई बुधबार चार्टर विमानबाट चीन डिपोर्ट गरिँदै छ ।
चिनियाा दूतावासले उनीहरूको राहदानी रद्द गर्ने जनाएको छ । प्रवेशाज्ञा दुरूपयोग गरी शंकास्पद गतिविधिमा संलग्न रहेको आरोपमा उनीहरू काठमाडौंबाट पक्राउ परेका थिए । उनीहरूको राहदानी एकमुष्ठ रद्द गरी नयाँ ट्राभल डकुमेन्ट जारी गर्ने तयारी दूतावासले गरेको छ ।
कतिपय चिनियाँ नगारिकसँग राहदानी भएर पनि व्यक्ति फरार रहेको प्रहरीले जनाएको छ । प्रहरीका अनुसार ९६ जनाको राहदानी छैन । बाँकी २६ जनाको राहदानी प्रहरीसँग छ । राहदानी हराए दूतावासले नयाँ उपलब्ध गराउँदै आएको थियो ।
राहदानीबेगर पक्राउ परेकालाई ट्राभल डकुमेन्टका आधारमा चीन फर्काउने तयारी रहेको जनाइएको छ । त्यसका लागि प्ररहीले दूतावाससँग समन्वय गरिरहेको बताइएको छ । ट्राभल डकुमेन्टमा भिसा नियमित गरी पक्राउ परेकाहरूलाई बुधबार चीन डिपोर्ट गरिँदै छ ।
उनीहरूलाई लिन बुधबार बिहान र बेलुका दुई सिफ्टमा चीनबाट दुईवटा जहाज काठमाडौं आउँदै छ । चीन सरकारले काठमाडौंमा पक्राउ परेका आफ्ना नागरिकलाई चार्टर विमान गरेर फिर्ता लैजाने लागेको हो । त्यसका लागि चीनले चाइना साउदन र चाइना वेस्टर्न नामका दुई विमान नेपाल पठाउन लागेको स्रोतले जनाएको छ । ती जहाज अवतरण गराउन दूतावासले नागरिक उड्डयन प्राधिकरणबाट अनुमति लिइसकेको छ ।
प्रहरीले हिरासतमा रहेका ती चिनियाँ नागरिकको कागजपत्र बुझाएपछि अध्यागमन विभागले निष्काशन प्रक्रिया थाल्ने भएको छ । विभागका महानिर्देशक ईश्वरराज पौडेलका अनुसार पक्राउ परेका शंकास्पद सबै चिनियाँलाई निष्काशन गरिँदै छ ।
उनले भने, ‘उनीहरूले व्यापारिक र पर्यटक भिसा दुरूपयोग गरेका छन् । सोहीबमोजिम कारबाही गरी निष्काशन गछौँ ।’ उनका अनुसार पक्राउ परेकामध्ये एक जनास“ग मात्रै व्यापारिक भिसा छ । हु चेङगुईले व्यापारिक भिसा लिएका छन् । उनले आईटी कम्पनी खोल्न व्यापारिक भिसा लिएको पाइएको जनाइएको छ । उनीसँगै कम्पनीका नामबाट व्यापारिक भिसा लिएका अन्य चिनियाँ फरार रहेको प्रहरीले जनाएको छ ।
पक्राउ परेकालाई फिर्ता लैजान चीनको पब्लिक सेक्युरिटी मन्त्रालयअन्तर्गतको अपराध अनुसन्धान विभागका उपनिर्देशक बाङ हुवा अहिले नेपाल आएका छन् । उनले गृह मन्त्रालय, अध्यागमन विभाग र प्रहरीसँग समन्वय गरिरहेका छन् । कम्बोडिया, फिलिपिन्स, लाओसलगायत पूर्वी एसियाली मुलुकमा अवैध चिनियाँविरुद्ध अप्रेसन थालिएपछि त्यहाँबाट हजारौँ चिनियाँ नेपाल प्रवेश गरेको पाइएको छ ।
चीन सरकारको सूचनाका आधारमा प्रहरीले ७ पुसमा एकैदिन १ उनीहरूलाई पक्राउ गरेको थियो । यसअघि ७ चिनियाँ पक्राउ परेका थिए ।
अध्यामगनले भिसा नियमित नगर्नेलाई विलम्ब शुल्क लिएर भिसा नियमित गरी निष्काशन गर्दै आएको छ । भिसा भएका चिनियाँलाई कसरी निष्काशन गर्ने भन्नेबारे गृह मन्त्रालय परामर्श गरिरहेको जनाइएको छ ।
पहिलो चरणमा करिब १ हजार जना चिनियाँ पक्राउ गर्ने चीन सरकारको योजना थियो । तर, सूचना चुहिएपछि त्यो पूरा नसकेको हो ।
यस्तै, साइबर अपराधमा संलग्न पक्राउ परेकालाई जिल्ला प्रशासन कार्यालय काठमाडौंले जनही १ हजार रूपैयाँ जरिवाना गरेको छ । प्रमुख जिल्ला अधिकारी जनकराज दाहालको इजलासले आइतबार उनीहरूको कसुरका आधारमा जरिवाना तोकेको हो ।
