– अझै केही दिन अस्पतालमै आराम गर्न चिकित्सकको सुझाव
काठमाडौं– प्रधानमन्त्री केपी ओलीको स्वास्थ्यमा उल्लेखनीय सुधार आएको महाराजगञ्जस्थित मनमोहन कार्डियोथेरासिक भास्कुलर एण्ड ट्रान्सप्लान्ट सेन्टरले जनाएको छ ।
प्रधानमन्त्री ओलीको स्वास्थ्य अवस्थाबारे बुधबार साँझ सेन्टरका कार्यकारी निर्देशक प्राडा उत्तमकृष्ण श्रेष्ठले जारी गरेको विज्ञप्तिमा उनको स्वास्थ्यमा उल्लेखनीय सुधार आएको जनाइएको हो । विज्ञप्तिमा भनिएको छ, ‘मंगलबार शल्यक्रियापश्चात् सघन उपचारको सम्पूर्ण व्यवस्थासहित निरन्तर निगरानीमा राखिएको र हाल सम्माननीयज्यूको स्वास्थ्यमा उल्लेखनीय सुधार भइरहेको व्यहोरा जानकारी गराइन्छ ।’
प्रधानमन्त्री ओलीको मंगलबार एपेन्डिसाइटिसको सफल शल्यक्रिया गरिएप्छि स्वास्थ्यमा सुधार हुँदै गएको हो । ‘ब्याकअप’ का रूपमा राखिएको भेन्टिलेटर बुधबार बिहान हटाइएपछि दिनभर प्रधानमन्त्री ओलीले सघनकक्षमै आराम गरे ।
बुधबार बिहानदेखि ओली सहज महसुस गर्दै सामान्य उठबस गर्न थालेका थिए । उनले कालो चिया पिउने र आफन्त एवं चिकित्सकसँग सामान्य कुराकानी पनि गर्ने गरेका छन् । बुधबार बिहान प्रधानमन्त्री पत्नी राधिका शाक्यले ओलीसँग भेटेकी थिइन् । दिनभर राधिका पतिको हेरचाहमा व्यस्त रहिन् ।
मंगलबार दिनभर भेन्टिलेटरमा राखिए पनि बुधबार बिहानदेखि भेन्टिलेटर हटाइएको छ । प्रधानमन्त्री ओलीको उपचार टोलीका संयोजक रहेका डा. अरुण सायमीले ओलीको स्वास्थ्य अवस्था सामान्य बन्दै गएको बताए । उनले भने, ‘प्रधानमन्त्रीज्यूले कालो चिया पिउनुभयो, कुर्सीमा बसेर सामान्य कुरानकानी गर्न थाल्नुभएको छ । अहिले उहाँ आराममा हुनुहुन्छ ।’
सोमबार राति पेट दुस्खेपछि प्रधानमन्त्री ओलीलाई मंगलबार बिहान अस्पताल भर्ना गरिएको थियो । स्वास्थ्य परीक्षणका क्रममा एपेन्डिसाइटिस देखिएपछि मंगलबार नै त्रिवि शिक्षण अस्पताल परिसरमा रहेको मनमोहन कार्डियोथोरासिक भास्कुलर सेन्टरमा सफल शल्यक्रिया भएको हो । एपेन्डिसाइटिस फुटेर संक्रमण भएकोले मंगलबार स्वास्थ्यमा केही जटिलता देखिए पनि बुधबार सुधारोन्मुख भएको चिकित्सकले बताएका छन् ।
प्रधानमन्त्रीका निजी चिकित्सक डा. दिव्यासिंह शाहले प्रधानमन्त्रीको स्वास्थ्यमा अहिले कुनै जटिलता नदेखिएको बताएकी छन् । ‘अहिले सामान्य छ । उहाँको हेल्थ प्यारामिटर सन्तुलित छ’ उनले भनिन् ।
त्रिवि शिक्षण अस्पतालका ग्याष्ट्रोइन्टेरोलोजी, पित्त तथा कलेजो प्रत्यारोपण सर्जन डा. रमेश सिंह भण्डारी, सर्जन डा पलेश्वाँ जोशी लाखे, डा.दीलीप शर्मासहितको विशेषज्ञ टोली ओलीको उपचारमा संलग्न छ ।्
उच्च चिकित्सकीय निगरानीसहित सघनकक्षमा राखेर ओलीको उपचार भइरहेको छ । सम्भावित संक्रमणको जोखिमलाई ध्यानमा राखेर उपचार टिमको सल्लाहमा बाहिरी भेटघाट तत्कालका लागि रोकिएको प्रधानमन्त्रीका प्रेस सल्लाहकार सूर्य थापाले बताए ।
मिर्गौलाको कार्यक्षमतामा ह्रास आएपछि प्रधानमन्त्री ओलीले चारपटक हेमोडायलासिस गराइसकेका छन् । उनले ग्रान्डी इन्टरनेसनल अस्पतालमा हेमोडायलासिस गराउँदै आएका छन् । चिकित्सकले दीर्घकालीन समस्या समाधानका लागि पुनः मिर्गौला प्रत्यारोपण गर्नुपर्ने सुझाव दिएका छन् ।
१२ वर्षअघि मिर्गौला फेल भएपछि २०६४ सालमा उनको भारतको एपोलो अस्पतालमा मिर्गौला प्रत्यारोपण गरिएको थियो । प्रत्यारोपणपछि उनले इम्युनोसप्रेसिभ औषधि सेवन गर्दै आएका छन् । गत भदौं पहिलो साता प्रधानमन्त्री ओलीको सिंगापुरमा प्लाज्माफेरेसिस गराइएको थियो । केही दिन ओलीलाई अस्पतालमै बसेर आराम गर्न चिकित्सकहरूले सुझाव दिएका छन् ।
