एपेन्डिसाइटिससहित पेटको संक्रमण, केही दिन अस्पतालमै आराम गर्न चिकित्सकको सल्लाह
काठमाडौं– प्रधानमन्त्री तथा नेकपा अध्यक्ष केपी शर्मा ओलीलाई एपेन्डिसाइटिसको शल्यक्रियापछि सघन उपचार कक्ष (आईसियू)मा राखिएको छ । प्रधानमन्त्री केपी शर्मा ओलीको स्वाथ्य अवस्था ‘स्थिर’ रहेको अस्पतालले जनाएको छ ।
प्रधानमन्त्री ओलीको मंगलबार त्रिभुवन विश्वविद्यालय, शिक्षण अस्पतालको मनमोहन ‘कार्डियोथोरासिक भास्कुलर एण्ड ट्रान्सप्लान्ट सेन्टर’मा एपेन्डिसाइटिसको शल्यक्रिया गरिएको थियो । पेट दुखेपछि मंगलबार बिहान ९ बजे प्रधानमन्त्री ओलीलाई स्वास्थ्य परीक्षणका लागि सेन्टरमा लगिएको थियो ।
सेन्टरका कार्यकारी निर्देशक प्राडा उत्तमकृष्ण श्रेष्ठले दोस्रोपटक मंगलबार साँझ सार्वजनिक गरेको विज्ञप्तिमा प्रधानमन्त्री ओलीको स्वास्य अवस्था स्थिर रहेको उल्लेख गरिएको छ ।
प्रधानमन्त्री ओली नियमित स्वास्थ्य परीक्षणका क्रममा मंगलबार बिहान सो सेन्टरमा गएका हुन् । उनलाई एपेन्डिसाइटिस भएको पत्ता लागेपछि चिकित्सकले शल्यक्रिया गरेको उनका प्रेस सल्लाहकार सूर्य थापाले जानकारी दिए । शल्यक्रिया सफल भएको छ ।
प्रधानमन्त्री ओलीको उपचारमा प्राडा अरुण सायमी, प्राडा रमेशसिंह भण्डारी, डा. दिव्या सिंहलगायत संलग्न छन् । चिकित्सकका अनुसार एपेन्डिसाइटिस भएमा जति सक्यो चाँडो शल्यक्रिया गर्नुपर्ने हुन्छ । यसअघि प्रधानमन्त्री ओलीको मिर्गौलामा समस्या आएपछि डायलासिस गरिएको थियो । एपेन्डिसाइटिसको शल्यक्रियापछि प्रधानमन्त्रीको स्वास्थ्य अवस्थाबारे अस्पतालले दोस्रो पटक विज्ञप्ति जारी गर्दै उनको स्वास्थ्य अवस्था सामान्य रहेको जनाएको हो ।
‘सम्माननीय प्रधानमन्त्री केपी शर्मा ओलीज्यूको स्वास्थ्यमा समस्या आई आज (मंगलबार) मिति २०७६÷८÷१० गते मंगलबार विहानदेखि यस सेन्टरमा उपचाररत रहनुभएको छ’, विज्ञप्तिमा भनिएको छ, ‘सम्माननीयज्यूको शल्यक्रिया पश्चाल हाल सघन कक्षमा उपचार भइरहेको तथा हाल उहाँको स्वास्थ्य अवस्था स्थिर रहेको व्यहोरा जानकारी गराइन्छ ।’
मिर्गौलापीडित प्रधानमन्त्री ओलीको अचानक एपेन्डिसाइटिसको शल्यक्रिया गर्नुपरेपछि केही दिन अस्पतालमै आराम गर्नुपर्ने देखिएको चिकित्सकको भनाइ छ । मिर्गौलाको कार्य क्षमतामा ह्रास आएपछि प्रधानमन्त्री ओलीको नियमित हेमोडायलासिसलाई प्राथमिकता दिइएको हो । उनको चौथोपटक आइतबार (मंसिर ८ गते) ग्रान्डी इन्टरनेसनल अस्पतालमा हेमोडायलासिस गरिएको थियो ।
प्रधानमन्त्री ओलीको १३ कात्तिकमा पहिलोपटक डायलायसिस गरिएको थियो । दुवै मिर्गौला फेल हुँदा सातामा दुई वा तीनपटक डायलासिस गर्नुपर्ने हुन्छ । तर, प्रधानमन्त्री ओलीको मिर्गौलाको कार्यक्षमतामा पूर्ण ह्रास नआइसकेका कारण असहज महसुस भएकाले डायलासिस गर्नुपरेको हो । गत १३ र १४ कात्तिकमा उनको दुईपटक डायलासिस भएको थियो । यसअघि उनको गत १८ साउन र ५ भदौमा सिंगापुरस्थित नेसनल युनिभर्सिटी अस्पतालमा उपचार गरिएको थियो ।
प्रधानमन्त्री ओलीको २५ दिनको अवधिमा चौथोपटक डायलासिस गरिएको छ । ०६४ सालमा उनको भारतको एपोलो अस्पतालमा मिर्गौला प्रत्यारोपण गरिएको थियो । प्रत्यारोपणपछि प्रधानमन्त्री ओलीले नियमित इम्युनोसप्रेसिभ औषधि सेवन गर्दै आएका छन् ।
