काठमाडौं– पछिल्लो समय प्रधानमन्त्री केपी ओली एक्सनमा उत्रिएका छन् । एकातिर ‘बिमारी प्रधानमन्त्रीले के नै गर्ला र ?’ भन्दै वर्तमान सरकारको आलोचनामा व्यस्त रहेका बेला प्रधानमन्त्री ओली एक्सनमा उत्रिएका हुन् ।
प्रधानमन्त्री ओलीले आफ्नो सचिवालयको सल्लाहकार र कर्मचारीलाई राजीनामा दिने निर्देशन दिएको भोलिपल्टै आइतबार मन्त्रिपरिषद् हेरफेरका लागि गम्भीर छलफल गरेका छन् । शनिबार प्रधानमन्त्री ओलीले आफ्ना सल्लाहकारलाई राजीनामा दिन निर्देशन दिएका थिए । प्रधानमन्त्रीको निर्देशनलगत्तै सबै सल्लाहकारले १ मंसिरदेखि लागू हुने गरी राजीनामा दिएका छन् । सो सम्बन्धमा सबै विषयलाई टुंगो लगाउन सोमबार ९ बिहान नेकपा सचिवालय बैठक बोलाइएको छ ।
तर, यसैबेला प्रधानमन्त्री ओली र नेकपाका अर्का अध्यक्ष पुष्पकमल दाहालबीच आइतबार साँझ छलफल भएको छ । सो छलफल मन्त्रिमण्डल हेरफेरमा केन्द्रित रहेको बताइएको छ । आइतबार दिउँसो प्रधानमन्त्रीको सरकारी निवास बालुवाटारमा उनीहरूबीच करिब दुई घन्टा छलफल भएको थियो ।
हुन त केही साता अघिबाटै मन्त्रिमण्डल हेरफेर गर्ने चर्चा थियो । तर, त्यसको नेकपाका अध्यक्ष दाहालले प्रतिकार गर्दै आएका थिए । हालै मात्र एक अन्तर्वार्तामा अध्यक्ष दाहालले भनेका थिए, ‘तत्काल मन्त्रिमण्डल हेरफेर हुँदैन, ढुक्क हुनुस् ।’ तर आइतबारको छलफलले तत्काल हेरफेर हुने देखिएको छ । एकातिर प्रधानमन्त्री ओलीले आफ्नो सल्लाहकार हटाउनु र अर्कोतिर भारतसँग सीमा विवादको मुद्दा उठ्नुले प्रधानमन्त्री ओली एक्सनमा उत्रिएको स्रोतको भनाइ छ ।
तत्काल केही नयाँ मन्त्री ल्याउने र केही हटाउने विषयमा छलफल भएको बालुवाटार स्रोतले जनाएको छ । स्रोतका अनुसार चाँडै मन्त्रिपरिषद् हेरफेर हुँदै छ । उक्त विषयमा दुई अध्यक्षबीच पात्रका विषयमासमेत छलफल भएको छ ।
प्रधानमन्त्रीनिकट स्रोतका अनुसार उद्योगमन्त्री मातृका यादवलाई हटाएर उनको स्थानमा प्रभु शाहलाई मन्त्री बनाउने विषयमा छलफल भएको छ । साथै महिला बालबालिका मन्त्री थममाया थापालाई हटाएर उपसभामुख शिवमाया तुम्बाहाम्फेलाई मन्त्री बनाउने विषयमा छलफल भएको छ । अन्य मन्त्रीका विषयमा पनि छलफल भएको जनाइएको छ ।
त्यस्तै, तीनपटक संसदीय चुनाव जितेका वसन्त नेम्वाङलाई मन्त्री बनाउन प्रधानमन्त्री ओली र अध्यक्ष दाहाल सहमत भएको स्रोतले बताएको छ । स्वास्थ्यमा सुधार आएपछि प्रधानमन्त्री ओलीले आफू नयाँ ढंगले काम गर्न लागेको उनका विश्वास पात्रलाई बताउँदै आएका छन् ।
