नयाँ दिल्ली– कस्मिर आक्रमणमा दुई गोर्खा सैनिकको मृत्यु भएको छ । भारतस्थित जम्मु कास्मिरमा आइतबार भएको गोलबारीमा परी एक नेपाली र अर्का नेपाली मूलका एक भारतीय सेनाको मृत्यु भएको हो ।
समाचार एजेन्सीहरुले बताएअनुसार कास्मिरको कुपवारा जिल्लामा भएको गोलाबारीमा गोर्खा रेजिमेन्टका हवल्दार पदमबहादुर श्रेष्ठ र राइफलम्यान गामिलकुमार श्रेष्ठको मृत्यु भएको छ ।
नेपालका राइफल म्यान गामिल कुमार श्रेष्ठ पाल्पा निवासी रहेको भारतीय सञ्चार माध्ययम न्युजलाइभ टिभीले जनाएको छ । त्यस्तै नेपाली मुलकै जवान पदबहादुर भारतको आसाम गोलाघाट जिल्लास्थित हतिखुली निवासी हुन् । त्यस आक्रमणमा परी दुई सेना र एक नागरिकको मृत्यु भएको थियो ।
पाकिस्तानले युद्धविरामको उल्लंघन गर्दै युद्ध शुरु गरेकाले घटना घटेको भारतले आरोप लगाएको छ । भारतले जवाफी आक्रमण गर्दा ६ देखि १० पाकिस्तानी सेनाको मृत्यु भएको भारतीय सेना प्रमुख विपिन रावतले भारतीय संचारमाध्यमलाई बताएका छन् । आक्रमणमा तीन सेनासहित ८ जना घाइते भएको भारतीय प्रहरीले दाबी गरेको छ । पाकिस्तानमा बसोबास गर्दै आएका आतंकवादीहरु पनि आक्रमणमा मरेको भारतीय सेना प्रमुख रावतले बताए ।
