काठमाडौं– प्रधानमन्त्री केपी ओलीले नेपाली कांग्रेस र नेकपाबीचको सम्बन्धमा कुनै तिक्तता नभएको बताएका छन् । आइतबार कोजाग्रत पूर्णिमाको अवसर पारेर आयोजना गरेको चियापान समारोह तथा शुभकामना आदानप्रदान कार्यक्रममा प्रधानमन्त्री ओलीले प्रजातन्त्र, लोकतन्त्रका लागि कांग्रेस–कम्ष्युनिस्ट सँगै लडेको बताउँदै नेपाली कांग्रेस र नेकपाबीचको सम्बन्धमा कुनै तिक्तता नभएको बताए ।
शेरबहादुर र रामचन्द्रजी आफ्नो ४५ वर्षदेखिका साथी भएकाले हामीबीच कुनै तिक्तता नभएको उनले बताएका छन् । केही तिक्तता भएको भए पनि यस्तो चियापानजस्तो संस्कृतिले तिक्तता मेटाएर मित्रतालाई झन् प्रगाढ तुल्याउने उनको जिकिर थियो । कांग्रेसले त नेकपा नेतृत्वको सरकारलाई लोकतन्त्र मास्न लागेको आरोप लगाएको छ नि ? भन्ने सञ्चारकर्मीको जिज्ञासामा उनले कुनै रिक्तता नरहेको र सम्बन्धनमा धूलो उडाउने काम नगरौँ त भन्दै पन्छिएका थिए ।
कार्यक्रममा प्रधानमन्त्री ओलीले लामो समयदेखिको लोकतन्त्रको सहयात्राले प्रमुख दलहरूका बीचमा गहिरो समझदारी र मित्रता रहेको उल्लेख गर्दै लोेकतन्त्रका आधारभूत मूल्य मान्यतामा तलमाथि पर्न नदिने प्रतिबद्धता व्यक्त गरेका छन् । प्रधानमन्त्री ओलीले यस्ता पर्वका अवसरमा हुने भेटघाटले परिवार र नातागोताका बीच तथा राजनीतिक दलका बीचमा पनि कटुता छ भने त्यसलाई समाप्त पार्न सक्ने बताए । चार दशकभन्दा बढी लामो समयदेखिको लोकतन्त्रको सहयात्राले आफूहरू बीच गहिरो समझदारी र मित्रता रहेको उल्लेख गर्दै लोकतन्त्रका लागि स“गै लड्ने र लोकतन्त्रका आधारभूत मूल्य मान्यतामा तलमाथि पर्न नदिने साझा प्रतिबद्धता रहेको प्रधानमन्त्री ओलीले बताएका छन् ।
नेपाली कांग्रेसका संस्थापक एवं जननायक बिपी कोइरालाले ०३३ मा राष्ट्रिय एकता तथा मेलमिलापको नीति लिई स्वदेश फर्केपछि ०३५ सालदेखि प्रत्येक वर्ष कांग्रेसले कोजाग्रत पूर्णिमाको दिनमा चियापान समारोह आयोजना गर्दै आएको छ ।
यता, चियापान कार्यक्रममा नै नेकपाका अर्का अध्यक्ष पुष्पकमल दाहालले राजनीतिलाई असम्भावनाबीचको सम्भावनाको संज्ञा दिएका छन् । उनले राजनीतिमा असम्भव भन्ने केही पनि नरहेको भन्दै राजनीतिमा यस्तै हुन्छ भनेर ठोकुवा गर्नै नसकिने बताए ।
असम्भव देखिने कुराहरू पनि राजनीतिक पार्टीहरू मिलेर सम्भव बनाउन सकिने बताउँदै उनले कांग्रेससँग पहिले पनि सहकार्य भएको र फेरि पनि सहकार्य हुन सक्ने बताएका छन् । कार्यक्रममा कांग्रेस नेताहरू भेट्दा सहयात्रीहरूकै बीचमा आएको महसुस भएको भन्दै पछिल्लो दिनमा राजनीतिले कसरी कोल्टे फेर्छ यसले कांग्रेसस“गको सहमतिलाई परिभाषा दिने बताए ।
