भक्तपुर- नेकपा एमालेले भक्तपुरका सबै चार नगरपालिकामा आफ्नो तर्फबाट प्रमुख र उपप्रमुखका उम्मेदवारको टुंगो लगाएको छ । आइतबार रातीसम्म चलेका पार्टीको बैठकले जिल्लामा रहेका चारवटै नगरपालिकाको प्रमुख र उप प्रमुखको टुङ्गो लगाएको हो ।
जस अनुसार दुई वटा नगरपालिकाको मयेरमा एमाललेले पुरानै अनुहारलाई अगाडी सारेको छ भने दुईवटामा नयाँ उम्मेदवार चयन गरेको छ । एमालेले सूर्यविनायक नगरपालिका र मध्यपुर थिमि नगरपालिकाको प्रमुखमा पहिले कै मेयरहरुलाई अघि सारेको छ । जस अनुसार सुर्यविनायको प्रमुखमा वासुदेव थापा र मध्यपुर थिमिको प्रमुखमा मदनसुन्दर श्रेष्ठ दोहोरिएका छन् ।
त्यस्तै, चाँगुनारायण नगरपालिकामा भने हालका उप मेयरलाई मेयर अघि सारिएको छ । त्यहाँ हालका उपमेयर बिना बास्तोलालाई मेयरको उम्मेदवार बनाइएको छ । त्यस्तै भक्तपुर नगरपालिकामा भने रवीन्द्र लाछिमस्युलाई उम्मेदवार बनाइएको छ ।
एमालेले उपमेयरतर्फ सूर्यविनायक नगरपालिकामा सरिता भट्टराई, मध्यपुर थिमिमा उत्तरा नेपाल चाँगुनारायणमा रमेश बुढाथोकी र भक्तपुर नगरपालिकामा रन्जना खर्बुजा उम्मेदवार बनाउने निर्णय गरेको छ । भक्तपुरमा जम्मा चारवाटा नगरपालिका मात्रै रहेका छन् । अघिल्लो चुनावमा एमाललेले चारमध्ये तीन वटा नगरपालिकामा जित हासिल गरेको थियो । भक्तपुर नगरपालिकामा भने नेपाल मजदुर किसान पार्टीले जित आत्मसाथ गरेको थियो ।
