काठमाडौं– नेपाली कांग्रेसले यही वैशाख ३० हुने स्थानीय तहको निर्वाचनका लागि पार्टीको घोषणापत्र सार्वजनिक गरेको छ । ‘नेपाली कांग्रेसको संकल्प’ नाम दिइएको घोषणापत्र आइतबार पार्टी केन्द्रीय कार्यालयमा आयोजित कार्यक्रममा सार्वजनिक गरिएको हो ।
समुन्नत नेपालको राष्ट्रिय अभियानलाई अगाडि बढाउन पार्टीले तीनै तहको सरकारको नेतृत्व गर्न चाहेको कांग्रेसको भनाइ छ । कार्यक्रममा घोषणापत्रबारे जानकारी दिँदै कांग्रेस महामन्त्री एवं घोषणापत्र तयारी समितिका संयोजक गगनकुमार थापाले स्थानीय सरकार सवल र सक्षम भयो भने मात्र लोकतन्त्र पनि बलियो हुने बताए ।
वि.सं. २००७ को क्रान्तिपछिको सरकारमा स्थानीय स्वायत्त शासन साकार पार्न कांग्रेसले छुट्टै मन्त्रालयको व्यवस्था गरेको जानकारी दिए । सवल स्थानीय सरकारमार्फत विविधतालाई एकतामा जोड्दै लोकतन्त्रलाई समावेशी र सहभागितामूलक बनाएर देशको समुन्नतिको ढोका खोल्नुपर्छ भन्नेमा नेपाली कांग्रेस प्रस्ट रहेको उनको भनाइ थियो ।
कांग्रेसले अब राजनीतिक मुद्दाकै खिचातानीमा अल्झने र प्राप्त अवसरलाई गुमाउने सुविधा तथा समय नभएको उल्लेख गर्दै संविधानसभामार्फत जारी भएको संविधानको रक्षा र संस्थागत विकास गर्दै हासिल गरेका ऐतिहासिक उपलब्धिलाई जोगाएर देशलाई अगाडि बढाउने विषयमा पार्टीको प्रस्ट र दृढ प्रतिबद्धता व्यक्त गरेको छ । ‘नेपाली कांग्रेसको संकल्प’ नाम दिइएको घोषणापत्रमा पार्टीको गौरवशाली इतिहास र आदर्शलाई स्मरण गर्दै संविधानले जनतासँग वाचा गरेको समुन्नतिको आधार निर्माण गर्ने, समुन्नत नेपालको जग बसाल्ने उल्लेख गरेको छ ।
‘समुन्नत नेपाल कुनै एक व्यक्तिको चमत्कारले होइन, सबै नागरिकको सामूहिक प्रयत्नले डोर्याउने उज्यालो भविष्यतिरको सुनौलो यात्रा हो । समुन्नत नेपालको केन्द्रमा केवल कोरा आर्थिक विकास र भौतिक संरचनामात्रै होइन, नेपाली जनताको समग्र मानव विकासको बृहत् अवधारणा अन्तर्निहित छ,’ घोषणापत्रमा उल्लेख छ । समुन्नत नेपाल नागरिकलाई सवल, सक्षम र स्वतन्त्र बनाई देशलाई सम्पन्न बनाउने कांग्रेसको अवधारणा छ ।
कांग्रेसले अवलम्बन गर्ने नीतिमा अबको दशक नेपालको समुन्नति र सम्पन्नताको दशक हुनेछ । प्रस्ट मार्गचित्रका साथ समुन्नतिको यही राष्ट्रिय संकल्पको कार्यान्वयनमा आफूलाई समर्पित गर्ने कांग्रेसको वाचा छ । कहाँ पुग्ने र कसरी पुग्ने भन्ने विषयमा अब कुनै द्विविधा नरहेको घोषणापत्रमा उल्लेख छ ।
कांग्रेसले नेपाललाई वैदेशिक लगानीको आकर्षक गन्तव्य बनाई नागरिकको जीवनस्तरलाई उकास्न हरदम प्रयत्नशील रहने देशभक्तिको राजनीतिमा विश्वास गरेको छ । पार्टीले गैरआवासीय नेपालीलाई आफू जन्मिएको, हुर्किएको गाउँ तथा नगरले लिएका आर्थिक–सामाजिक पहलमा सहकार्य गर्न उत्प्रेरित गर्ने र त्यसका लागि आवश्यक नीति र संयन्त्रको व्यवस्था गर्ने जनाएको छ । वैदेशिक रोजगारको विकल्प नबन्दा झण्डै तीन करोड जनसंख्या भएको अर्थतन्त्रको तुलनामा विप्रेषणको आकार लगभग २५ प्रतिशत हुनु उल्लेख्य रहेको उल्लेख गरेको छ । अर्को १० वर्षमा यसलाई १०–१५ प्रतिशत बिन्दुले घटाउन कांग्रेसले महत्वाकांक्षी पहल लिने जनाएको छ ।
