कञ्चनपुर । शुक्लाफाँटा नगरपालिका —९ मा ७ करोड लागतमा खानेपानी आयोजना निर्माण कार्य अगाडि बढाइएको छ ।
हेण्डपम्पको पानीमा आर्सेनिक, आइरनलगायत रसाइनका कारण विभिन्न किसिमका रोगको समस्या स्थानीय बासिन्दाले झेल्दै आएपछि खानेपानी आयोजना निर्माण गर्न लागिएको हो ।
‘लामो समयदेखि हेण्डपम्पको पानी प्रयोग गर्दै आएका थियौं’, स्थानीय शेरबहादुर सार्कीले भने, ‘आयोजना निर्माण हुन थालेपछि शुद्व खानेपानी पाउनेमा आशावादी छौं ।’ ६ सय घरघुरीमा सुरक्षित खानेपानी उपलब्ध गराउनका लागि खानेपानी आयोजना सञ्चालन गरिएको वडाध्यक्ष रमेशबहादुर ऐरले बताए ।
दुई वर्षभित्रै उक्त आयोजना सम्पन्न गर्ने गरी निमार्ण कार्य भइरहेको छ । उनका अनुसार स्थानीय बासिन्दाका घरघरमा खानेपानी पुर्याउने लक्ष्यअनुसार कार्य अगाडि बढाइएको छ । आवश्यकताका आधारमा सार्वजनिक स्थान, विद्यालय, स्वास्थ्य चौकीलगायत क्षेत्रमा धारा राख्ने योजना रहेको छ ।
‘खानेपानी आयोजनासँगै वडा क्षेत्रमा नगर उद्यान निर्माणको कार्यसमेत अगाडि बढ्ने भएको छ’, वडाध्यक्ष ऐरले भने, ‘दुई करोड २० लाखको लागतमा नगर उद्यान निर्माण हुन लागेको छ ।’ चार बिघा जग्गामा निर्माण भइरहेको उद्यानमा बालबालिकाका लागि खेल्ने मनोरञ्जन गर्ने साधनसँगै फूलबारी, सौर्यबत्ती, पानीका फोहरा राखिनेछन् ।
पालेघर, पर्खालसँगै शौचालय निर्माण गरिने छ । घरकटुवा खोलामा ८३ लाखको लागतमा मल्टिस्पान झोलुङ्गेपुल, १२ लाखको लागतमा वडाका विभिन्न स्थानमा सौर्यबत्ती, ४ लाखको लागतमा १२० वटा सडक बत्ती, १४ लाख ५० हजारको लागतमा २७ ठाउँमा खानेपानीको अटोजन नल्का गाडिएको छ ।
