काठमाडौं– यही ३० वैशाखका लागि तय भएको स्थानीय निर्वाचनका लागि मनोनयन दर्ता गर्ने समय अब दुई दिन मात्र बाँकी छ । तर, राजनीतिक दलहरुले धेरै स्थानीय तहको उम्मेदवार टुंगो लगाउन सकेका छैनन् । केही समितिबाहेक धेरैले उपल्लो समितिको निर्णय पर्खेर बसेका छन् ।
जस्तो, नगरपालिकाको मेयर, उपमेयरका लागि प्रदेश समिति र उपहानगरपालिका तथा महानगरपालिकाको मेयर, उपमेयरका लागि सम्बन्धित पार्टीहरुले केन्द्रको निर्णय पर्खिरहेका छन् । उम्मेदवार सिफारिसमा सत्तारुढ गठबन्धनबाट अघि देखिएको नेकपा एमाले उपमहानगर र महानगरको निर्णय गर्न भने विलम्ब गरिरहेको छ ।
महानगर र उपमहानगरका उम्मेदवार तय गर्न बिहीबार एमाले अध्यक्ष केपी शर्मा ओलीको निवास बालकोटमा बसेको केन्द्रीय सचिवालय बैठकले पनि यसबारे ठोस निर्णय गर्न सकेन । बरू, गण्डकी प्रदेशका प्रदेशसभा सदस्यलाई मेयरको टिकट नदिने निर्णय ग¥यो । एमालेको यो निर्णय पोखरा महानगरपालिकालक्षित थियो । जहाँबाट तीन प्रदेश सांसदसहित १२ जना नेताहरुको नाम पोखराको मेयरका लागि सिफारिस भएको थियो ।
एमालेका तल्ला कमिटीबाट केन्द्रमा आएका सिफारिसमध्ये यो नै सबैभन्दा धेरै संख्या हो । ललितपुर, भरतपुर र वीरगञ्ज महानगरपालिका प्रमुखका लागि एक÷एक जनाको मात्र नाम सिफारिस भएको छ । उनीहरुले स्वतः टिकट पाउने पक्का भएको छ । तर, पोखराबाट १२, विराटनगरबाट पाँच, काठमाडौं महानगरपालिकामा पूर्वराज्यमन्त्रीसहित पाँच जनाको नाम केन्द्रमा पठाइएको छ । यस्तै, उपमहानगरपालिकाहरुबाट पनि एकभन्दा धेरै उम्मेदवारको नाम सिफारिस भएको छ । जसका कारण एमालेले निर्णय गर्न ढिलाइ गरिरहेको छ ।
एमालेले पोखराको मेयरका लागि प्रदेश सांसदलाई टिकट नदिने निर्णय गरेपछि पोखराको मेयरमा आकांक्षा राखेका गण्डकी प्रदेशसभाका सदस्यहरु कृष्ण थापा, राजीव पहारी र मीना गुरुङले प्रतिस्पर्धा गर्न नपाउने भएका छन् । बिहीबार बसेको सचिवालयको बैठकपछि प्रचार विभाग प्रमुख एवं उपमहासचिव पृथ्वीसुब्बा गुरुङले गण्डकीमा प्रदेशसभा सदस्यलाई मेयरमा टिकट नदिने निर्णय भएको बताए । योसँगै पोखरा महानगरपालिकामा मेयरको उम्मेदवार बन्ने आकांक्षा राखेका थापा, पहारी र गुरुङको ‘च्याप्टर क्लोज’ भएको छ ।
२०७४ को निर्वाचनमा कांग्रेस र माओवादीको गठबन्धन हुँदासमेत पोखरा महानगरपालिकामा एमालेले फराकिलो अन्तरले चुनाव जितेको थियो । तर, यसपटक भने उम्मेदवार छनोटमै सकस देखिएको छ । छ वटा महानगरमध्ये एमालेले जित हासिल गर्न सबैभन्दा बढी सम्भावना रहेको पोखरा महानगरको मेयरका लागि १२ जना र उपमेयरका लागि ११ जना दाबेदार छन् ।
मेयरको उम्मेदवारमा केन्द्रीय सदस्य एवं प्रदेश सांसद थापा, पहारी, केन्द्रीय सदस्य मीना गुरूङ, भीम कार्की, व्यवसायी पुष्पज्योति ढुंगाना, पुष्पराज अधिकारी, प्रा.डा. विश्वकल्याण पराजुली, रश्मी आचार्य, दीपक पौडेल, दर्शन लामा, बालकृष्ण काउछा मगर र सावित्री भण्डारीले दाबी गरेका छन् ।
यस्तै, उपमेयरमा तेजनारायण अधिकारी, सञ्जीवबहादुर कोइराला, बलराम गायक गन्धर्व, हरिमाया गुरुङ, बैनबहादुर क्षेत्री, जीवनप्रसाद आचार्य, टिकाराम पंगेनी, बामदेव ढुंगाना, शोभामोहन पौडेल, देवका पहारी त्रिपाठी र सुष्मा पौडेलको दाबी छ । ‘गण्डकीमा अझै पनि सरकार फेरबदल हुनसक्ने सम्भावनालाई मध्यजनर राखेर गण्डकीको कुनै पनि प्रदेशसभा सदस्यहरुलाई यसपटक स्थानीय तहको चुनावमा अगाडि सार्दैनौं,’ उपमहासचिव गुरुङले भने ।
उनले गण्डकी प्रदेशसभामा आफूहरुको २७ सिट रहेको भन्दै सरकारलाई समर्थन गरिरहेको कुनै दलले फिर्ता लियो भने सरकार परिवर्तनको सम्भावना रहेको बताए । त्यसो हुँदा फेरि एमालेको नेतृत्वमा सरकार गठन गर्न सकिने उनको भनाइ थियो । गुरुङ गण्डकीका पूर्वमुख्यमन्त्रीसमेत हुन् । दुई दिनको लागि भने पनि आफ्नो सरकार गठन हुँदा महत्वपूर्ण हुने उनले बताए । यस्तै निर्णय लुम्बिनीमा पनि गर्न सकिने उनको भनाइ छ । जहाँ आफ्नो नेतृत्वमा सरकार बन्नसक्ने सम्भावना छ, त्यहाँ प्रदेश सांसदलाई स्थानीय तहको टिकट नदिने उनले बताए । ‘बागमतीमा त्यस्तो सरकार बनिहाल्ने नजिकको सम्भावना छैन । कम भएको ठाउँमा त्यस्तो निर्णयमा बाँधिदैनौं,’ गुरुङले भने ।
गण्डकी र लुम्बिनी प्रदेशमा एमालेको एकल बहुमत पुग्नलाई केही सांसदको मात्रै कमी हुन्छ । सत्ता गठबन्धनमा फाटो आएमा एमालेको सरकार बन्नसक्छ ।
महानगरका उम्मेदवार शनिबार टुंग्याइने
एमालेले महानगरपालिका र उपमहानगरपालिकाका उम्मेदवारबारे शनिबार मात्र निर्णय गर्ने भएको छ । बिहीबारको सचिवालय बैठकमा सातवटै प्रदेश कमिटीले गरेको सिफारिसबारे छलफल मात्र भएको र अर्को बैठकले निर्णय गर्ने एमाले उपमहासचिव तथा प्रचार विभाग प्रमुख गुरुङले बताए । उनका अनुसार सचिवालयको अर्को बैठक शनिबार दिउँसो ३ बजे बालकोटमै बस्नेछ ।
निर्वाचन आयोगले वैशाख ११ र १२ गते उम्मेदवारी मनोनयनको समय निर्धारण गरेको छ । एमालेले त्यसको अघिल्लो दिन मात्र महानगर र उपमहानगरका उम्मेदबारे निर्णय गर्ने भएको हो । बिहीबारको बैठकमा महानगर र उपमहानगरको प्रमुख तथा उपप्रमुखका लागि सातवटै प्रदेशबाट आएका सिफारिसबारे महासचिव शंकर पोखरेलले जानकारी दिएका थिए ।
एक पालिकाका लागि दुई वा दुईभन्दा बढी जनाको नाम सिफारिस भएकाले ती सबै नाममा छलफल गर्नका लागि समय लिने एमाले सचिवालयले निर्णय गरेको हो । एकल सिफारिस आएको अवस्थामा पनि तीभन्दा योग्य उम्मेदवार हुन्छन् कि भनेर थप छलफल गर्नका लागि १० गते चयन गर्ने निर्णय भएको एमाले सचिव योगेश भट्टराईले बताए ।
बिहीबारको बैठकमा दुईवटा एजेण्डामा छलफल भएको उपमहासचिव गुरुङले बताए । गुरुङका अनुसार शुक्रबार (आज) नेपाल कम्युनिस्ट पार्टी स्थापना दिवस भव्यरूपमा मनाउने निर्णय भएको छ । पार्टी स्थापना दिवसकै अवसरमा आज तुलसीलाल स्मृति प्रतिष्ठान च्यासल ललितपुरमा एमालेको केन्द्रीय कार्यालय उद्घाटन हुने उनले बताए । एमालेले आज नै स्थानीय निर्वाचनको घोषणापत्र पनि सार्वजनिक गर्ने उनले जानकारी दिए ।
माओवादी र कांग्रेससँग पनि सहकार्य !
नेकपा एमालेले स्थानीय तहको निर्वाचनमा सत्तारुढ गठबन्धनभित्रका दलहरुसँग पनि तालमेल हुनसक्ने जनाएको छ । बिहीबारको केन्द्रीय सचिवालय बैठकपछि पत्रकारहरुसँग कुरा गर्दै प्रचार विभाग प्रमुख गुरुङले महानगर र उपमहानगरमा कांग्रेस र माओवादीलगायतका दलहरुसँग पनि सहकार्यको ढोका खुला रहेको बताए । सकारात्मक शक्ति र पार्टीहरुसँग महानगर र उपमहानगरमा पनि सहकार्य हुने र वैशाख १२ गतेसम्ममा सबै टुंगो लगाउने उनले बताए । एमालेले जनता समाजवादी पार्टी, लोकतान्त्रिक समाजवादी पार्टी, राष्ट्रिय प्रजातन्त्र पार्टीसँग पनि सहकार्य गर्नसक्ने उनले बताए ।
