सुर्खेत– कर्णाली प्रदेशका मुख्यमन्त्री जीवनबहादुर शाहीले प्रदेश पदाधिकारीहरूको तलव र सेवा सुविधा अन्य प्रदेशसरह पुर्याइएको बताएका छन् । बुधबार पत्रकार भेटघाटमा मुख्यमन्त्री शाहीले प्रदेश पदाधिकारीहरूको तलव, सुविधा बढाएको भन्दै संचार माध्यमले समाचार बनाएपछि त्यसको खण्डन गर्दै आफुहरुले अन्य प्रदेश पदाधिकारीहरूको सरह नै सेवा सुविधा राखेको बताए ।
उनले प्रदेशसभामा प्रतिनिधित्व गर्ने दलहरूसँगको सहमतिमै तलब सुविधा बढाइएको जिकिर पनि गरे । प्रदेश सभा सदस्यहरूको मर्यादाक्रम अनुसार पारिश्रमिक नभएको गुनासो प्रदेशसभामै उठेपछि सर्वदलीय सहमतिका आधारमा मन्त्रिपरिषद्बाट सुविधा हेरफेरसम्बन्धी निर्णय गरेको मुख्यमन्त्री शाहीले जानकारी दिए ।
प्रदेश सरकारले बढाएको पारिश्रमिक अनुसार प्रदेशका मुख्यमन्त्री जीवनबहादुर शाहीले यसअघि ६० हजार ९७० पाउँदै आएकोमा अब ७० हजार ७३० पाउने भएका छन् । मुख्यमन्त्री शाहीले यसअघि १५ हजार अतिथि सत्कार स्वरुप पाउने गरेकोमा अब २० हजार पाउनेछन् ।
मन्त्रीहरुले १० हजार पाइरहेकामा अब मासिक १५ हजार पाउने भएका छन् । ५३ हजार तलव पाउँदै आएका मन्त्रीहरुले ६० हजार ३२० पाउनेछन् । प्रदेश सभाका सभामुखको तलब पनि वृद्धि भएको छ । यसअघि ५३ हजार मासिक तलव बुझ्ने सभामुख राजबहादुर शाहीले अब ६१ हजार ४८० पाउनेछन् । विपक्षी दलको नेता र उपसभामुखले ५० हजार पाइरहेकोमा अब ५८ हजार पाउनेछन् ।
सत्ता पक्षको प्रमुख सचेतक, विपक्षी दलको प्रमुख सचेतक र समितिका अध्यक्षहरुको तलब समेत वृद्धि भएको छ । यसअघि ४८ हजार तलब पाउने गरेका उनीहरुले अब ५६ हजार ८४० पाउनेछन् । यसअघि मासिक ४५ हजार पाउँदै आएका सांसदहरुले अब ५२ हजार ६०० पाउने छन् । यस्तै सञ्चार सुविधा र भ्रमण भत्तामा समेत वृद्धि गरिएको छ । मुख्यमन्त्री शाहीले केही सुविधा बढे पनि सातवटै प्रदेशमा सबभन्दा कम सेवा सुविधा पाउने कर्णाली प्रदेशकै पदाधिकारी रहेको दावी समेत गरे ।
