रुपन्देही– गृहमन्त्री बालकृष्ण खाँणले गठबन्धन दलबीचको सहमति कडाइका साथ पालना गर्नुपर्ने बताएका छन् ।
रुपन्देहीको तिलोत्तमास्थित आफ्नै निवासमा बुधबार आयोजित पत्रकार भेटघाटमा उनले यस्तो बताएका हुन् ।
उनले सत्तारूढ दलबीच केन्द्रमा हुने सहमति कार्यान्वयन नगर्नेलाई कारबाही गर्ने बताए । नेपाली कांग्रेसका नेता खाणले भने, ‘आसन्न निर्वाचनमा गठबन्धन दलको निर्णय नमान्नेलाई कारबाही गरिन्छ ।’ उनले निर्वाचनमा गठबन्धन दलबीच सहमति र सहकार्य हुने भएकाले सहमति उल्लंघन गर्ने छुट कसैलाई नभएको भनाइ छ ।
खाँणले भने, ‘दलबीच सहमति र सहकार्य हुने भएकाले सहमति उल्लंघन गर्ने छुट कसैलाई छैन ।’ उनले अहिले गठबन्धन हुन्छ हुँदैन भन्ने सवाल महत्वपूर्ण नभएको पनि बताए । उनले कतिपय ठाउँमा गठबन्धन होला कतिपयमा स्थानमा छुट्टाछुट्टै हुने बताए । उनले गठबन्धनको बारेमा केन्द्रले जे निर्णय गर्छ, त्यसको पालना गर्नुपर्ने सुझाव दिए । उनले भने, ‘गठबन्धनको बारेमा केन्द्रले जे निर्णय गर्छ, त्यसको पालना गर्नु हाम्रो कर्तव्य हो ।’ उनले जनताका अधिकार सशक्त बनाउन स्थानीय तहको निर्वाचन महत्वपूर्ण भएको बताए ।
उनले जनताको नजिकको सरकार भएकाले स्थानीय तहको निर्वाचन शान्तिपूर्ण ढंगले सम्पन्न गर्नेतर्फ सरकारले विशेष ध्यान दिएको उल्लेख गरे । उनले भने, ‘शान्तपूर्ण वातावरणमा निर्वाचन सम्पन्न गर्न सुरक्षाको समुचित प्रबन्ध गरेको छौँ, आवश्यक परे हवाइगस्ती गर्छौ ।’
गृहमन्त्री खाँणले पहिले स्थानीय तहको निर्वाचन विभिन्न चरण हुने गरे पनि अहिले एकैपटकमा एकैदिन गर्न लागिएकाले सुरक्षा चुनौती हुन सक्ने भएकाले सुरक्षा निकायसँगको समन्वयमा उचित प्रबन्ध गरिएको बताए ।
उनले भने, ‘ढुक्क भएर निर्वाचनमा भाग लिन सक्ने प्रबन्ध गरेको छौँ ।’राजनीतिक नेपाल कम्युनिष्ट पार्टीलगायतका अन्य केही दलले निर्वाचनमा पहिलो पटक भाग लिने बताउँदै उनले निर्वाचनलाई स्वच्छ र भयरहित बनाउनेतर्फ सरकारले विशेष ध्यान दिएको बताए ।
