काठमाडौं– पाँचदलीय गठबन्धनले स्थानीय तह निर्वाचनका लागि सिट बाँडफाँडको टुंगो लगाउन सकेको छैन । यही ३० वैशाखमा हुने स्थानीय निर्वाचनमा तालमेल गरेका दलहरूको बैठक आइतबार बसेको थियो । सिट बाँडफाँडको निर्णय गर्न बसेको गठबन्धनको स्थानीय तह निर्वाचन परिचालन तथा अनुगमन समितिको बैठक विनानिष्कर्ष टुंगिएको हो ।
प्रधानमन्त्रीनिवास बालुवाटारमा बसेको बैठकमा दलहरूले आ–आफ्नो दाबी प्रस्तुत गरेको एक नेताले बताए । बैठकमा महानगरपालिका र उपमहानगरपालिकाका प्रमुख र उपप्रमुख पद बाँडफाँडको विषयमा छलफल भए पनि सहमति नजुटेको उनले बताए ।
कांग्रेस नेता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले स्थानीय तहको निर्वाचनमा गठबन्धनबीचको तालमेललाई कसरी व्यवस्थित गर्ने भन्ने विषयमा छलफल भएको बताए । बैठकमा सिट बाँडफाँड र उम्मेदवारीको विषयमा छलफल भए पनि निष्कर्षमा नपुगेको जानकारी दिए । ‘तालमेललाई कसरी व्यवस्थित बनाएर लैजाने भन्नेबारे छलफल भयो । निष्कर्षमा पुग्न अझै केही दिन लाग्छ,’ मन्त्री कार्कीले भने ।
यसअघि आइतबार बिहान गठबन्धनका शीर्ष नेताहरूको बैठक बसेको थियो । बालुवाटारमा भएको बैठकमा नेताहरूले महानगरपालिका र उपमहानगरपालिकाको बाँडफाँड आज (सोमबार) सम्म टुंग्याउने सहमति गरेका थिए । उक्त बैठकले महानगर र उपमहानगरबाहेकका स्थानीय तहको तालमेलको सन्दर्भमा प्रारूप बनाउन समितिलाई जिम्मा दिने निर्णय गरेको थियो ।
कसको दाबी कहाँ ?
गठबन्धनको स्थानीय तह निर्वाचन परिचालन तथा अनुगमन समितिको बैठकमा दलहरूले आ–आफ्नो दाबी पेस गरेका थिए । कांग्रेस नेताहरूले महानगरपालिकाहरूमा आफूले नेतृत्व लिनुपर्ने दाबी गर्दै आएका छन् । बैठकमा सहभागी एक नेताका अनुसार माओवादी केन्द्रले भरतपुर महानगरसहित धरान, जितपुर सिमरा, हेटौंडा र घोराही उपमहानगरको प्रमुखमा दाबी पेस गरेको छ ।
नेकपा एकीकृत समाजवादीले पोखरा महानगरसहित उपमहानगरमासमेत नेतृत्व पाउनुपर्ने दाबी गरेको छ । एकीकृत समाजवादीले २०७४ को निर्वाचनमा एमालेले जितेको स्थानमा आफूले पाउनुपर्ने दाबी गरिरहेको छ । यता जनता समाजवादी पार्टीले एक महानगरपालिकासहित तीन उपमहानगरपालिकाको नेतृत्वमा दाबी गरेको छ । जसपाले वीरगञ्ज महानगरपालिकासहित धरान, जनकपुरधाम र नेपालगञ्ज उपमहानगरमा नेतृत्व दाबी गरेको बैठकमा सहभागी एक नेताले बताए ।
पाँचदलीय गठबन्धनमा नेपाली कांग्रेस, माओवादी केन्द्र, एकीकृत समाजवादी, जनता समाजवादी पार्टी र राष्ट्रिय जनमोर्चा आबद्ध छन् । स्थानीय तह निर्वाचनमा तालमेल गर्ने समझदारी गरेका यी दलले केन्द्र, प्रदेश, जिल्ला र स्थानीय तहसम्म गठबन्धन दलका नेता सम्मिलित संयन्त्र बनाएका छन् । गठबन्धनले गत २९ चैतमा सिट बाँडफाँडको ‘मोडालिटी’ टुंग्याएको थियो । सोही मोडालिटीका आधारमा सिट बाँडफाँड गरी केन्द्रमा पठाउन निर्देशन दिएको थियो ।
महानगर र उपमहानगरपालिकाको मेयर÷उपमेयरको सिट बाँडफाँडको निर्णय भने पाँचदलीय गठबन्धनको केन्द्रीय संयन्त्रले गर्नेछ । गठबन्धनले नगर र गाउँपालिकाको तालमेलको सिट बाँडफाँड ३ वैशाखभित्र जिल्ला संयन्त्रले प्रदेशलाई र प्रदेश संयन्त्रले निर्णय गरी ५ वैशाखभित्र केन्द्रलाई पठाउने निर्णय गरेको थियो ।
तालमेलमा सकस
केन्द्रीयस्तरमा चुनावी तालमेलको सहमति गरे पनि अधिकांश स्थानीय तहमा गठबन्धनलाई सकस परेको छ । गठबन्धनले चुनावी तालमेलको निर्णय कार्यान्वयन गर्न निर्देशनसमेत जारी गरिसकेको छ । तर स्थानीय तहका नेता कार्यकर्ता केन्द्रीय निर्णय मान्न तयार देखिएका छैनन् ।
आइतबार मात्रै कांग्रेसको काठमाडौं महानगर समितिले चुनावी तालमेल नगर्ने निर्णय गरेको छ । यसअघि चितवनको भरतपुरमा असन्तुष्ट कांग्रेसका ५० सक्रिय नेता÷कार्यकर्ताले शनिबार पार्टी छाडेको घोषणा गरेका थिए । अन्य स्थानीय तहमा पनि नेता/कार्यकर्ताको असन्तुष्टि देखिन्छ । यसले अधिकांश स्थानीय तहमा तालमेलबारे अन्योल बढाएको छ ।
निर्वाचन आयोगले स्थानीय तह निर्वाचनका लागि उम्मेदवार मनोनयन गर्ने समय वैशाख ११ र १२ गते तोकेको छ । त्यसअनुसार उम्मेदवारी दर्ता गर्ने समय एक सातामा मात्र बाँकी हुँदासम्म गठबन्धनभित्र अन्योल देखिएको हो ।
गठबन्धनको स्थानीय तह निर्वाचन परिचालन तथा अनुगमन समितिको बैठक आज पुनः बस्ने जानकारी दिइएको छ । आजको बैठकले गठबन्धनका दलहरूबीच भागबण्डा टुंग्याइने गठबन्धनका नेताहरू दाबी छ ।
