हेटौँडा– निर्वाचन आयोगका आयुक्त रामप्रसाद भण्डारीले स्थानीय तहको निर्वाचनको व्यवस्थापन चुस्तदुरुस्त रहेको बताएका छन् । निर्वाचन आयोगले शनिबार हेटौँडामा आयोजना गरेको मिडिया अभिमुखीकरण कार्यक्रममा निर्वाचन नहुने, निर्वाचन सर्न सक्छ भन्ने भ्रामक समाचारमा भर नपर्न उनले अनुराध गरे ।
उनले नेपाली सञ्चारमाध्यमले स्वतन्त्र र निष्पक्ष भएर समाचार सम्प्रेषण गर्नुपर्ने बताउँदै निर्वाचन आचारसंहिता कार्यान्वयनमा ल्याईसकेको जनाए । उनले निर्वाचन आचारसंहिता उल्लंघन गर्नेलाई तोकिएबमोजिमको हदैसम्मको कारबाही हुने पनि जानकारी गराए । आयुक्त भण्डारीले भने, ‘आयोगले आचारसंहिता कार्यान्वयनमा ल्याइसकेको छ, यसको उल्लंघन गर्ने जो सुकैलाई पनि कानुनको दायरामा ल्याएरै छाड्ने छौँ ।’
आयुक्त भण्डारीले निर्वाचनमा खटिएका मुख्य निर्वाचन अधिकृत तथा अधिकृतलाई अभिमुखीकरण दिइसकेकोले निर्वाचन नहुने, निर्वाचन सर्न सक्छ भन्ने भ्रामक समाचारको महत्व नहुने बताए । उनले लोककतन्त्रमा निर्वाचन अपरिहार्य हुने भएकोले कुनै पनि हालतमा निर्वाचन गरिने जानकारी गराए । उनले निर्वाचनलाई स्वतन्त्र, निष्पक्ष, भव्य र सभ्य रूपमा सम्पन्न गराउनका लागिसञ्चार माध्यमले महत्वपूर्ण भूमिका निर्वाह हुने हुनाले निर्वाचन आचारसंहितामा रहेर समाचार दिनुपर्नेमा जोड दिए ।
आयोगका उपन्यायाधिवक्ता गुरूप्रसाद वाग्लेले सञ्चारमाध्यममा आएका समाचारलाई आयोगले सूचनाका रूपमा लिने बताएका छन् । स्थानीय तह निर्वाचनमा विगतमा कारवाही कम भएको देखिए पनि यसपटक यस्तो नहुने भन्दै आचारसंहिता पालना गर्न लगाउन पनि मिडियाले महत्वपूर्ण भूमिका खेल्नुपर्ने सुझाव दिए । प्रेस काउन्सिलका सदस्य चिरन्जीवी मास्केले निर्वाचनको समयमा मिथ्या सूचना, दुष्प्रचार र घृणास्पद अभिव्यक्तिको रोकथाम, फेक समाचार, सूचना कसरी चिन्ने र प्रकाशन/प्रसारणमा रोक लगाउनाका साथै काउन्सिलबाट हुने कारबाहीको विषयमा कार्यपत्र प्रस्तुत गरेका थिए ।
नेपाल पत्रकार महासंघका केन्द्रीय सदस्य सुनील खड्काले निर्वाचनसँग सम्बन्धित समाचार संकलन र रिपोर्टिङका विषयमा कार्यपत्र प्रस्तुत गरेका थिए । कार्यक्रममा बागमती प्रदेश निर्वाचन अधिकारी लुम्बनाथ पोखरेल, आयोगका शाखा अधिकृत तीर्थराज चापागाईं, नेपाल पत्रकार महासंघ मकवानपुरका अध्यक्ष मणिराज गौतमले स्थानीय तहको निर्वाचनलाई सबै मिलेर निष्पक्ष र भव्य रूपमा सम्पन्न गराउनुपर्ने सुझाव दिए ।
-1755862759.jpeg)
