काठमाडौं– आगामी वैशाख ३० गते हुने स्थानीय तह निर्वाचनमा प्रमुख प्रतिपक्ष दल नेकपा एमाले र परिवार दलबीच तालमेल गर्ने गरी सम्झौता भएको छ । एमाले पार्टी कार्यालयमा आयोजित एक कार्यक्रमका बीच नेकपा एमालेका तर्फबाट स्थानीय विकास विभाग प्रमुख देबेन्द्र दाहाल र परिवार दलका महामन्त्री सन्तोषकुमार पौडेलबीच हस्ताक्षर गरेका हुन् ।
पाँच बुँदामा भएको सहमतिमा देशभरीका तालमेल संभव भएका पालिकाहरूमा आपसी तालमेल गरेर उम्मेदवार उठाउने, नेपाल परिवार दलले आफ्ना उम्मेदवार नभएका सबै ठाउँहरूमा नेकपा एमालेका उम्मेदवारलाई सघाउने भएको छ । नेपाल परिवार दलका उम्मेदवारलाई नेकपा एमालेले सघाउने, नेकपा एमाले र नेपाल परिवार दलका जिल्ला कमिटीहरूले आपसमा छलफल गर्ने र तालमेलका सम्बन्धमा उपयुक्त निर्णय गर्ने नेपाल परिवार दलका उम्मेदवारहरूले सूर्य चिन्ह लिएर निर्वाचनमा प्रतिस्पर्धा गर्ने ।
निजहरू निर्वाचित भए पश्चात पनि नेपाल परिवार दलमै आवद्ध रहने र जिल्ला तहमा भएको छलफल र सहमतिको सम्बन्धमा आ आफ्नो प्रदेश र केन्द्रीय नेतृत्व समक्ष नियमित रूपमा प्रतिवेदन प्रस्तुत गर्ने बिषयमा सहमति भएको हो । २०७४ सालको निर्वाचनमा ३ बुँदे सहमति गरेर एमालेसँग चुनावी सहकार्य गरेको परिवार दलले निर्वाचन नजिकिएसँगै फेरि एमालेसँग स्थानीय तहको निर्वाचनमा तालमेल गरेको हो । नेपाल परिवार दलका अध्यक्ष एकनाथ ढकालसहितको टोलीले एमाले अध्यक्ष केपी शर्मा ओली पटक पटक वार्ता भएको थियो भने मंगलबार भएको भेटवार्ता पछि तालमेल गर्ने सहमति जुटेको हो ।
एमाले स्थानीय तहमा लोकप्रिय रहेको भन्दै नेपाल परिवार दलका अध्यक्ष एवं पुर्वमन्त्री एकनाथ ढकालले एमाले पार्टीसँगको तालमेलले दुवै दललाई फाइदा हुने बताए । हस्ताक्षर कार्यक्रममा एमालेका तर्फबाट बरिष्ठ उपाध्यक्ष इश्वर पोखरेल, उपाध्यक्ष बिष्णु पौडेल, उपाध्यक्ष युवाराज ज्ञवाली, महासचिव शंकर पोखरेल, प्रदिप ज्ञवाली, बिष्णु रिजाल लगायतको नेताहरूको सहभागिता रहेको थियो भने परिवार दलको तर्फबाट महामन्त्री सन्तोष पौडेल, सहमहामन्त्री मिलन राजवंशी, मनोज कुमार सुर्खेती, प्रवत्ता रूपसिह भण्डारी, लक्ष्मी प्रसाद भण्डारी, रबिन्द्र चौलागाइर्, ढुण्डीराम खनाल, कामना भुसाल लगायतको नेताको उपस्थती रहेको थियो ।
सम्झौता पछि बोल्दै एमाले बरिष्ठ उपाध्यक्ष इश्वर पोखरेलले सम्झौताको अक्षरस पालना गर्ने तथा परिवार दलको प्रतिनिधित्व स्थानीय तहमा हुने बताए । परिवार दलका महामन्त्री सन्तोष पौडेले बिगतमा पनि एमालेसँग चुनावी सहकार्य गरको स्मरण गदै स्थानीय निकायमा मात्र हैन प्रदेश र संघिय निर्वाचनमा पनि एमालेसँग सहकार्य गर्ने बताए । त्यस्तै नेकपा (एमाले)सँग राष्ट्रिय प्रजातन्त्र पार्टीले पनि निर्वाचनमा एकापसमा सघाउने विषयमा सहमति भएको छ ।
एमालेका वरिष्ठ उपाध्यक्ष ईश्वर पोखरेल र राप्रपा नेपालका अध्यक्ष कमल थापाको उपस्थितिमा एमालेका स्थानीय विकास विभागका प्रमुख देवेन्द्र दाहाल तथा राप्रपा नेपालका स्थानीय निकाय परिचालन विभागका प्रमुख सुशीलकुमार श्रेष्ठले सहमतिपत्र सार्वजनिक गरिएको छ ।
-1755862759.jpeg)
